日式红豆水羊羮

日式红豆水羊羮(食譜參考COOK 1 COOK)

材料：

红豆 200g
大菜絲 8g
冰糖 150g
水與豆沙加起約 1000g左右

做法：

1. 大菜絲先用水浸30分鐘，再用500g水煮至溶。
2. 紅豆煮淋，用篩洗豆隔去皮，成豆沙槳。
3. 豆沙槳與糖及(1)一起煮滾(要攪拌，以免痴底)，稍放涼後倒入模中，放雪櫃雪凍即可。

後記：

很容易整的一款甜品。

芝麻糊

芝麻糊

材料： 黑芝麻110g. 花生20g. 白米60g. 糯米10g. 水4-5杯. 冰糖120-130g..

做法：
1. 白米和糯米洗淨浸水2小時。黑芝麻和花生洗淨，用白鑊炒香，盛起待凉
2. 把已炒過的黑芝麻和花生加2杯水攪拌隔喳，倒至煲中先煲約15分鐘。浸過的白米和糯米放有隔喳網的攪拌機，加2杯水攪打成槳，約2次3分鐘，至微粒更加幼細，然後全倒進煲裏(這時差不多沒有喳)。
3. 將冰糖碎加入煲中同煮，用慢火，邊煮邊攪，以防黏底，至糖溶及滾起即可。

後記：

今次嘅芝麻糊和之前整嘅改咗啲，加咗花生和糯米，希望會令到煲出嚟嘅芝麻糊香啲和口感好啲。

椰汁馬豆糕

椰汁馬豆糕

材料:

煮好馬豆     120g
大菜絲         4g
水                 600g
粟粉             60g
砂糖            100g
椰汁            200g
花奶            70g

做法:

1. 將大菜絲剪成小段用份量以外水浸軟約2個鐘，隔去水份加水煮至全部溶解再加入砂糖煮溶。
2. 將粟粉用椰汁和花奶攪拌均勻，過濾至無粉粒
3. 將2加入1中，慢慢倒入攪拌，最後加入馬豆不停攪動至杰身有泡滾起熄火.
4. 倒落模中攤涼，放入雪櫃雪凍即可。

後記：

好耐無整馬豆糕食，真係好味，之前整親都用400g椰汁的份量，但就不停咁食，所以今次整一半份量。如果唔係之前減咗嗰2磅就得個零。
馬豆係之前煮好咗但無整到，放咗係冰格，所以馬豆份量係已煮好的。
馬豆可用水預先浸4個鐘，之後中火煲約20分鐘，熄火焗15分鐘，如果發覺未夠淋，再重覆煲和焗的動作，直至淋身，隔水備用。

紅豆糯米糍

紅豆糯米糍 

糯米糍材料：    糯米粉  1杯      水  3/4杯      砂糖 1大匙   鹽 少許

做法： 

1.   糯米粉加砂糖加鹽攪均，倒入水攪至溶解，放微波爐叮2分鐘，取出稍為攪拌，再次叮約1分鐘至熟。取出再稍為攪拌一陣。 

2.     將粉團放在熟糯米粉上，稍壓扁分約8份。每份包入40g紅豆蓉，按好收口，搓成球形即可。



後記： 

這食譜喺youtube找到，很易整，又好味。糯米粉只需在微波爐叮1分鐘即是熟糯米粉。
之前亦有用呢個食譜嚟整花生糯米糍，1個月已用咗1kg糯米粉嚟整，可知幾好味呢。

食譜及做法請按連結如下

Chapssalddeok (Korean style mochi) 

芒果布甸

芒果布甸(參考高偉倫廚藝班食譜)

材料：

芒果 2或 3個
芒果啫喱粉 1盒
花奶 230克
滾水 230 克
蛋黃一隻

橙酒一茶匙

做法:

1) 將芒果切粒備用。

2) 用大碗將蛋黃打散，然後一路倒入230克滾水打開，

3) 加入啫喱粉攪拌至完全溶解。
3) 將花奶倒入啫喱水中徹底拌勻。
4) 將芒果粒放入啫喱水中，最後可加一茶匙橙酒提味。

5) 分小杯放雪櫃2-3小時即成。

後記：

芒果又當造，除咗就咁食外，要整番啲甜品應下季至得。呢一個係非常簡單的芒果布甸做法，加蛋黃或不加都試過，分別不太大，不加蛋黃就好像比較實啲啲。不過相信原食譜一定有佢要落蛋黃的道理。

湯圓

湯圓 (食譜妃娟)

材料：
A.   糯米粉60g.     凍水40g.

B.   糯米粉140g.    糖8g.     凍水80g.     植物油12g.

做法：
1.  將A搓成團，分成數份，然後再壓扁放入滾水中，煮至浮起，撈出，和B材料一起搓至光滑。
2.  覆蓋靜置30分鐘
3.  將粉糰搓長，分割成約12g一份。以虎口包餡收口，最後輕輕的搓至光滑即可。
4.  滾水落湯圓，煮至浮起後呈稍微膨脹狀即可撈出。
5.  另煲煮糖水。片糖加庶糖再拍片姜，煮至糖溶即可。
黑芝麻餡、花生餡 (食譜孟老師)
材料： 黑芝麻粉 (花生粉)60克 + 糖粉25克 + 無鹽牛油30克
做法： 待牛油稍微軟化後，即可用手搓揉成糰，再分成每個約8g-10g，接著冷凍凝固。

後記：  上次整過孟老師的湯圓食譜，佢材料中無放油，搓時非常黏手。今次試整妃娟食譜，比較好搓。以前整湯圓通常都係就咁用糯米粉加水搓就算，無話又要先煮咗一部份嚟搓，雖然係比較多功夫，但口感又真係煙韌啲。

杏仁糊

杏仁糊 (食譜獨角仙)

材料:   大南杏 120g.   北杏 30g.   米 25g.   冰糖 140g.   水12 50ml.(五杯)   花奶適量


做法:
1.  杏仁和米一同洗淨，加水(份量外)預先浸透。
2.  將杏仁和米加3杯水放入有過濾網的攪拌機攪約3分鐘成杏仁米漿，倒出，再加2杯水再攪約3分鐘。全倒在煲中，放冰糖，一邊煮一邊攪至煮滾，下花奶便成。

後記： 上次感冒後，成日乾咳，所以煲咗幾次杏仁糊食，聽人講話南北杏可以潤肺，唔知係咪心理作用呢，食咗又好似好啲咁。原食譜只用12g米，之前試過，覺得好稀，自己鐘意食杰啲，所以落多小小米。

夾心朱古力

夾心朱古力 (約20粒)

材料：　
1.   Valrhona 53%朱古力 適量
2.   Valrhona 53%朱古力 30g.   淡忌廉20g.   蘭姆酒4g.  
3.   花生仁(先焗香).

做法：　
1.     把30g朱古力先用刀切碎，加淡忌廉坐熱水或放微波爐分數次(每次約1分鐘)加熱。然後輕輕攪拌至巧克力融化，放涼後加入蘭姆酒攪勻備用。
2.     將部分材料(1)的朱古力放容器於微波爐加熱約20秒，輕輕攪拌至溶，將己溶的朱古力用毛筆塗在模內，放雪櫃一陣，取出再塗一層，重覆直到塗過三層，或放模在光線下光線不穿透。
3.     再在已塗朱古力的模注入(1)至6-7成滿，放入花生仁後，放雪櫃至稍為凝固，取出於表面再塗上朱古力溶液封口，放雪櫃一會即可食用。吃不完可以放回雪櫃冷藏保存。

後記：  睇番上次整朱古力已經係舊年7月時。過年前諗著放成18日年假，所以買定好多材料，點知放完假都好似無乜嘢整過。其中包括買咗啲朱古力條和朱古力粒，雖然新年時都食咗啲有牌子嘅朱古力，但都好似唔係好合自己口味，所以決定再次整嚟食，今次比例上加多咗一倍酒的份量，所以真係香好多，雖然果仁方面只係加咗花生仁，但都唔錯。個仔第一次食，佢都話好好味，仲話點解整咁少。放朱古力入口咬時，感到外層朱古力仲好脆添。全部朱古力用咗約100克。

掃完模外層後，加朱古力忌廉餡。

放上花生仁

再注入朱古力忌廉餡至9成

最後用朱古力溶液封口

花生糊

花生糊

材料 ：   花生仁140g     白芝麻 20g.     米35g.     水 4 - 5杯      砂糖130g.    淡奶適量

做法 ：
1.  先將白芝麻洗淨，瀝乾水分，用鑊炒香，放涼。花生仁放鑊炒香，放涼去衣。
2.  把花生仁、白芝麻和浸透的白米放有隔喳網的攪拌機，加2杯水攪打成槳，約2分鐘，然後將漿水倒進煲裏，再放2杯水到攪拌機續打2分鐘至微粒更加幼細，然後全倒進煲裏(喳不要的)
3.  將冰糖碎加入花生米水中同煮，邊煮邊攪，以防黏底，至糖溶及滾起即可。如喜歡可倒入淡奶，增添香味。

後記： 
呢排整咗好多次糊食，芝麻糊、杏仁糊和花生糊。芝麻糊最好食，已經食咗3次，而覺得花生糊就比較漏。

花生糊出嚟顏色比較淡，花生味都夠濃，無加淡奶都好好味。自己唔係好鐘意食太杰，所以米嘅份量就唔落咁多。

芝麻糊

芝麻糊

材料：  黑芝麻90g.   白米60g.   水4-5杯.    冰糖120-130g..

做法：

1.     白米洗淨浸水2小時。黑芝麻洗淨，用白鑊炒香，炒到啪啪聲，盛起待凉
2.     把已炒過的黑芝麻和浸過的白米放有隔喳網的攪拌機，加2杯水攪打成槳，約2分鐘，然後將漿水倒進煲裏，再放2杯水到攪拌機續打2分鐘至微粒更加幼細，然後全倒進煲裏(喳不要的)。
3.     將冰糖碎加入芝麻米水中同煮，邊煮邊攪，以防黏底，至糖溶及滾起即可。

後記：

最近買咗一部攪拌機，舊嗰部已老化到漏水。PHILIP有埋隔喳網，真係方便啲，所以整咗芝麻糊，杏仁糊嚟試吓，效果唔錯，遲啲再試吓花生糊先。圖片中的芝麻糊係第一次整時影的，無隔喳，口感確係差小小，不過連喳食應該有益啲。呢個份量嘅米好似杰咗少少，下次試吓50g米，100g芝麻先。

第一次用呢部機整豆漿時，攪咗無幾耐，就聞到燶燶地味，原來部機出緊煙，後尾睇說明書先知，原來係唔可以攪多過3分鐘，有無攪錯，而家啲機咁喳嘅。自己覺得好似無攪到3分鐘咁耐架，不過好彩部機都仲用到。所以而家每次都SET定時間制，每次唔多過2分半鐘。但呢部機整豆漿就唔係隔得好清。

紅豆糯米卷

紅豆糯米卷 (食譜笛子)

材料：  糯米粉100克     澄粉20克     糖40克     油30克     水150克      紅豆茸適量

做法：
1. 所有材料(除水外)混合均匀，再將水分次加入，攪成稀糊狀，放進微波爐，先叮2分鐘取出攪拌，檢視麵糰熟的程度，如未熟再叮，每次一分鐘，直到叮熟。

2. 叮好後取出，趁熱放入保鮮袋，略搓幾吓，擀成長方形片，然後放凉。
3. 放涼後，剪開袋，把適量豆沙茸鋪滿一層，卷起，切開即可。
4. 成型的糯米卷可沾上各種你喜歡的粉類（如椰茸，可可粉和綠茶粉等）

後記：  之前整糯米糍類，多數都係用美味DIY個食譜，其實比較番今次和之前，材料大家都係差不多份量。今次見到用微波爐整，所以又要試吓先，過程真係好方便和快捷。不過呢個食譜裏面用嘅油，就點攪都唔能夠和麵糰溶合一齊，啲油喺未叮和叮緊中途都係浮面或和麵糰分離，所以覺得可不放油落去都可，不過小量嘅油就可令到麵糰無咁黏。

焦糖布丁

焦糖布丁

焦糖材料：   砂糖50g.   水20g.

做法：   砂糖和水用小火煮至焦糖色，再倒入在杯模內凝固

布丁蛋液材料：    砂糖25ｇ.   全蛋2隻.    牛奶175ｇ.   淡忌廉40g.  雲呢拿香油數滴

做法： 

1.          蛋用打蛋器打散加香油。牛奶加糖用小火煮溶，加入淡忌廉拌勻，倒入蛋液中攪勻，過濾後倒入有焦糖的杯模中。

2.          焗爐預熱至150度，把模放進另一個大烤盤裡，在烤盤之間注入熱水，放進焗爐隔水焗約15-20分鐘，或見蛋漿開始凝固即可關火。

後記： 焦糖布丁真係簡單易做和好好味，今次份量預得唔係好準，分咗3杯後，布丁部份每杯得好少，所以好快己凝固。網上亦見到有食譜可用微波爐整，用解凍食物制，先叮6分鐘，睇睇凝結程度，再每次加叮1分鐘直到布丁成形，杯模當然要唔好咁大啦。睇落好似仲容易咁，下次真係要試吓先。

椰汁紅豆糕

椰汁紅豆糕(食譜蘋果動新聞)

材料：       紅豆250g.      椰汁400毫升.      水1200毫升.     花奶130g.     砂糖250g.     鹽少許.      粟粉100g.       大菜絲 12g.

做法：

1.          將紅豆洗淨浸水4小時或過夜。然後放入沸水，以中火煮滾10分鐘，再熄火加蓋焗10分鐘，重複4次至紅豆腍，備用。
2.          預先浸4小時的大菜絲加入水中，以中火煮至完全溶透，再加入糖。

3.          椰汁加入花奶、粟粉開勻，然後加入大菜水中，不停攪拌，以細火煮沸至稠身，下紅豆、鹽拌勻。

4.          放入容器內，雪至凝固，扣出切件即可。

後記：  今次咁樣煮及焗紅豆真係好粉同埋唔會爛，好正。我用埋煲紅豆啲水嚟整，所以成舊糕都係紅豆色。原食譜按比例，紅豆只落100g，但我地勁鐘意食紅豆，所以用咗250g嚟整。而糖嘅份量落得比食譜多，但出嚟都唔係好甜，最好先試味先，喜甜的可再加。第一次用粟粉加大菜絲整糕點，口感唔錯。

報紙貼士：

紅豆點樣先可煲到又腍又起沙？

1.          紅豆最好浸一晚。

2.          煲紅豆時千萬不要加任何糖或鹽。

3.          以半焗半煮方式，這樣紅豆就腍到入心。

夾心朱古力

夾心朱古力

材料：　
1.   Valrhona 53%黑朱古力 適量
2.   Valrhona 53%黑朱古力 60g.   淡忌廉40g.   蘭姆酒4g.  
3.   杏仁碎(先焗香).    提子干.

做法：　
1.     把60g朱古力先用刀切碎，加淡忌廉坐熱水或放微波爐分數次(每次約1分鐘)加熱。然後輕輕攪拌至巧克力融化，放涼後加入蘭姆酒攪勻備用。
2.     將部分材料(1)的朱古力放容器於微波爐加熱約20秒，輕輕攪拌至溶，將己溶的朱古力用毛筆塗在模內，放雪櫃一陣，取出再塗一層，重覆直到塗過三層，或放模在光線下光線不穿透。
3.     再在已塗朱古力的模注入(1)至6-7成滿，放入杏仁碎或提子干後，放雪櫃至稍為凝固，取出於表面再塗上朱古力溶液封口，放雪櫃一會即可食用。吃不完可以放回雪櫃冷藏保存。

後記：  第一次整朱古力，雖然之前都有做少少功課，諗著試吓做調溫，於是先將朱古力坐熱水溶解，書話要先將朱古力在溫度45-50度之間溶解，但未到呢個度數，約35度朱古力己全部溶晒，咁我仲需唔需要再加熱到45度呢。我見朱古力溶晒咪將佢坐冰水降溫至27度，諗著再調溫至約30度時，一轉眼取得暖水時，朱古力已凝結，再要攪一輪先再將朱古力變番液態狀。真係攪到頭都大，最後放棄調溫，改用微波爐加熱朱古力算把啦。

雖然無預期咁順利，但微波爐加熱都好方便，因材料(2)的份量原來整出嚟都唔少，等到塗模的朱古力唔夠時，只需切小小朱古力碎放微波爐加熱一陣就可以用，非常方便，唔會用唔晒浪費朱古力。一路整已可一路食，放雪櫃好快凝結，呢個模細細，可一啖一粒，一咬落去都有咯一吓爆開嘅聲，成品自己都覺得可以，(當然無其他網友令立立的出品咁靚)，不過朱古力粒個底唔夠平，下次要用刀刮平就會靚啲。

芒果布甸

芒果布甸 (食譜參考longway)

材料 :
芒果2個.   砂糖50g.   牛奶230g.   淡忌廉80g.   魚膠粉8g .   水200g.

做法：
1.   淡忌廉打至8成放雪櫃備用，魚膠粉加50g水叮溶備用

2.   將芒果肉起出，1個切粒另外1個連牛奶一同用打爛成芒果奶

3.   將150g水和50g糖加熱至溶，倒入芒果奶中攪勻，之後加埋入魚膠粉水待涼
4.   將淡忌廉取出，分次將(3)加入拌勻，拌勻後加入切粒既芒果肉即可入模。

                    

後記：  原食譜淡忌廉份量應該要用多啲，但我用剩得80g，所以加多啲奶和減番啲水嚟補充奶味，如有興趣可到連結睇番原食譜。成品出嚟口感唔錯，幾滑，自己已減糖。先生和媽媽食過都話好味，自己覺得比上次成品滑啲無咁漏。