煙肉芝士包

煙肉芝士包

材料： 

高筋麵粉200g.    即溶酵母4g.    糖26g.    牛油20g.    蛋26g,     水110g.    鹽小小. 
煙肉和芝士適量

做法：
1.   將所有粉類、酵母、糖、蛋以及凍水放麵包機攪拌約10分鐘，等形成一團比較光滑的麵糰後熄機。
2.   將牛油加入在粉團內，再從新開機，繼續搓至麵糰有彈性(約15分鐘)。
3.   麵團作第一次發酵約60分鐘，發酵至2倍大。
4.   將麵糰排氣分成6份，每份約65克，滾成圓形，靜置10分鐘。
5.   靜置後，用手按扁成橢圓形，由上而下按壓成欖形，排於烤盤上放入焗爐內，焗爐內置熱水，讓其發酵至2倍大，大概1小時。

6.   取出麵糰，預熱焗爐至180度，於麵包上掃上蛋汁(分量外)，及放上芝士及煙肉。焗約14分鐘，取出放涼。

後記：  最近係YAHOO拍賣網，bid咗部Princess麵包機，雖然無專用麵糰攪拌機咁好，但對於我嚟講都好過用手搓嘅，尤其係比較濕的麵糰。bid佢返嚟最主要都係用嚟搓麵糰。麵包機最唔好係喺攪拌時，部機已開始熱，未到攪拌至完成階段，麵糰已開始發酵。希望用耐咗，孰習咗部機後，可慢慢改良出品。

第一次用麵包機嘅成品。麵包都好鬆軟，可能水份比較多，到第三日都未變乾。

2013年9月14日後記：

呢個麵包機係YAHOO拍賣BID返嚟$300，睇嚟係全新，但用過後發現只可攪麵糰，一到焗就令到全屋跳制，真係氣死人。

紅豆戚風蛋糕

紅豆戚風蛋糕 (6吋模)

材料：  
A.   低筋粉70克.   蛋黃3個.  砂糖15克.   沙拉油37克.   水40克.   紅豆茸80克
B.   蛋白4個.   砂糖 45克.  

做法：

1.   蛋黃加15克糖打至混合。再加入油及水攪拌至糊狀後，將紅豆茸加入拌勻，再加入粉拌勻。

2.   蛋白分3次加入45克糖，打到乾性發泡。

3.   再將1/3的蛋白霜加入，用手動打蛋器輕手攪拌後，再全部倒回蛋白霜中，切底拌勻，入模。拿起模dun兩下。

4.   放入已預熱175度的焗爐，焗約40 - 45分鐘(如中途覺得蛋糕面太焦，可蓋鍚紙)。出爐後馬上倒扣。

          

                       

後記： 今次蛋糕焗好後個形都保持到，無話個面縮返落去，變得扁晒咁，組織都好細密。不過放涼後個面都仲有小部份濕濕地。下次可將部份油份改用水，感覺會無咁肥膩。

鳳梨酥

鳳梨酥 - Carol 自在生活

自製鳳梨醬

材料:   罐頭菠蘿一大罐,   細砂糖40g,   麥芽糖1大匙,   煮食油20g   太白粉適量

做法：

1.     菠蘿用刀切碎，或用攪拌機攪碎放鍋中
2.     將細砂糖及麥芽糖加入，小火慢慢熬煮，再將煮食油加入拌炒至濃稠沸騰
3.     最後將太白粉慢慢加入拌勻至濃稠即可

鳳梨酥外皮:

材料：   牛油120g.    糖粉25g.    全蛋1個+蛋黃1個.      帕梅善起士粉25g.    奶粉20g,   低筋麵粉150g.   中筋麵粉50g.

做法：:
1.     將已回溫的牛油和糖放入盆中，用打蛋器攪打成乳霜狀
2.     將蛋液攪散，分3次加入攪拌均勻

3.     依序將帕梅善起士粉，奶粉加入攪拌均勻

4.    將過篩的粉類加入，用括刀切拌混合均勻

5.     外皮分成每個約15g滾圓，桿開成大圓片，將鳳梨餡放唧筒唧在餅皮上，收口捏緊滾圓
6.     放入已預熱到170度的焗爐，焗約10分鐘翻面再烤10分鐘至表面呈現均勻的金黃色即可從模具中取出移至鐵網架上放涼

後記：  想整鳳梨酥好耐，終於下定決心整時，街市又忽然無新鮮菠蘿賣，咁為有買罐頭。諗著用攪拌機可以慳啲功夫，點知只係按咗幾下，差啲渣都無，要用隔篩先隔到啲。所以煮埋都唔係好多。鳳梨餡真係好黏手，攞上手就點都擺唔到落餅皮度，所以要放入唧筒先可以整到。食就幾好味，尤其出爐一陣，仲熱熱地時，好好食，不過就覺得自己整得個皮唔係好夠鬆。

杏仁糊

杏仁糊 (食譜獨角仙)

材料:   大南杏 120g.   北杏 30g.   米 25g.   冰糖 140g.   水12 50ml.(五杯)   花奶適量


做法:
1.  杏仁和米一同洗淨，加水(份量外)預先浸透。
2.  將杏仁和米加3杯水放入有過濾網的攪拌機攪約3分鐘成杏仁米漿，倒出，再加2杯水再攪約3分鐘。全倒在煲中，放冰糖，一邊煮一邊攪至煮滾，下花奶便成。

後記： 上次感冒後，成日乾咳，所以煲咗幾次杏仁糊食，聽人講話南北杏可以潤肺，唔知係咪心理作用呢，食咗又好似好啲咁。原食譜只用12g米，之前試過，覺得好稀，自己鐘意食杰啲，所以落多小小米。

香橙戚風蛋糕

香橙戚風蛋糕 (食譜紅杉樹姐姐的博客)

材料 (10吋水泡模)：  
A.   蛋白4個.   砂糖 60克.  
B.   低筋粉100克.   蛋黃4個.  砂糖15克.   煮食油60ml.   橙汁90ml.  

做法：
1.   先將蛋黃加15克糖打發。再加入油及橙汁完全拌勻混合後，再加入粉拌勻。
2.   蛋白分3次加入60克糖，打到乾性發泡。
3.   將1/3的蛋白霜加入(1)，用手動打蛋器攪拌後，再全部倒回蛋白霜中，切底拌勻，入模。拿起模dun兩下。
4.   放入已預熱180度的焗爐，焗30分鐘(如中途覺得蛋糕面太焦，可蓋鍚紙)。出爐後馬上倒扣。

後記：  

戚風蛋糕食譜都有好多種，各有各不同份量的比例，焗爐溫度由150度至200度都有，所以次次整出嚟都唔會一樣，亦係好玩之處。今次又比我搵到呢個食譜，唔好理係咪真係最好，但睇完佢咁有誠意分享佢個人經驗及心得，己得益不少。

今次蛋糕面都係有部份有少少濕，下次要焗多5分鐘應比較好。

咖啡朱古力曲奇

咖啡朱古力曲奇 (食譜參考王傳仁的陽光宣言)

材料：   牛油 112g.    砂0糖 65g.    全蛋 12g.    低筋麵粉(過篩) 155g.    研磨咖啡粉 8g.    奶粉 4公克.     烘焙朱古力粒適量

做法： 

1.   將牛油和糖打發到變白成羽毛狀
2.   再加入蛋液打勻後，加入低筋麵粉、研磨咖啡粉、奶粉，切拌均勻
3.   然後裝入擠花袋中，擠成圓形，再放上朱古力粒
4.   放入己預熱160度焗爐，焗約10分鐘後，轉150度再焗多約10分鐘，即可取出放涼。

      

後記：  本來之前見到呢個食譜已經想整，到預備材料先知係用硏磨咖啡粉，而唔係即溶咖啡粉，自己平時無飲開硏磨咖啡，所以放埋一邊先。至前幾日，有個印尼同事返完印尼放假，帶咗啲佢媽媽自己磨嘅咖啡粉，比咗少少我試下，佢話無咖啡機都可就咁用熱水開，等一陣至咖啡粉沉底就可以飲，雖然一定無用咖啡機咁好味，不過都好過無。而我收到硏磨咖啡粉第一件想到嘅梗係可以用嚟整呢款曲奇啦。原食譜按比例，硏磨咖啡粉只需落約4g，而我已經落多一倍份量，不過咖啡味都唔係好強烈，唔知關唔關個別不同咖啡種類呢。

後補：  原來口味和感覺真係每個人都好唔同，自己覺得落咗雙倍份量嘅硏磨咖啡粉都唔夠味，但今日問個仔，點呀呢隻曲奇餅，佢話好好味，咁我通常都會問有啲乜嘢味，佢多數都講唔出，但今次佢就話，咖啡味囉，我話咁叻嘅，佢就話咁濃咖啡味，梗食得出啦。可能因為自己有飲開咖啡，所以覺得咖啡味唔夠強，如無飲開咖啡嘅人，應該好夠味。

紅莓慕士朱古力蛋糕

 紅莓慕士朱古力蛋糕

朱古力戚風蛋糕

材料：  
1.   蛋黃3個.   糖15克.   植物油 25克.   鮮奶30克.   RUM酒17克.    低筋粉50克.   朱古力粉15克.  
2.   蛋白3個.   糖35克.  

做法：

1.   朱古力粉和低筋粉先過篩。長形焗盤鋪鍚紙。

2.   蛋白分次加入35克砂糖，打到企身。

3.   蛋黃加15克糖打至混合，加入植物油、奶及酒拌勻後，再加入已篩的粉類拌勻。
4.   將1/3的蛋白霜加入(3)攪拌，攪拌均勻後倒回蛋白霜切底拌勻，入模。拿起模dun兩下。

5.   放入己預熱170度的焗爐，焗約13分鐘。取出放涼備用。

紅莓慕士

材料：   紅莓泥100克.   砂糖40克.   (魚膠粉4克.    水24克.)     淡忌廉150克.

做法：
1. 將紅莓泥和砂糖一起混合均勻後加熱使其溶解，接著加入己叮溶的魚膠粉水，放涼。
2. 將已打至8分發的淡忌廉加入已放涼的(1)中攪拌均勻即可。

果凍

材料：  砂糖30克.    紅莓泥37克.   水70克.      (魚膠粉3克.   水30克)
做法：  將紅莓泥、水70克與砂糖一起混合後，加熱至糖溶，接著再加入已叮溶的魚膠粉水，放涼備用。

組合：

1. 將朱古力蛋糕裁好放入6吋甩底模內，
2. 將紅莓慕士倒入蛋糕中，放入雪櫃冷藏使其凝固。
4. 凝固後從雪櫃取出，在表面淋上果凍液，再放入雪櫃冷藏使其凝固。

                    

後記：  自己真係好懶整裝飾，所以大部份蛋糕都係無裝飾，就算呢個特別為呢個日子整嘅蛋糕都唔例外，因為整咗可能仲醜樣過未整。

二十五年喇，銀婚呢2個字，以前比我嘅晝面印象係，一對年紀好老嘅夫婦(仲要係白晒頭髮嗰種)係度舉杯慶祝結婚紀念。唔覺唔覺自己咁快就到咗呢一日，唔知到金婚時(如果未死，我都有信心可有呢一日)，會唔會仲係度寫緊blog呢。可能到時全世界都已面目全非，因現今科技已達一日千里的地步。