香蕉提子scone

香蕉提子scone

材料：  自發粉200g.  泡打粉 一茶匙.   牛油 50g.   提子乾30g.   香蕉1隻.   砂糖25g.   牛奶20g.   奶(完成時用)少許

做法：

1.  預先將提子乾用水浸軟及壓爛香蕉備用。
2.  將粉類先篩好，加入凍牛油粒，用手指把牛油和粉類碎至麵包屑狀。
3.  即可拌入香蕉溶、糖、提子乾及牛奶，用塑膠刀切伴至混合成糰。
4.  用切伴膠刀由下將麵糰剷起重疊在上後，再由上往下壓扁。重覆3至4次即可。
5.  幹薄麵粉糰至約2cm厚，用圓管模型壓出圓形塊狀，於餅面塗上牛奶。 
6.  放入已預熱200°C焗爐，焗約15分鐘即可。

後記： 屋企有2隻好熟嘅香蕉，本來諗著整香蕉蛋糕，但好似已經整過好幾次，想整吓第二樣嘢，終於諗到整好耐都無整過嘅scone啦。整scone真係好容易和快手，前後唔洗一個鐘，巳有得食。scone最好食就係重暖暖地嗰時，外脆內軟，一口氣就比我食咗3個，真係食到唔停得口。不過下次就咁食而唔涂果占或其他餡料，可落多小小糖，或加多些香蕉份量相信會重好味。壓模後重有多出的麵糰就咁將佢切成三角形，睇落都ok吖。

其他scone食譜參考網誌

http://www.joyofbaking.com/SconesIntroduction.html

紅豆酥

紅豆酥:(15個) (食譜TPC復活日記)

材料: 紅豆餡200克(分成15等份，每份13g，備用)

油皮:
高粉37克. 低粉38克.  牛油28克.  糖粉15克.  水35克. 

酥皮:
低粉102克.  牛油50克.  

先製作小包酥：

1.   製作油皮：將所有油皮材料混合，搓揉均勻至表面光滑且麵團有彈性，覆蓋保鮮膜，靜置15-30分鐘後，分割成15等份，每份10克。
2.   此時可以製作酥皮：混合低筋麵粉與牛油，搓揉至成團狀。將酥皮也分割成15等份，同樣每份10克備用。
3.   每個油皮包裹一個酥皮，收口，用掌心按壓一下，再用桿麵杖從中間向前後兩側桿開，捲起，如此包完全部的酥皮。將每個捲好的油酥皮換方向打直再輕壓、桿開、包捲。

做法：

1.   將酥油皮好似圖的樣子，從上向下壓下再桿開，取一份豆沙餡放在中央，右手張開虎口慢慢收緊油酥皮並向內收攏使成圓球狀，最後把收口處捏緊。
2.   排放在烤盤上，均勻刷上蛋黃液。
3.   將焗爐預熱至190度，放入烘烤約15分鐘即可。

後記： 這紅豆酥好耐之前已想做，但感覺好似好難咁，但原來只要跟著食譜做一啲都唔難，只係比較多步驟。油皮搓起並唔係好似整麵包糰的質感，比較軟和油，好易就可將酥皮包好。本來有啲芝麻可放在紅豆酥面焗，會感覺靚啲，但放芝麻的玻璃樽點都擰唔開，為有就咁就算啦。見到有啲食譜係用酥油或豬油，不過因怕無咁健康，所以就揀咗呢個用牛油整嘅食譜，焗出嚟口感都算鬆脆，可考慮整嚟農曆新年時送比親友，不過都係有時間先算啦。

聖誕雪芳蛋糕

聖誕雪芳蛋糕(食譜A mun's little world)

黃糖肉桂乾果雪芳蛋糕

材料：6吋模

低粉70g.  玉桂粉1小匙.   薑粉2小匙.   蛋黃3隻.   蛋白4隻.   黃糖(soft brown sugar)60g.   鹽小小.   植物油35g.  Rum酒20g.  水20g.  提子乾(預先用rum酒浸過夜)適量.   糖漬橙皮適量

做法：

1. 蛋黃加1/3糖打至淡黃色，加油、酒和水續打均勻，篩入所有粉類和乾果拌勻

2. 蛋白打發成幼泡，分三次加入餘糖及鹽，打發至幼滑企身

3. 先加三分一蛋白霜於(1)攪拌均勻後，再將麵糊全倒入蛋白霜一起攪拌均勻。

4. 麵漿入模，以竹簽劃幾圈消去大氣泡(別碰檯，否則乾果全沉底)，入爐180度焗50分至糕面金啡全乾透，倒扣待涼，脫模。

後記： 本來預計今年聖誕都會整木頭蛋糕(舊年整咗個樹頭蛋糕)，但忽然間好似無乜心情，又發生阿爸失蹤事件，好彩最後都知佢係邊。係網上見到A moon整呢個聖誕雪芳蛋糕簡簡單單，咁都算有整聖誕蛋糕吖。原食譜只焗咗約25-30分鐘，但我於30及40分鐘取出時，竹籤插入時都有粉漿，所以一共焗咗50分鐘至完成。

自從博愛醫院急症室重開後，元朗區的急症救護車都直接送元朗區病人到博愛醫院。但好奇怪，將病人送到博愛又話病人的病歷係屯門醫院，要再安排救護車送病人返屯門醫院睇，你話係咪廢時失事吖，而家乜重未可以係網上檢閱病人病歷架咩。

事原十二月廿四日下午，阿爸唔舒服，阿爸已八十幾歲喇，首次主動叫阿媽call白車入院。當救護員話要送阿爸去博愛時，阿媽諗著元朗去博愛好近啫，當時又煲緊粥，咪同救護員話轉頭自己會跟著去博愛會合。點知當阿媽去到博愛時，急症分流當值人員同阿媽講，話我阿爸已走咗喇，自己出咗院喇。阿媽都好奇怪，平時阿爸行幾步都湍氣，無可能自己走，而身上又無帶錢，又無鑰匙，點可能返屋企，不過都要返去睇吓先可確定。點知返到去屋真係唔見人，於是諗阿爸身上無錢，會唔會佢行路返屋企呢，雖然機會微啲，都要搵吓先。咁為有沿路行去博愛睇吓見唔見阿爸嘅蹤影，最大可能係阿爸重係博愛範圍等緊阿媽。一路都唔見，返到博愛再問分流人員話無返到屋企喎，佢地先叫阿媽問啲護士，原來阿爸送咗去屯門醫院。

你話有無攪錯吖，一間醫院可以咁樣做嘢嘅，你係嗰到做嘢，你咁講，我地梗係信你講嘅嘢啦，唔可以隨口up架嘛，講嘢要負責任架，我阿媽都七十幾歲，要佢咁周為撲，如果有事邊個負責吖。又話阿媽嘈都無用，佢都唔知架(係度做唔知，咁邊個先知喇)，唔知就唔好亂咁講，或者佢地可以問清楚先答人(呢個唔係佢地嘅責任呢架咩)，咁咪好啲囉，做多小小嘢，對大家都好啲吖。

後補：

原來最後先知道個實情係，連個護士都話唔知，係阿媽問會唔會送咗去第二間醫院，佢先叫阿媽自己去問，只係比個電話號碼佢，佢地係唔會幫手問嘅。
我對呢間醫院，呢啲係嗰度做嘢嘅人，同埋佢地嘅做事態度都無話可說囉。為有希望最好唔好病囉。

發完惱騷後，另有一樣嘢和大家分享，尋日收到一個e-mail，係一個勁攪笑的聖誕跳舞製作，可將自己嘅頭key上去，做出一個類似動話嘅影片，好易整，又唔需要log-in至玩得，所以和大家分享一吓，希望重趕得及今日給親友送出多些歡笑。

請click入以下網址：

ElfYourself

檸檬吉士夾心瑞士捲

 檸檬吉士夾心瑞士捲 (21cm x 24 cm)

材料： 
低筋麵粉 52g.  泡打粉1/2小匙.   鮮奶 23g.  蛋黃 3個.   蛋白 3個.   砂糖 38g + 7g.  沙拉油 19g
 
做法：
1.  蛋黃加7g砂糖拌勻，再加入沙拉油、牛奶及過篩後的低筋麵粉及泡打粉拌勻，成蛋黃麵糊。
2.  蛋白攪拌至發泡後再分次放入砂糖打至企身。
3.  先取1/3蛋白霜加入蛋黃麵糊中拌勻後，再將麵糊倒入蛋白霜中拌勻，即成蛋糕體麵糊。
4.  取烤盤，於內層鋪上一層鍚紙，將蛋糕體麵糊倒入、抹平，放入烤箱以180℃烤約10分鐘。
5.  取出烤好的蛋糕體放涼，撕掉鍚紙後以較漂亮面朝下，另一面均勻抹上檸檬吉士餡，再用桿面棍與保鮮紙一起捲起，即可放雪櫃至定形。

檸檬吉士夾心

材料：
1.  吉士粉18g.  砂糖 21g.  牛油 10g.  牛奶 88g.  蛋黃1隻.  檸檬汁 28g.
2.  淡忌廉 120g.  糖霜 18g. 

做法：
1.  在碗中將吉士粉、砂糖、蛋黃和檸檬汁攪勻。
2.  將已加熱到快滾前的牛奶和牛油分次倒入(1)中攪拌混合。
3.  倒回鍋裡，開中火，邊用起泡器從底部混合邊煮熟。直到變成稠黏柔滑的奶油狀就離火，放涼備用。用時先攪拌一吓。
4.  將已加入18g糖霜打至7分起泡的淡忌廉分次加入已放涼的(3)中，攪拌均勻便成夾心餡。

後記： 檸檬吉士餡煮好後無用保鮮膜緊密蓋住，所以放涼後加入淡忌廉時，見到有好多結粒狀，雖然唔美觀，但都無影響到味道。今次蛋糕體桿捲時都有裂開，不過就係開始捲的頭部份，唔係好覺。檸檬吉士餡酸酸甜甜都幾好味，但就好似夾得多咗啲。

椰香紅糖小蛋糕

椰香紅糖小蛋糕(食譜Flowerbee Stweetening)

材料: (8個)

牛油35g.   砂糖10g.   紅糖30g.   蛋1個.   椰絲50g.   麵粉50g.   泡打粉1/2又1/4小匙.   牛奶35cc.   提子乾30g

做法:
1. 預先將提子乾用牛奶浸淋。
2. 牛油和糖放盆中充分打勻
3. 蛋液分次加入打勻，再加入椰絲
4. 麵粉及泡打粉混合過篩後加入拌合均勻
5. 牛奶和提子乾也加入混合後倒入紙模
6. 放已預熱烤箱180度C烤20~25分鐘

後記：Flowerbee網誌上的蛋糕和甜品都整作得好吸引，又係因我樣樣材料都有就整咗呢樣先。不過我加多咗提子乾落去，和減少咗10g砂糖的份量，因提子乾本身都有甜味。蛋糕焗完爆得好靚，甜味適中，下次可加大份量整多幾個，蛋糕真係唔錯，幾好味，第二日食更香。不過唔知點解牛奶要放到最後先落呢。

紅豆糯米餅

紅豆糯米餅 (另一食譜)

材料： 糯米粉150g.  麵粉30g(高筋粉15g.低筋粉15g.).   砂糖30g.  豬油11.5g(牛油10g).  水適量(160cc).  紅豆餡160g.

做法：

1.  將糯米粉、麵粉同篩，加入砂糖、豬油及適量清水搓透成糰。
2.  將麵糰放溫暖處，發酵30分鐘，然後分成等份(分8份，每份33g)。
3.  包入紅豆餡(20g一份)料。
4.  煎鍋放油(小小就夠)，將餅排好於鍋中，注入清水約4湯匙。
5.  以慢火煎至金黃，翻轉再煎另一面至金黃即成。

後記：個食譜本身個餡係包豬肉嘅，叫做玉蘭餅，不過我見佢幅相個皮好軟熟咁，我就試吓用嚟包紅豆餡。加咗啲砂糖落個皮度，等可有小小甜味。這個餅皮好好包，不黏手，容易整形，上次整個紅豆餅，包餡時比較黏手。個餅剛剛煎好時個皮真係好軟熟和有糯米粉的香味，不過唔係好夠甜，下次可落多啲糖。但到第二天吃時，個皮就變硬咗，我無整番熱或叮番，可能整番熱食會軟啲，唔知呢。

紅色字 = 自己落的份量

日式芝士蛋糕(芝士片)

日式芝士蛋糕(芝士片) (食譜參考為食貓)

材料: (6吋模)

麵粉 45g.   粟粉 15g.  蛋 3隻.   糖 48g.   卡夫芝士 3片.   淡忌廉 78g.   牛油 38g. 
　
做法：

1) 將芝士片、牛油和淡忌廉坐熱水攪溶至冇粒粒，完全溶解。

2) 離開熱水後分3次加入蛋黃攪勻，再篩入粉類拌勻。

3) 將蛋白分3次加入糖打發至企身，將1/3蛋白加入麵糊中拌勻，再加入其餘蛋白拌勻。

4) 放入已預熱160度的焗爐(預先在爐內放入網架及有水的焗盆)，可中途蓋上鍚紙，免蛋糕面太燶，焗約40分鐘。

後記：第一次用芝士片整日式芝士蛋糕，感覺好似有啲咸咸地咁，口感都很軟熟。老公話用忌廉芝士香啲。呢個食譜粉嘅份量比例上比較多。就算蛋白打得比較企身，焗時蛋糕都無爆開。原食譜焗30分鐘，我整呢個比例上多1/3，所以焗咗40分鐘，見用竹籤插入都無黏著物，就取出放涼，點知當脫底紙時，見到蛋糕底部重係濕嘅，真奇怪，因並不是坐在水裏焗，但蛋糕其實已經熟咗，所以再放回爐焗多5分鐘至底部乾爽。下次相信要在最後10分鐘取走有水的焗盆，應會好啲。

蘋果批

蘋果批 (6吋批盤)

材料：

批皮： 牛油 70g.  低筋麵粉 120g.   砂糖45g.   冰水 5ml.   蛋 22g.

餡：  蘋果1顆切粒.  砂糖 40g.   粟粉 1小匙.   肉桂粉半小匙.  牛油10g.

做法：　

1. 牛油和低粉，輕輕用手指搓至麵包糠狀，再加入糖拌勻。倒入冰水及蛋醬，稍微拌至呈團狀即可，不要過度攪拌。

2. 覆蓋保鮮紙，放進雪櫃雪至少1個鐘至完全冰涼。

3. 取出麵糰，分成2份，桿成圓形薄片，放進6吋派盤裡，整理服貼之後，有多出的麵皮用手摺疊在批邊即可。用叉子在批皮上刺孔，另一張麵皮也桿成一樣大小。
4. 餡：煲內放入蘋果粒，混合砂糖、粟粉及牛油拌勻，煑至蘋果淋身，將肉桂粉倒入蘋果片中拌一拌即可。

5. 將備好的餡料倒入批盤裡鋪平，蓋上另一張批皮，將多出來的批皮邊緣摺到底下那張批皮的下面，壓緊。在蓋好的批皮中刺孔，然後用叉子在批皮邊緣壓出紋路。

6. 蛋黃加水1大匙(份量外)拌勻，用掃子掃在批皮上。
7. 放已預熱180度的焗爐焗25分鐘。至表面金黃色即可，放在網架上待涼。

後記：蘋果批食譜真係有好多種，有啲批底要落糖，有啲冇。今次試咗有糖嘅先，下次試吓整無糖嘅。無論係邊種蘋果批，美式定法式，真係食極都食唔厭。今次批皮蛋的份量落多咗，批皮比較濕和黏手，下次可落少啲水份。老公喜歡這蘋果批多過法式蘋果批。因令他懷念起以前係mess食完飯後所食的甜品，好多時都係這款蘋果批。

香橙慕士朱古力蛋糕

香橙慕士朱古力蛋糕

朱古力蛋糕(6吋模)

材料： 低筋粉52克.  可可粉8克.  蛋3個.  砂糖50克.  牛油20克.  鮮奶10克

做法：

1.   模先鋪牛油紙，低筋粉和可可粉預先篩好備用。牛油和鮮奶坐熱水溶化。

2.   蛋加砂糖坐熱水打勻至企身，將低筋粉、可可粉加入輕手拌勻再加入暖牛油和奶攪拌均勻。
3.   將麵糊倒入模中，輕敲幾下後入焗爐180度約焗約25分鐘，取出取去牛油紙後放至涼透。切3份備用。

香橙慕士

材料：橙汁 150ml.   蛋黃1個.   砂糖55g.   玉米粉8g.  橙皮茸1/2個.   淡忌廉 150ml.  魚膠粉5克.    水30克

做法：

1.   鍋裡放入橙汁，加熱到快滾前。將蛋黃和砂糖放入容器裡，用起泡器混合，再加玉米粉及橙皮茸混合，邊一點一點加入橙汁邊混合。

2.   倒回鍋裡，開中火，一路要攪拌免黏底。開始出現凝固狀時，變成稠黏柔滑的奶油狀就離火。然後坐水裡冷卻。

3.   冷卻後用手提攪拌器混合，變成柔渦奶油狀。

4.   將淡忌廉打發到七分起泡備用。魚膠粉加水開勻，再放微波爐叮熱放暖。
5.   然後將魚膠粉水加入到(3)裡邊混合，最後再將淡忌廉加入致均勻即可。

組合：模先放一份蛋糕係底，倒3份1香橙慕士餡落蛋糕上，再放上另一份蛋糕，加上餘下的香橙慕士餡抺平便可。放入雪櫃凝固。

後記：朱古力蛋糕部份都好鬆軟，但當夾埋香橙慕士一齊食就被香橙慕士味道蓋過，食唔到朱古力味。同埋慕士部份可再增加多小小糖的份量。可能今次個橙唔夠甜。

小牛角包

小牛角包(食譜手製麵包DIY)

材料：
高筋粉(或法國麵包用粉) . .  300g.
酵母 . . . . . . . . . . . . . . . . . . . . . 5g.
砂糖 . . . . . . . . . . . . . . . . . . . . . 20g
鹽 . . . . . . . . . . . . . . . . . . . . . . . 5g
鮮奶 . . . . . . . . . . . . . . . . . . . . . 185cc
無鹽牛油(揉麵用) . . . . . . . . . 20g
無鹽牛油(摺疊用) . . . . . . . . . 100g

準備：
1.   先把高筋粉過篩，鮮奶加溫到人體膚溫，揉麵用的牛油恢愎室溫。
2.   準備好摺疊用的牛油，切成長10cm厚5mm的正方形，並排在保鮮紙上再包起，再放入雪櫃冷郤。

做法：
1.   把酵母、砂糖、鹽、鮮奶放入鋼盆中，以打蛋器混合攪拌。
2.   把高筋粉加入(1)，全部一起混合攪拌。
3.   直到沒有粉末狀時加入揉麵用的牛油，並揉成一團。
4.   取出麵糰放在枱面，用手掌擠壓揉搓到光滑柔軟即可。
5.   把麵糰以保鮮紙覆蓋住，在30度左右的溫暖處放30分鐘作第一次發酵，再把麵糰移入雪櫃放置30分鐘。
6.   取出，用手擠壓麵糰以排除空氣。
7.   用搟麵掍把麵糰伸展攤開到20cm左右的正方形。
8.   從雪櫃取出摺疊用的牛油，斜向放在麵糰中央，然後把四角合起。
9.   用手握起四角的邊線，緊緊挰合。
10.  以擀麵掍擀開麵糰成10x30cm的長方形。如果牛油太硬時，以擀麵掍從上面壓下。
11.  先把接縫處朝向內側，把麵糰摺成三摺，首先摺上面1/3。接著摺下面1/3，把麵糰摺成3摺。
12.  用塑袋包起麵糰，在雪櫃放置30分鐘。
13.  麵糰的方改變90度再重複(10)、(11)、(12)的步驟後，以膠袋包起麵糰再度放進雪櫃冷藏30分鐘，這道手續需反覆再作一次。
14.  把麵糰方向改變90度，以擀麵掍輕輕擀開為15x55cm的長方形。
15.  以刀切成底邊長8-10cm的二等邊三角形。
16.  用手拿起切好的三角形，輕輕拉長。在底邊的中央切2cm的切痕。
17.  在最初第一捲要壓緊，之後即輕輕捲起。
18.  在摺疊牛油時，如果牛油從麵糰滲出黏黏的液狀，此時要立刻把麵糰放入雪櫃冷郤。
19.  把成形的麵糰並排在舖有烤盤紙的烤盤上，以保鮮紙覆蓋，在30度左右的溫暖地方放置40分鐘，膨脹到二倍大，進行第二次發酵。
20.  第二次發酵完成，在麵糰的表面抺上蛋汁。
21.  放入預熱到210度的焗爐，焗12分鐘左右。

後記： 第一次整要用牛油摺疊的麵糰，真係要好多時間。第一次發酵本應只放雪櫃30分鐘，但因要整第二樣嘢，所以發酵咗一個鐘先取出，麵糰經過發酵，比較難擀薄，到最後麵糰最表面嗰層都穿咗，有牛油漏出。焗包時見到麵糰夾層啲牛油漏晒出嚟，吔！吔！吔！咁啲牛油咪side晒囉。牛角包口感梗係無街賣嗰啲咁脆，但叫做自己親自整過，了解咗個程序，咁下次希望整酥皮時會整得好啲。