綠茶紅豆卷

綠茶紅豆卷 (食譜參考自好吃的西點蛋糕祕訣 – THE SWEET TRICK)

材料： 蛋黃72g.    糖9g.    蜂蜜18g.    低筋麵粉38g.   綠茶4g.    牛油9g.    牛奶21g.    蛋白96g.    糖39g.   

做法：
1.            把蛋黃和白砂糖一起混合，慢慢加入已加熱到40度的蜂蜜，攪拌到變白。
2.            在另一缽中把蛋白打發起泡。開始打發時將白砂糖分3次加入。
3.            在(1)中加入(2) 的半量，用膠刮刀輕輕混合，再加入過篩的低筋麵粉和綠茶粉，再把(2)的剩下半量加入混合。
4.            在(3)中加入已熱至溶和之牛油和牛奶。
5.            把(4)倒入鋪有捲紙的烤盤上，放入180度的焗爐中焗12分鐘。之後從焗盤中取出蛋糕體放置在網上至涼。

紅豆忌廉餡料：   淡忌廉100g.   糖粉13g.   紅豆蓉約50g

作法：
1.   淡忌廉加糖粉打至8成發，加入紅豆蓉拌勻
2.   將冷卻後的蛋糕片蓋上一張保鮮紙後翻起，除掉鍚紙。再將紅豆忌廉餡全部抺在蛋糕片上，塗抹均勻後捲起，用保鮮紙包緊放雪櫃雪凍即可。

後記：呢排因為瑞午節的關係，粽就食咗好幾隻，所以都好耐無整蛋糕喇，而上次整的咖啡杏仁曲奇都食咗差不多成2個星期先食晒。今次參考呢個整呢個蛋糕卷係因見到本書的蛋糕卷真係整得好靚好吸引。材料百份百跟到足原食譜(應該話係95%跟足，我改咗做綠茶蛋糕體)，因平時蛋的份量我都盡量用晒，幾多隻蛋黃就幾多隻蛋白唔好嘥。今次呢個食譜蛋黃份量要成5隻和約3隻多啲啲嘅蛋白，但蛋糕體焗完出嚟口感較鬆化啲，以前啲蛋糕卷口感係比較韌小小。雖然這次係用分蛋法，但焗出嚟個面都無爆裂，同埋啲色重好似靚啲添。

就係睇見本書的蛋糕卷，靚到吖，即時想整，不過成品梗係差好遠啦。

咖啡杏仁曲奇

咖啡杏仁曲奇(食譜參考自西式甜品一書)

材料： 牛油114克.   砂糖45克.   低筋麵粉165克.    杏仁片30克.    即溶咖啡1湯匙.    熱水1湯匙

做法：

1.  麵粉篩勻待用，杏仁片預先焗香。用熱水先調溶即溶咖啡
2.  牛油與糖打至奶白色成忌廉狀
3.  將咖啡溶液分次加入牛油中打勻

4.  麵粉加入牛油拌勻(不要過度攪拌)，下杏仁片拌勻成粉糰，先雪片刻，再將粉糰放入保鮮紙中整成長條狀，放冰格雪至硬

5.  將粉糰取出切成一塊塊，放入已預熱的焗爐用170 度焗8 分鐘後，轉150度焗多12分鐘即可。

後記：上次整呢隻曲奇已差不多一年前，見咁耐無整又整吓嚟食。上次個名叫脆片，今次改返做曲奇，因上次是在盒中壓實整形，曲奇口感比較是硬脆。今次只係切拌均勻後整成長條形，焗出嚟口感比較鬆脆。咖啡和杏仁的組合係我另一至愛。

香蕉合桃戚風蛋糕

香蕉合桃戚風蛋糕 (6吋模)


材料：   蛋白3個.   金黃幼沙糖 40克.   菜油18克.   奶36克.   低筋粉56克.   粟粉4克.   發粉2克.       蛋黃3個.  金黃幼沙糖10克.   香蕉茸100克.   合桃碎30克.

做法：

1.        預熱焗爐180度，低筋粉、粟粉和發粉先篩好。香蕉先壓成茸。合桃碎先焗香。

2.        蛋黃加10克糖打至混合，再加入香蕉茸、菜油及奶拌勻。

3.        蛋白加入40克糖，打到企身。

4.        將粉類加入(2)拌勻，再將1/3的蛋白加入裏面，用膠刮拌勻後再將剩下的蛋白加入切底拌勻，最後加入合桃碎，入模。拿起模dun兩下。入爐，焗35-40分鐘(如中途覺得蛋糕面太焦，可蓋鍚紙)。出爐後馬上倒扣。

後記： 上次留咗2隻香蕉整戚風蛋糕，點知原來只需要1隻，剩返1隻好熟嘅香蕉，為有再整多次。為咗唔想整一模一樣，所以將糖改用另一種金黃幼沙糖，和加多咗合桃碎。香蕉茸比上次多咗10克，咁就令到個蛋糕口感變得重身咗，雖然都重好軟熟，但就唔係輕軟喇。所以下次唔好咁貪心，要適可而止。

蕉戚風蛋糕

蕉戚風蛋糕 (6吋模)


材料：   蛋白3個.   糖 45克.   菜油28克.   奶38克.   低筋粉56克.   粟粉4克.   發粉2克.     蛋黃3個.  糖15克.   香蕉茸90克

做法：

1.            預熱焗爐180度，低筋粉、粟粉和發粉先篩好。香蕉先壓成茸。
2.            蛋黃加15克糖打至混合，再加入香蕉茸、菜油及奶拌勻。
3.            蛋白加入45克砂糖，打到企身。

4.                      將粉類加入(2)拌勻，再將1/3的蛋白加入裏面，用膠刮拌勻後再將剩下的蛋白加入切底拌勻，入模。拿起模dun兩下。入爐，焗35-40分鐘(如中圖覺得蛋糕面太焦，可蓋鍚紙)。出爐後馬上倒扣。

*糖的總量可減5 - 10克

後記：很久之前整過香蕉戚風蛋糕，但出嚟效果麻麻，因當時重未寫blog，無做記錄，已經唔記得個份量。今次個蛋糕口感十分軟熟，焗時已聞到好香香蕉味，當焗咗35分鐘取出，插入竹籤時並沒有粉漿黏著，應該己熟，取小小食時，覺得比較濕，所以再放入焗多5分鐘後，但蛋糕出嚟口感都差不多，相信應是水份多咗啲。糖的份量可再減10克，覺得甜咗啲。上次睇見網友話戚風蛋糕可以就咁搣出嚟，咁我又試吓，完來真係得架。

紅豆餅

紅豆餅(食譜參考麵麵俱到一書)

發麵材料：   低筋麵粉24g.  中筋麵粉96g(全用中筋120g).  泡打粉1.2g(無落).  黃豆粉2.4g(無落).  糖12g.  速溶酵母2g.  水64g   豬油2.4g(煮食油).   紅豆粒餡150g

做法：

1.          將麵粉放容器內，其餘材料放在中間，慢慢加入水，攪拌至乳化均勻。

2.          再將麵粉揉成糰，醒10分鐘。(今次無做這步驟，直去步驟3)

3.          再將發麵揉至光滑便可使用。(揉至光滑後麵團發酵30分鐘)

4.          將發麵糰分成每個約33g的份量，搟成大圓片。

5.         紅豆餡分每一個25g重，用皮包餡，做成包子狀，收口朝下，稍壓扁，搟開為直徑約6公分的餅，醒30分鐘。

6.          平底鍋燒熱，鍋底抺少許油(無抺油)，放入紅豆餅，蓋上鍋蓋，小火烙至兩面金黃。

後記：我見其他網友做中式包點麵團要先發酵，所以今次我試吓唔落泡打粉，等佢發酵30分鐘，睇吓有乜嘢分別。今次無落油去煎，剛剛煎好時個皮都好脆。無落泡打粉都食唔到有乜嘢大的分別。

藍梅醬卷

藍梅醬卷

蛋糕體(烤盤為26cm乘21cm)
材料：  低筋粉50克.  蛋2隻.  砂糖38克.  粟米油15克.   鮮奶25克.  藍梅醬適量

做法：

1.     烤箱預熱190度，烤盤鋪上鍚紙

2.      蛋加砂糖打至蛋漿呈濃稠狀態，先加低筋粉拌勻，再加入鮮奶和粟米油攪勻。

3.    將麵糊倒入烤盤中，輕敲幾下後入焗爐190度約焗9分鐘，取出放在網架上，再用鑊蓋在上罩著(用作保濕)，要留番小小梳氣位，然後放至涼透。

作法：
1.    將冷卻後的蛋糕片蓋上一張保鮮紙後翻起，除掉鍚紙。再將藍梅醬抺在蛋糕片上，塗抹均勻後捲起，用保鮮紙包緊後放雪櫃雪凍即可。

後記：之前將低粉加入蛋漿部份時都是先用手動打蛋器攪拌，之後才用膠刮攪勻底部的材料，今次嘗試全程都用膠刮攪拌都覺得可以，無令到大量消泡。今次低筋粉篩得未夠，結果焗出嚟重見到有小小一細粒一細粒的粉狀結粒。我將爐溫減低10度，試試較果，覺得如再焗多1分鐘會好啲。

杏仁曲奇

杏仁曲奇 (食譜TPC復活日記)

材料:    牛油100g.    砂糖75g.    細蛋1隻(約45g).    低筋麵粉200g.    杏仁粒67g.

做法:
1.      杏仁粒先用140度烘烤10分，放涼後泡水3分瀝乾備用..
2.      牛油加糖打發，分次加入蛋液，續加入粉類攪拌均勻，最後再加入杏仁粒拌勻
3.       將麵糰整成長條狀，用保鮮紙包起後放冰格冰硬後取出切片
4.      切好後排在鋪了烘焙紙的焗盤上，170度焗10分轉150度再焗10分鐘即可.

後記： 雖然只是簡簡單單的曲奇，但當你食過自己整的曲奇後，你會發覺超市或街賣的乜罐物罐曲奇簡直無得比。原食譜的做法是先將杏仁粒用150度焗25-30分鐘至熟，但我用140度焗10分鐘己經部份變燶，可能大家用的焗爐不同(TPC復活日記係用美式焗爐)，係唔係真係會相差咁遠呢。對於要先雪硬才切的曲奇，每次都未能切得靚靚咁，因好多時都會令到曲奇斷裂(我用菜刀)，要用手令佢再組合埋一齊先得，又時時切到厚薄不均。