焦糖布丁蛋糕

焦糖布丁蛋糕(食譜克萊兒的點心小棧)

(6吋模份量)
 
焦糖材料：   砂糖30g.   水10g.

做法：  直接用玻璃兜將砂糖和水用小火煮至焦糖色，熄火代涼凝固

布丁蛋液材料：   砂糖25ｇ.   全蛋3隻.    牛奶230ｇ.   雲呢拿香油數滴

做法：  蛋用打蛋器打散加香油攪勻，牛奶和糖用小火煮溶，沖倒入蛋液中攪勻放涼

蛋糕體材料： 
1.   低筋麵粉50g.  蛋黃3隻.   牛奶50g.   牛油45g
2.   蛋白3隻.   細砂糖30g.   

做法：

1.   牛油加熱融化，熄火，篩入低筋麵粉拌勻，蛋黃分次加入用橡皮刀拌勻，牛奶也分次倒入拌勻(如加蛋黃時比較難拌勻，可將盤放在已熄火的熱水上，這樣比較容易拌勻)

2.   蛋白打至發泡，分次加入砂糖，繼續打發到中性發泡（提起攪拌頭，蛋白泡呈略為彎曲狀但不會滴落），用橡皮刀把蛋黃麵糊輕輕拌入蛋白泡中，攪拌均勻。

3.   把布丁液過濾倒入已凝固焦糖的玻璃兜，再把蛋糕麵糊倒在布丁液表面。用橡皮刀輕輕撥平麵糊表面，把玻璃兜個放進另一個大烤盤裡，在烤盤之間注入熱水，水量高度以稍為高過布丁為佳，如此放進焗爐隔水焗約40分鐘即可。等蛋糕降溫時即可脫模。脫模時可用細薄的刀輕輕沿著烤盤四周刮一圈，翻轉倒扣即可扣出（要小心焦糖灑出來）。

4.   爐溫170°C，蒸焗至表面上色，轉成150°C繼續烤到熟（假如表面繼續快速上色甚至裂開，可將爐溫轉至更小），以竹籤插入不沾麵糊即可。

         

 

後記：  聖誕本來諗著整聖誕麵包、聖誕蛋糕或聖誕曲奇嚟應下節，不過唔知點解樣樣都得個想字，終於只係整咗個焦糖布丁蛋糕出嚟。相信最主要原因都係材料簡單，樣樣都有，唔需要再去買。
呢個蛋糕上次整係約一年前阿媽嘅生日，當日蛋糕大受好評。平時因各兄弟姐妹都分散各地，好難咁人齊，可以聚首一堂(咁人齊另一原因是阿爸剛過身)。佢地有啲都係第一次食我整嘅蛋糕，可能覺得出奇，我真係會整到一個似模似樣嘅蛋糕啦，所以都十分比面，讚口不絶。轉眼又一年，都未知幾時會咁齊人再聚，不過梗係希望係喜慶事啦。

牛奶方包(中種)

牛奶方包(中種)

中種麵糰材料：   高筋麵粉175g.      速發酵母1.5g.     水100g.  

做法：  搓到擴展階段，靜置1小時後(室溫15度)，放進冰箱低溫冷藏2日

主麵糰材料：   高筋麵粉75g.     速發酵母1.5g.     鹽2g.     牛油 25g.      糖 20g.     牛奶30g.   淡忌廉40g.

做法：
1.   除牛油外的主麵糰材料搓揉成糰後，加入中種麵糰，最後加入牛油搓至麵糰光滑。
2.   延遲發酵30分鐘後
3.   排氣，分割3份，每份約153g。滾圓，再鬆弛15分鐘
4.   桿捲2次放入模，最後發酵至約8倍。
6.   放入己預熱200度焗爐，焗約40分鐘，取出脫模放涼。

後記：  麵包無預先切開一片片，因屋企人鐘意厚切，好似台式多士咁，所以只係切咗第一塊嚟影相，紀錄番內部組織，剩低就比佢地自由發揮，鐘意點食就點食。今次麵包好軟熟，但稍放涼後，好似有少少收縮咁。
焗麵包時真係成屋都好香，香味好耐都唔散，好鐘意呢種感覺同香味，好溫馨咁。

彈彈波方包

彈彈波方包 (食譜綠萼)

材料：12兩方包模

高筋粉　    200g低筋粉　    50g速發酵母　4g糖　            20g鹽　            2g水　           160g牛奶　        40g牛油　        15g

做法：

1.    所有材料用麵包機打2次，發酵30分鐘，排氣後放入密實盒，放雪櫃冷藏。
2.    第二日取出，放至室溫，用膠刮把麵團取出，分割成3份，靚置10分鐘，桿捲2次，入模。
3.    發酵至八成滿，入爐。
4.    200度焗約35分鐘，取出放涼。

後記：   

跟據綠萼講麵糰十分黏手，好難用手搓，但又好想試下，所以要出動麵包機嚟整。用麵包機攪打2次，麵糰比較熱，第一次發酵30分鐘後，好快已發得好大。通常放工後都唔夠時間整成個過程，所以第一次發酵後就排氣，放入雪櫃，第二日再繼續。最後發酵到8成入爐，但今次200度焗咗35分鐘後，顏色好淺，驚住唔熟，所以焗多10分鐘，但顏色都無大分別。雖然整得唔靚，側面又多窿窿，但組織都尚算鬆軟。

麵糰己用麵包機攪打2次，不過作用都係不大，又要將佢暫時打入冷宮喇。

方包 (100%中種法)

方包 (100%中種法) 食譜妃娟北海道牛奶土司

材料：

A：
高粉 250g 
細砂糖 7.5g
速溶酵母 1.5g 
鮮奶 80g 
動物性鮮奶油 70g
蛋白 18g
牛油 5g

B：
蛋白 20g  (蛋24g)
細砂糖 37g
鹽 2g
速溶酵母 1g (1.5g)
奶粉 15g

C：
牛油 5g

做法：
1. 第1次搓揉：將A料搓揉至光滑，發酵3.25小時後，排氣翻面收口，放雪櫃12小時。(當時室溫約19度)
2. 第2次搓揉：將雪櫃取出的麵團放室內3小時後+B料搓揉至溶合，再加入C材料搓揉至麵團光滑有筋性
3. 延續發酵20分鐘
4. 排氣，分割，滾圓，再鬆弛15分鐘
5. 桿捲2次放入模，最後發酵至約8倍。
6. 放入己預熱190度焗爐，焗約35分鐘熄爐，再等5分鐘後取出脫模放涼。

後記：  今次終於完成我第一次嘅方包，好開心，倒出嚟時好緊張，唔知會係點。會唔會唔滿模呢，又會唔會未熟。好彩，就咁睇外表，雖未係完美，自己都收貨。麵包放涼時就已聞到好香，但食時就唔係好覺，甜甜地咁，等到第二日食時都仲好軟熟。
呢個食譜的材料A，搓咗好耐都唔係好光滑。反而覺得平時只加水的麵糰係比較好搓，雖未試過搓到薄膜，但都會好快有筋性和光滑。第一次捍捲就比較難掌握所要求的長度，唔知要幾長，捲完要解開再捲過。  

八分滿入爐

反轉底部

牛奶麵包 (100%中種法)

牛奶麵包 (100%中種法) 食譜妃娟北海道牛奶土司 

材料：

A：
高粉 250g  (錯用低粉)
細砂糖 7.5g
速溶酵母 1.5g 
鮮奶 80g (86g)
動物性鮮奶油 70g  (66g)
蛋白 18g (26g)
牛油 5g

B：
蛋白 20g (蛋16g)
細砂糖 37g
鹽 2g
速溶酵母 1g (1.5g)
奶粉 15g

C：
牛油 5g  

做法：

1.    第1次搓揉：將A料搓揉至光滑，發酵1小時後，放雪櫃17小時。
2.    第2次搓揉：將發好的A料+B料搓揉至溶合，再加入C材料搓揉至麵團光滑有筋性即可
3.    延續發酵45分鐘
4.    排氣，分割，滾圓，再鬆弛15分鐘
5.    再滾圓，放入模，最後發酵至約2.5倍。
6.    放入己預熱180度焗爐，焗約13分鐘。

後記：  好失敗，本來諗住終於的起心肝整第一次嘅土司，所有要用嘅材料都預備好，點知到搓揉麵團時，點解麵團搓極都好碎咁，先發覺用錯低筋粉。結果梗係整唔成土司，又唔想嘥咗啲材料，都唔理咁多，照樣整成麵包。最激氣係，個仔話用低筋或高筋嚟整都無乜嘢大分別啫。佢咁講，真係打消咗我一路都諗住買部正式的麵粉攪拌機嘅想法，原來我整嘅麵包只不過係咁，用乜嘢粉都係無分別嘅。

蘋果批

蘋果批 (18 cm)

材料：
批皮： 牛油 150g.  低筋麵粉 240g.   砂糖70g.   蛋 40g.

做法：　

1. 牛油和低粉，輕輕用手指搓至麵包糠狀，再加入糖拌勻。倒入蛋醬，稍微拌至呈團狀即可，不要過度攪拌。
2. 覆蓋保鮮紙，放進雪櫃雪至少1個鐘至完全冰涼。
3. 取出麵糰，稍為按壓，分成2份，桿成圓形薄片，放進派盤，整理服貼之後。用叉子在批皮上刺孔，另一張麵皮也桿成一樣大小。
4. 將放涼後的餡料倒入批盤裡鋪平，蓋上另一張批皮，將多出來的批皮切去。在蓋好的批皮中刺孔，然後用叉子在批皮邊緣壓出紋路。
5. 小量蛋漿加水拌勻，掃在批皮上。
6. 放已預熱180度的焗爐底層焗30分鐘。至表面金黃色，取出脫模放回焗爐只用底火150度再焗10分鐘，便可取出放在網架上待涼。

蘋果餡材料：  蘋果3顆切粒.  砂糖 80g.   粟粉 1小匙.   肉桂粉1小匙.  牛油30g.   檸檬汁半個

做法：煲內放入蘋果粒，混合砂糖、粟粉及牛油拌勻，煑至蘋果淋身，最後將肉桂粉和檸檬汁倒入拌勻即可放涼備用。

後記：  今次餡料用咗3個蘋果，份量剛好，不過自己稍覺甜咗啲，但個仔話OK。焗批自己通常都會將焗好的批脫模後再放回焗爐用底火焗多一陣，可令成個批皮都咁鬆脆。