栗子餡麵包 (17小時中種)
中種麵糰材料: 高筋麵粉140g. 速發酵母1g. 水90g.
做法: 搓到擴展階段,靜置15-30分鐘後,放進冰箱低溫冷藏17小時
主麵糰材料: 高筋麵粉60g. 速發酵母1g. 鹽少許. 牛油 20g. 糖 20g. 奶粉8g. 水10g. 蛋液30g.
做法:
1. 除牛油外的主麵糰材料搓揉成糰後,加入中種麵糰,(17小時低溫冷藏發酵),最後加入牛油打至完成階段。
2. 延遲發酵30分鐘後
3. 中間分割,分割成6份,約58g。發酵20分鐘,包餡(每份30g)做型,再發酵至約2倍大,掃上蛋液(份量外)入爐。
4. 180度焗約12分鐘。取出放涼。
後記: 呢排見到街市開始有栗子賣,又買咗2磅返嚟,買己去殼嗰啲。一半用嚟整我自己幾鐘意食嘅栗子炆豬利(不過唔係我煮),一半留返嚟睇下可以整乜。可能初初出,多數都係桂林錐,之前通常買大粒啲嗰種,唔知乜名。今次試下呢隻,原來桂林錐好快淋,差不多半個鐘已淋到自己火爆開。不過覺得平時買開大粒嗰啲甜啲有栗子味啲。
栗子餡只係將栗子煲淋後壓爛,加啲糖和少少植物油煮一陣,放涼後用。
本來全部都諗著整成蟲仔形狀,但可能餡多咗啲,好難收口,驚焗時會爆開,所以後尾只簡單收口做形。
有少少揀栗子資料擇取自蘋果日報,如下:
揀栗子要揀深棕色皮薄、大粒就最好。而栗子有分公和,前者全扁形;後者扁圓狀,較粉甜,比公栗更適合做菜。
有殼:天然新鮮,輕敲栗子殼,感覺殼肉分開就屬佳品。保存期約 3至 4日。而新鮮栗子亦可自製成茸,只要煮熟栗子後以攪拌機打爛,加少許水會更滑。
有衣:適合煲湯或燜煮,去衣方法簡單,先以熱水稍灼,再用小刀去皮。街市售賣的栗子大部份已去殼,但留下的栗子衣卻不易褪去,只要將栗子放在沸水中煮約兩分鐘,便可輕易把衣撕掉。
無衣:一般真空包裝,內附防腐劑,影響肉質,味道亦較其他栗子淡。
罐頭栗子茸:一般超巿都會有售,多為用作整甜品,因為已調味,方便易用又可保存得耐。