栗子餡麵包 (17小時中種)

栗子餡麵包 (17小時中種)

中種麵糰材料：   高筋麵粉140g.      速發酵母1g.     水90g.  

做法：  搓到擴展階段，靜置15-30分鐘後，放進冰箱低溫冷藏17小時

主麵糰材料：   高筋麵粉60g.     速發酵母1g.     鹽少許.     牛油 20g.      糖 20g.     奶粉8g.     水10g.     蛋液30g.

做法：
1.   除牛油外的主麵糰材料搓揉成糰後，加入中種麵糰，(17小時低溫冷藏發酵)，最後加入牛油打至完成階段。
2.   延遲發酵30分鐘後
3.   中間分割，分割成6份，約58g。發酵20分鐘，包餡(每份30g)做型，再發酵至約2倍大，掃上蛋液(份量外)入爐。
4.   180度焗約12分鐘。取出放涼。

後記：  呢排見到街市開始有栗子賣，又買咗2磅返嚟，買己去殼嗰啲。一半用嚟整我自己幾鐘意食嘅栗子炆豬利(不過唔係我煮)，一半留返嚟睇下可以整乜。可能初初出，多數都係桂林錐，之前通常買大粒啲嗰種，唔知乜名。今次試下呢隻，原來桂林錐好快淋，差不多半個鐘已淋到自己火爆開。不過覺得平時買開大粒嗰啲甜啲有栗子味啲。
栗子餡只係將栗子煲淋後壓爛，加啲糖和少少植物油煮一陣，放涼後用。
本來全部都諗著整成蟲仔形狀，但可能餡多咗啲，好難收口，驚焗時會爆開，所以後尾只簡單收口做形。
有少少揀栗子資料擇取自蘋果日報，如下：
揀栗子要揀深棕色皮薄、大粒就最好。而栗子有分公和，前者全扁形；後者扁圓狀，較粉甜，比公栗更適合做菜。
有殼：天然新鮮，輕敲栗子殼，感覺殼肉分開就屬佳品。保存期約 3至 4日。而新鮮栗子亦可自製成茸，只要煮熟栗子後以攪拌機打爛，加少許水會更滑。
有衣：適合煲湯或燜煮，去衣方法簡單，先以熱水稍灼，再用小刀去皮。街市售賣的栗子大部份已去殼，但留下的栗子衣卻不易褪去，只要將栗子放在沸水中煮約兩分鐘，便可輕易把衣撕掉。
無衣：一般真空包裝，內附防腐劑，影響肉質，味道亦較其他栗子淡。

罐頭栗子茸：一般超巿都會有售，多為用作整甜品，因為已調味，方便易用又可保存得耐。

全麥紅莓曲奇

全麥紅莓曲奇

材料:  牛油75克.   砂糖45克.   蛋40克.   奶粉半湯匙.     全麥粉140克.    紅莓乾60克 

做 法:    
1.  所有粉類預先篩好，紅莓乾先用水略浸備用。
2.  將已軟化牛油加入砂糖打至忌廉狀。
3.  再分次加入蛋黄攪拌均勻後，加入麥粉及奶粉，最後加入紅莓乾攪拌均勻。
4.  成團後，放入膠袋搓成方柱型，放入冰格冷藏至硬身。
5.  取出麵糰切成一片片，放入已預熱170度焗爐，焗約10分鐘後轉150度焗多10分鐘或金黃即可。

後記：  好似好耐無整曲奇，其實今次呢個麵團係中秋節前已整好放冰格，諗著想食就可即時整，點知中秋節食月餅都食到滯，等到食晒屋企所有零食喇，先再有意欲去整嚟食。呢隻全麥粉本來買來整麵包，點知好似整過一次又擺咗係度，所以用埋嚟整曲奇。

椰子雪糕

椰子雪糕

材料： 
罐頭椰子汁200克.      牛奶100克.       淡忌廉250克.        糖50克.     椰絲適量

做法：
除椰絲外，將所有材料攪拌均勻至糖溶，便可放雪櫃過夜備用。第二日倒入預先冷凍的雪糕機攪拌25分鐘至杰，便可加入椰絲攪拌多一陳放冷凍儲存。

後記：  好耐好耐之前元朗大橋街市有啲賣椰子檔口，仲有鮮榨的椰汁賣，早排整椰汁馬豆糕時曾找過，而家一間都找不到。檔主建議我自己用椰子攪碎濾汁出嚟用，咁大工程，都係買罐頭算喇。

淋柿雪糕

淋柿雪糕

材料： 
去皮淋柿280克.      牛奶100克.       淡忌廉200克.      糖70克       vanilla extract 1/4茶匙

做法：

1.     將淋柿加入牛奶及糖放攪拌機打成茸，
2.     再將淡忌廉及vanilla extract加入，全部材料拌勻，便可放雪櫃過夜備用。第二日倒入預先冷凍的雪糕機攪拌25分鐘至杰便可冷凍儲存。

後記： 
先生同個仔問點解咁耐都唔整雪糕嘅，本來真係諗著暫停整雪糕，因自從日日食雪糕後，唔覺唔覺咁就肥咗成4、5磅，5磅聽落好似好少咁，但試想下，如果係街市買5磅肥豬肉係幾咁驚人。仲要好似肥晒係肚腩度，今次真係有排先減得番。但佢地話咁你可以唔食格，而佢地就仲有QUOTA食，但整咗出嚟好難唔食，為有食少啲，做多啲運動啦。

中秋節無整月餅，所以揀咗淋柿嚟做雪糕應下節，顏色好靚，好似芒果咁色，味道都唔錯。祝大家中秋節快樂。