奶香小酥餅

奶香小酥餅 (食譜：君之手工烘焙坊)

材料：     低筋粉200g.    牛油80g.    糖粉80g.    雞蛋1隻.    奶粉1大匙.    椰漿粉2大匙

做法：
1.   將軟化的牛油打到發白，體積變大後，加入糖粉，攪打均匀
2.   分三次加入蛋液，每一次打匀後再加下一次。
3.   依次加入奶粉和椰漿粉，攪打均匀
4.   加入低筋麵粉，輕輕攪拌至麵粉全部濕潤即可。不要過度攪拌。
5.   取15g成一小塊麵糰，捏成圓形，再輕輕壓扁。在表面刷一層全蛋液。
6.   即可放入己預熱至170度的焗爐，焗約20分鐘，至表面金黃即可。

後記：

君之的幾款曲奇餅都整得好靚，材料仲好簡單添。原本想整到佢個做形咁，小小圓柱體，唔知點解，搓搓吓又變咗小圓餅咁。原食譜只落1大匙椰漿粉，但諗著一包有成50g，唔知下次幾時先用，所以落多1大匙。

呢個餅真係同個名一樣，食落好香奶味，個仔都話好味，不過轉頭佢都係又要我整佢至愛嘅果醬曲奇。不過因已做過多次，所以就唔再post個成品出嚟喇。

雪花麵包

雪花麵包(食譜君之的手工烘焙坊)

材料：  高筋粉150g.   水75g.   雞蛋15g.   砂糖25g.   牛油15g.   即溶酵母1小匙.   監1/4小匙.

雪花酥蓉材料：   牛油1大匙.   砂糖1大匙.   低筋粉2大匙

雪花酥蓉做法：

將軟化的牛油、砂糖和低筋粉全部倒入碗內，捏成團。然後，把麵團用篩壓過，即可得到雪花酥蓉。

做法：
1.  將乾性材料放入鋼盆中，以手稍微混合均勻。
2.  將2/3液態材料倒入盆中以手混合均勻後，再加剩餘1/3混合均勻。
3.  取出搓成較不黏手的麵糰時，將麵糰壓平，然後把牛油放在麵糰中間均勻抺平。直到麵糰光滑，用手小心地抻開麵糰，能抻出一張比較容易破裂的薄膜(擴展階段)。
4.  將麵糰滾圓放入容器中進入基本發酵至2.5–3倍大(今次用咗約2小時)。
5.  取出排氣，分割成6份(每份約46g)，滾圓靜置待發酵約20分鐘。至約1.5倍大。
6.  醒發好的麵糰，再次滾圓，排入烤盤。在麵糰表面刷上一層牛油，然後撒上雪花酥蓉，進行最後發酵，約50分鐘，發酵到2倍大。

7.  放進己預熱180度焗爐，焗約12分鐘左右，烤至表面深黄色即可。

後記：  

初次溜覽君之係sina的網誌，雖然自己對簡體字唔係好孰識，睇得比較慢，有啲字又要估估吓，但都如獲至寶。佢所有制成品都有詳細圖解和程序，睇完己急不及待即刻整咗2種佢嘅出品。

首先揀呢個雪花麵包，因佢只需要搓至擴展階段就得，而君之亦整得好靚，想像自己都會整到咁靚，點知整雪花酥蓉遇到啲困難，整咗2次都係一舊舊，而唔係好似佢咁比較碎粒。咁我呢個係唔係應該改名做雪球麵包哩。之後自己再反覆思量，我兩次都係將雪花麵糰全部過篩才用，所以一舊舊，係咪應該每次見到壓咗小小出嚟就要刮咗出嚟先，然後又壓小小再刮出剩餘嗰啲呢，下次有機會再試。

椰汁紅豆糕

椰汁紅豆糕(食譜蘋果動新聞)

材料：       紅豆250g.      椰汁400毫升.      水1200毫升.     花奶130g.     砂糖250g.     鹽少許.      粟粉100g.       大菜絲 12g.

做法：

1.          將紅豆洗淨浸水4小時或過夜。然後放入沸水，以中火煮滾10分鐘，再熄火加蓋焗10分鐘，重複4次至紅豆腍，備用。
2.          預先浸4小時的大菜絲加入水中，以中火煮至完全溶透，再加入糖。

3.          椰汁加入花奶、粟粉開勻，然後加入大菜水中，不停攪拌，以細火煮沸至稠身，下紅豆、鹽拌勻。

4.          放入容器內，雪至凝固，扣出切件即可。

後記：  今次咁樣煮及焗紅豆真係好粉同埋唔會爛，好正。我用埋煲紅豆啲水嚟整，所以成舊糕都係紅豆色。原食譜按比例，紅豆只落100g，但我地勁鐘意食紅豆，所以用咗250g嚟整。而糖嘅份量落得比食譜多，但出嚟都唔係好甜，最好先試味先，喜甜的可再加。第一次用粟粉加大菜絲整糕點，口感唔錯。

報紙貼士：

紅豆點樣先可煲到又腍又起沙？

1.          紅豆最好浸一晚。

2.          煲紅豆時千萬不要加任何糖或鹽。

3.          以半焗半煮方式，這樣紅豆就腍到入心。

香蕉吐司

香蕉吐司(食譜天然、無添加的手作麵包)

材料：           

               

做法：
1.          將乾性材料A放入鋼盆中，以手稍微混合均勻。
2.          將2/3液態材料B倒入盆中以手混合均勻後，再加剩餘1/3混合均勻。
3.          取出搓成較不黏手的麵糰時，將麵糰壓平，然後把牛油放在麵糰中間均勻抺平。繼續搓至表面光滑成為稍透明的薄膜狀即可。
4.          將麵糰滾圓放入容器中進入基本發酵至2.5 – 3倍大。
5.          取出分割成2份，滾圓靜置待發酵至1.5 – 2倍大即可。
6.          將分割發酵後的麵糰以擀麵棍擀平，再捲起呈長條狀靜置一旁。
7.          2條麵糰以交叉旋轉方式成型。
8.          將成型好的麵糰兩端握緊，然後放入容量為450g的吐司模中。
9.          待麵糰發酵至八分滿時，表面均勻刷上全蛋液，即可烘烤。

後記：  好耐好耐無整過麵包喇，今次仲係第一次整吐司添。最近係網上成日睇到龐多米，真係好想試吓整，但知道用手搓係好難做到佢嘅標準，所以試吓其他款式先。之前曾試過想用手搓到有薄膜，結果搓咗成個鐘，搓到自己頭暈暈，虛脫咁制(唔係講笑)，都係搓唔到，所以咁耐都唔想整。但最近見到咁多網友整得咁靚，自己又再想試吓，仲特登買咗個吐司模添。
知道自己無可能用手搓到薄膜，所以今次唔會再咁高要求，約莫咁上下就停手。知道第一次發酵一定要有2.5 – 3 倍大，就好有耐心咁等。唔知係咪酵母本身問題，原食譜用50分鐘就可發到佢個要求，而自己就要用3倍有多嘅時間先去到咁嘅體積。靜置時間都要加長，到最後入模發酵，本應要發酵到模的八分滿，但等唔到咁耐，再等就唔洗瞓喇，所以只去到約7分滿模就放入爐焗。雖然無預期中咁鬆軟，應最後發酵發得不夠，但老化情況比預期中好，到第三日都keep到軟熟，可能因有香蕉係材料中。
書中有教我地呢啲無上下火嘅焗爐，可將上下火溫度加理除2嚟焗，仲可在焗緊嘅中途開小小門來降底上火爐溫。我都有依佢嘅方法，仲係中途加上錫紙蓋面，但麵包面都係比較燶，麵包身嘅顏色就幾靚，如下次焗有蓋吐司，應可用返200度這爐溫試吓。咁仲有就係麵包最好唔好出爐就食，最少都要等2小時後，唔係對個胃唔係咁好。之前我仲最鐘意就係食新鮮出爐嘅麵包添。放涼2小時後就可入袋保存。

仲考慮緊好唔好買部Kitchen Aid呢，又驚買咗返嚟唔會成日用。

搓到這程度加牛油

滾圓，第一次發酵前

第一次發酵完

分剖靜置   

分割靜置發酵後

捲起呈長條狀靜置一旁

2條麵糰以交叉旋轉方式成型

發至約7分滿模入爐，收口收得不好，收口爆開。