阿拉棒

阿拉棒 (食譜君之)

材料：   低筋麵粉130g.     雞蛋45g.    糖粉30g.     牛油10g.

做法:
1、  牛油軟化後加糖粉和雞蛋混合在一起，稍微攪拌一下，不要打發。然後，倒入低筋麵粉，搓成麵糰。
2、  搓好的麵糰是比較乾的，又不會太濕軟。(有需要時可略調整一下麵粉的用量，以保証搓好的麵糰能夠成糰。)搓好之後，静置鬆弛半小時。
3、  把鬆弛好的麵糰檊成厚度约0.5CM的長方形麵糰。
4、  把檊好的麵片，用刀切成一條條的長條。
5、  兩手拿起一根麵條的兩端，扭幾圈，再放到焗盤上，刷上全蛋液。
6、  放已預熱180度焗爐，焗约20 - 25分鐘。焗到表面金黄色即可。

後記： 呢款曲奇材料簡單，仲好有口感，低油及低糖，用嚟做下午茶點，食多幾條都唔怕。係製作時最難部份係將扭好的麵條放上焗盤後定形，多數扭紋都會返番轉頭，到你取起再扭多幾扭，佢又會變得長咗及幼咗。真係好難整到好似君之咁條條一樣。

鮮果忌廉蛋糕

鮮果忌廉蛋糕(6吋模)

海綿蛋糕：

材料：    低筋粉68g.      蛋3隻.      糖58g.      牛油20g.

做法：

1.    把蛋和砂糖一起打發到企身。
2.    將篩過之低筋麵粉加入，用膠刮刀混合，
3.    再將溶化的牛油和(2)混合，攪拌均勻即可。
4.    將麵糊倒入鋪有牛油紙的圓形模中，放入已預熱165度的焗爐中焗約30分鐘或竹籤插入不黏即可。取出倒扣放涼後切開成3片備用。

忌廉餡料： 淡忌廉350克.    糖粉35克.      切片草莓及罐頭桃適量

組合：先將一片切開的蛋糕面抺上忌廉，然後在其上放上切片草莓及罐頭桃，再抺上忌廉，蓋上另一片，再重覆做餘下的蛋糕片。將其餘的忌廉塗抹在蛋糕面及四周至均勻即可，最後放上草莓作裝飾。

後記：  抺忌廉嘅蛋糕對我嚟講真係好難整得靚，未整已經好緊張，因呢個係我整比個仔嘅生日蛋糕。自從佢出外讀書後，已經有6年無同個仔一齊係佢生日同佢慶祝，之前真係年年都會係生日一齊食蛋糕嚟慶祝。今次咁梗係好比心機去整啦，不過都係整得好差，忌廉抺極都一忽忽，之後仲發現打忌廉時唔記落糖，幾驚蛋糕變得淡荗荗呀，好彩食落都唔係好覺，因忌廉只係薄薄一層。唔知點解，生日都係要食忌廉蛋糕先似係生日蛋糕。

後補：  剛剛先醒起，生日蛋糕連生日快樂塊牌都唔記得放上去。真係好失敗呀呢個媽咪。

糯米番薯紅豆餅

糯米番薯紅豆餅

材料：   黃番薯250g.   糯米粉100g.  水適量.    紅豆茸適量

做法：
1.          先將番薯去皮切塊蒸至淋身，壓爛。
2.          襯熱加糯米粉搓勻，一邊加入適量水份，直至搓至適合柔軟度(可試包餡而麵皮不破爛為可)。

3.          取一份麵皮壓扁，包入適量紅豆茸，將收口放係底，落鑊煎至兩面金黃即可。

後記：  又煲咗大半斤紅豆嚟整紅豆茸。所以又要搵吓有乜好整，見到人地網誌用番薯嚟整糯米餅皮，不過無食譜，咁自己都試吓整，材料都係估估吓。唔知係咪無落澄麵，定係唔係好夠糯米粉，口感唔夠煙un，比較淋。整呢類中式小食已無太刻意量度每一個的份量，比較隨意，大小小和細小小都無太大問題，只要煎熟就得。今次啲番薯都唔甜，加咗落糯米粉度，都唔係好覺有番薯味。

焦糖布丁

焦糖布丁

焦糖材料：   砂糖50g.   水20g.

做法：   砂糖和水用小火煮至焦糖色，再倒入在杯模內凝固

布丁蛋液材料：    砂糖25ｇ.   全蛋2隻.    牛奶175ｇ.   淡忌廉40g.  雲呢拿香油數滴

做法： 

1.          蛋用打蛋器打散加香油。牛奶加糖用小火煮溶，加入淡忌廉拌勻，倒入蛋液中攪勻，過濾後倒入有焦糖的杯模中。

2.          焗爐預熱至150度，把模放進另一個大烤盤裡，在烤盤之間注入熱水，放進焗爐隔水焗約15-20分鐘，或見蛋漿開始凝固即可關火。

後記： 焦糖布丁真係簡單易做和好好味，今次份量預得唔係好準，分咗3杯後，布丁部份每杯得好少，所以好快己凝固。網上亦見到有食譜可用微波爐整，用解凍食物制，先叮6分鐘，睇睇凝結程度，再每次加叮1分鐘直到布丁成形，杯模當然要唔好咁大啦。睇落好似仲容易咁，下次真係要試吓先。

蛋卷

蛋卷(食譜參考TPC復活日記)材料:    牛油50g.    砂糖65g.     蛋2隻.     低筋粉55g.     香草粉小小.    鹽小小

做法:
1.   低筋粉過篩
2.   將牛油、砂糖、鹽攪打至糖溶化
3.   分次加入蛋液攪拌均勻後續加入粉類拌勻
4.   攪拌均勻後，將蛋卷模加熱後放入一小匙麵糊，合上模壓實，烘烤至熟，趁熱捲起，待涼即可。

後記：  自己好少去上海街嗰頭，今次咁arm要去嗰度附近，所以特登走去上海街一行，終於都比我買咗想要好耐嘅蛋卷模喇。等咗咁耐都仲係賣$100，無減過價。用蛋卷模真係方便好多，不過仲未好識因時間，整得比較燶，好似朱古力咁。今次整原味，下次會試吓整其他口味。