紅莓小蛋糕

紅莓小蛋糕

材料: (9小個)

牛油50g.   砂糖50g.   蛋1個.  麵粉100g.   泡打粉1小匙.   牛奶60g.   紅莓乾40g

做法:
1. 預先將紅莓乾用水略浸。
2. 牛油軟化後和糖放盆中充分打勻變白。
3. 蛋液分次加入打勻，加入半量牛奶攪拌。
4. 麵粉及泡打粉混合過篩後加入拌合均勻後，再將餘下的牛奶拌勻。
5. 最後紅每乾也加入混合後，分別倒入9個紙模至7分滿。
6. 放已預熱烤箱170度C烤20~25分鐘即可。

後記： 農曆新年前係灣仔買咗半磅$20嘅紅莓乾，所以差不多各種蛋糕都加入紅莓乾。小蛋糕食譜好易整，只要改放其他提子乾或果仁類，就可變出其他好味嘅小蛋糕。

紅豆椰汁慕士蛋糕

紅豆椰汁慕士蛋糕

海綿蛋糕:(6吋模) 

材料：  牛油10克 .   牛奶16克.    低筋粉50.    蛋2個.    糖40克.

做法：

1.        把蛋和白砂糖一起打發到企身。

2.        將過篩過之低筋麵粉加入，用膠刮刀混合，

3.        接著將部份(2)加入暖和的牛油和牛奶混合，再倒回(2)中攪拌均勻即可。

4.        將麵糊倒入鋪有牛油紙的圓形模中，放入已預熱170度的焗爐中焗約18分鐘或竹籤插入不黏即可。取出倒扣放涼後切開成2片備用。




紅豆慕士餡料

材料：  糖粉20g.  牛奶20g.  淡忌廉150g.   魚膠粉3g.  水20g.   紅豆茸100g,   椰子粉10g.   水20g. 

做法：

1.   淡忌廉加20g糖粉打至7分發備用，魚膠粉加20g水，隔熱溶解。椰子粉加20g水攪勻備用。

2.    紅豆茸先加奶和椰子粉水拌勻，再將暖的魚膠粉水加進攪拌。

3.    將已打起的淡忌廉加入攪勻

4.       先在模中放上蛋糕片，然後將部份紅豆慕士餡料倒落蛋糕片上至完全蓋上，再放上另外一塊蛋糕片，將餘下的紅豆慕士餡料全倒進掃平便可。放入雪櫃1小時至凝固。

後記：  今次整嘅海綿蛋糕係最鬆軟嘅一次，唔知係唔係因將蛋糕倒扣放涼的關係，下次要再試多次。而紅豆慕士今次落咗椰子粉，啲味道又幾好喎，整體上今次蛋糕口感整得幾滿意。蛋糕鬆軟，慕士都幾滑，呢個係我先生嘅評語。

香蕉紅莓乾鬆餅

香蕉紅莓乾鬆餅

材料：  低筋粉200g.  泡打粉2茶匙.   牛油 50g.   紅莓乾40g.   香蕉160g.   砂糖30g.   牛奶26g.   杏仁片小許.     奶(完成時用)少許
做法：

1.  預先將紅莓乾用水略浸及壓爛香蕉備用。
2.  將粉類先篩好，加入凍牛油粒，用手指把牛油和粉類碎至麵包屑狀。
3.  即可拌入香蕉溶、糖、紅莓乾及牛奶，用塑膠刀切伴至混合成糰。
4.  用切伴膠刀由下將麵糰剷起重疊在上後，再由上往下壓扁。重覆3至4次即可。
5.  用手整成圓形，用刀輕輕戒開麵團，掃上牛奶及放上杏仁片。 
6.  放入已預熱200°C焗爐，焗約25分鐘或竹籤插入沒有黏著物即可。

後記：上次整過香蕉提子鬆餅後，覺得好好味，諗著又整過，點知今次見二隻蕉都有部份爛爛地，咪唔好浪費，切咗爛嘅部份，用埋2隻蕉，咁就出事喇。麵團變得太濕，無法整形，咁為有試吓咁整成大餅狀啦，不過都有見過有啲鬆餅食譜係咁整嘅。焗完都免強可以接受，但都係比較濕，無咗鬆嘅口感。

咖啡杏仁曲奇

咖啡杏仁曲奇(食譜參考自西式甜品一書)

材料： 牛油120克.   糖霜50克.   低筋麵粉180克.    杏仁片35克.    即溶咖啡1湯匙.    熱水1湯匙

做法：

1.  麵粉篩勻待用，杏仁片預先焗香。用熱水先調溶即溶咖啡
2.  牛油與糖打至奶白色成忌廉狀
3.  將咖啡溶液加入(2)中打勻

4.  再將麵粉加入(3)中拌勻，下杏仁片拌勻成粉糰，先雪片刻，再將粉糰放入保鮮紙中整成長條狀，放冰格雪約2小時

5.  將粉糰取出切成一塊塊，放入已預熱的焗爐用150 度焗15 - 20分鐘即可。

後記：呢款曲奇我已整過好幾次，今次低筋粉落得比原食譜多20g，因覺得原食譜食落好似好多牛油咁。

年糕

年糕

材料：糯米粉 1斤(600g).   黑蔗片糖250g.   黃片糖200g.   水約450ml - 500ml

做法：

1.  先用8成水煮溶糖，用篩過濾，稍待涼(即用亦可) 。

2.  分次倒入糯米枌中，用筷子順一方向攪拌至粉和糖水完全混合，至用筷子撈起時粉漿會好似筷子咁粗咁不斷的溜落。如糖水不夠，可加暖水至適當杰度。

3.  糕盤先抺油，倒入粉漿，先用大火蒸30分鐘，再用中火蒸一個至個半鐘，視乎厚薄而定，或用竹籤插入不黏即可。

後記：今年第一次整年糕，原來好容易，其實2年前已想整，不過當時阿媽肯整，自己就懶得整。阿媽不斷提醒一半黃片糖和一半黑蔗就得喇，好啦，就跟著，不過自己鐘意黑蔗片糖啲香味，所以落多啲。溶糖時，原來黑蔗片糖好快溶，黃片糖就稍為耐啲，要成15分鐘先溶得晒。阿媽又話唔好落咁多水呀，要好似筷子咁粗咁溜落嚟就得喇，等我驚死落得多水得制，所以結果蒸好就好似豆皮咁，應該係結得制，唔夠水。唔緊要啦，為有下年再試過。雖然唔係咁靚，味道都好味嘅。今年嘅李祥和糯米粉比起舊年嘅貴咗2蚊，要11蚊先有交易。

另奶奶亦好似往年咁整咗蘿蔔糕和馬蹄糕(兩張相都死咗)比我地，呢2款糕奶奶都整得好好味，真係多謝晒佢。

8/2/2015補充

另之前在蘋果報中剪下的古法蒸糕亦可作參考。

腰果酥

腰果酥(食譜參考西式甜品一書)

材料： 牛油90克.   砂糖50克.   麵粉140克.   奶粉1湯匙.   腰果150克.   蛋黃2個

做法： 

1.            預熱焗爐150度

2.            腰果用滾水略浸5分鐘，盛起抺乾，放入焗爐以150度焗約10分鐘，100克碎成粉。
3.            牛油加入糖，打至奶白色呈忌廉狀，加入蛋黃1個拌勻。
4.            加入己篩勻的麵粉、奶粉、腰果碎，搓勻成柱狀糰，成直徑約2.5厘米的長條，放入冰格雪2小時。
5.            取出切成1/2厘米厚的餅塊，餅面掃上蛋黃，再放上腰果。

6.            放入預熱焗爐以150度焗約15-18分鐘，餅乾放在鐵綫架上待涼。

後記：農曆新年又整我至愛的腰果酥，今次再將腰果粉的份量加多10g至100g，令到腰果酥更鬆脆。第一盤焗咗15分鐘，色澤剛剛好，點知第二盤掛著睇電粯，焗多咗5分鐘至比較燶。以前每次用刀切開放過冰格的粉糰時，都必定會切至碎裂，須用手重組形狀，而家我都唔將包著粉糰的保鮮紙取走，連保鮮紙一齊切，就可切得比較完整無爛。

青BB嘅班蘭椰香戚風蛋糕

青BB嘅班蘭椰香戚風蛋糕

材料：  
1.   蛋白4個.   砂糖 35克.  
2.   低筋粉50克.   泡打粉1/2茶匙.   蛋黃3個.  砂糖20克.   沙拉油40克.   椰子粉20g.    水40g.    椰絲30g.    班蘭精5g,

做法：

1.   蛋黃加20克糖打至混合。先加入油、水及班蘭精拌勻後，再加入粉類及椰絲拌勻。

2.   蛋白加入35克糖，打到乾性發泡。

3.   將1/3的蛋白霜加入(1)，用膠刮輕手攪拌後再將剩下的蛋白加入切底拌勻，入模。拿起模dun兩下。

4.   放入已預熱170度的焗爐，焗35-40分鐘(如中途覺得蛋糕面太焦，可蓋鍚紙)。出爐後馬上倒扣。

後記：想買戚風模中間個圈好耐，不過因覺得用圓模都可以焗到，但最終都係二記買咗啦($15)。發覺個圈嘅圓底範圍和我用開個底模差小小，唔係完全可以蓋晒。第一次整班蘭香味嘅蛋糕，本來之前諗過買班蘭葉整，但見到印尼鋪頭有班蘭精賣，貪方便就試吓，嘩原來用小小5g，就巳經好青綠架喇。但蛋糕焗出嚟好似好油好濕和質感比較粗，唔係好滿意。無理由架，唔係應該用戚風模焗會好啲架咩，唔知邊度有問題。

香橙戚風蛋糕

香橙戚風蛋糕 (6吋模)

材料：  
1.   蛋白3個.   砂糖 35克.  
2.   低筋粉65克.   泡打粉1/2茶匙.   蛋黃3個.  砂糖20克.   沙拉油35克.   橙汁35克.   橙皮茸小許

做法：

1.   蛋黃加10克糖打至混合。先加入油及橙汁拌勻後，再加入粉拌勻。
2.   蛋白加入35克糖，打到乾性發泡。
3.   將1/3的蛋白霜加入，用膠刮輕手攪拌後再將剩下的蛋白加入切底拌勻，入模。拿起模dun兩下。
4.   放入已預熱170度的焗爐，焗35-40分鐘(如中途覺得蛋糕面太焦，可蓋鍚紙)。出爐後馬上倒扣。

後記： 近排好忙，呢個蛋糕成2星期前整嘅，而家先有時間post出嚟。原本這蛋糕係焗爐時係發得好靚好高，焗到35分鐘時，諗著焗多5分鐘穩陣啲，可能個焗爐制重係鬆鬆地，自己意為已擰到5分鐘，原來個爐係無開到，所以蛋糕就咁係焗爐內放涼咗5分鐘，變成扁晒。