紅豆慕士綠茶蛋糕

紅豆慕士綠茶蛋糕

綠茶蛋糕(7吋方模)

材料：   低筋粉65克.    綠茶粉5克.     蛋3個.      砂糖60克.      植物油20克.     鮮奶20克.

做法：

1.   低筋粉和綠茶粉預先篩好備用。植物油和鮮奶先坐暖。
2.   蛋加砂糖打勻至企身，將低筋粉、綠茶粉加入輕手拌勻再加入暖牛油和奶攪拌均勻。

3.   將麵糊倒入模中，輕敲幾下後入焗爐180度約焗約25-30分鐘，取出倒扣放至涼透。

紅豆慕士：

材料：   紅豆茸200克.  牛奶50克.    淡忌廉100克.   砂糖20克.    魚膠粉5克.    水30克.

1.   淡忌廉加糖打至7分發備用
2.   魚膠粉加水放微波爐叮溶備用
3.   紅豆茸加牛奶攪拌，加入魚膠粉水拌勻，再拌入己打發的淡忌廉。
4.   將紅豆慕士倒在蛋糕面抺平，放入雪櫃至凝固即可切件

後記： 今次整呢個蛋糕主要想清咗啲紅豆茸，整得比較求其，因無預足材料就整。綠茶蛋糕無乜綠茶味，5克綠茶粉可能太少。紅豆慕士部份，淡忌廉又原來剩得100克，全部慕士材料攪拌後，感覺比較稀，最主要係唔夠打起淡忌廉。點解人地啲蛋糕嘅切邊可以切得咁整齊，自己就切得一忽忽。

香蕉批

香蕉批(6吋批模)

材料
1.     批皮(可做2個)：  牛油60g.  砂糖 35g.  低筋麵粉 120g.  杏仁粉30g.    雞蛋 1/2隻.      
2.     吉士餡材料：  糖25g.  牛奶250g.  蛋1隻.  粟粉15g.   吉士粉5g.    香草精約2滴
3.     香蕉一條.  砂糖適量

批皮做法：
1.     牛油放軟打起，再分次加砂糖打至淺色
2.     分次加入雞蛋拌勻，再加入杏仁粉攪拌
3.     篩入低粉拌至9成即可，用保鮮紙包好雪30分鐘
4.     取出之粉團輕輕搓壓成糰，然後擀成批皮，然後按入批模，用叉剌孔，用豆類或重物壓著來焗己防拱起
5.     放入已預熱180度的焗爐底層焗10分鐘，取去壓著物，塗份量外的蛋液在批面，放中層再焗10分鐘，取出放涼，再塗一層份量外的朱古力漿

吉士餡做法：

1.     將部份牛奶加入粟粉和吉士粉攪開
2.     蛋和一半份量糖打至發白
3.     牛奶加一半份量糖煮熱至糖溶，加入一部份至(2)中攪拌，再將(1)加入攪開，然後將全部熱牛奶加入攪拌。最後倒回煲中，一路煮一路攪拌免煮燶，煮至杰身，加入香草精攪勻，坐冰水攪拌至涼便可

香蕉做法：

鑊中加適量砂糖，放上切片香蕉，再加砂糖在香蕉面，煎至砂糖變焦，便可番轉香蕉稍煎即可

組合：  取已塗朱古力漿的批皮，加上一層吉士餡抺平，再放上焦糖香蕉即可

  

後記：      見到台灣網友整香蕉批，不過佢地係批面加打發的蛋白霜，再用火鎗燒燶，出嚟效果好靚。整好批後，都有考慮好唔好加蛋白霜，最後都係決定唔加，一來因無火鎗(雖然可放焗爐焗燶)，二來又好怕會好甜，或下次整檸檬批先試吓整蛋白霜。焦糖香蕉唔記得隔去水份，放上批後先發覺有小小出水情形。香蕉要用比較生的為好。第一次加蛋液塗批皮再焗，因睇到網友話可令到批更脆，不過都係唔放心，再加朱古力漿塗係批面，免吉士餡令到批皮變淋。   

夾心朱古力

夾心朱古力

材料：　
1.   Valrhona 53%黑朱古力 適量
2.   Valrhona 53%黑朱古力 60g.   淡忌廉40g.   蘭姆酒4g.  
3.   杏仁碎(先焗香).    提子干.

做法：　
1.     把60g朱古力先用刀切碎，加淡忌廉坐熱水或放微波爐分數次(每次約1分鐘)加熱。然後輕輕攪拌至巧克力融化，放涼後加入蘭姆酒攪勻備用。
2.     將部分材料(1)的朱古力放容器於微波爐加熱約20秒，輕輕攪拌至溶，將己溶的朱古力用毛筆塗在模內，放雪櫃一陣，取出再塗一層，重覆直到塗過三層，或放模在光線下光線不穿透。
3.     再在已塗朱古力的模注入(1)至6-7成滿，放入杏仁碎或提子干後，放雪櫃至稍為凝固，取出於表面再塗上朱古力溶液封口，放雪櫃一會即可食用。吃不完可以放回雪櫃冷藏保存。

後記：  第一次整朱古力，雖然之前都有做少少功課，諗著試吓做調溫，於是先將朱古力坐熱水溶解，書話要先將朱古力在溫度45-50度之間溶解，但未到呢個度數，約35度朱古力己全部溶晒，咁我仲需唔需要再加熱到45度呢。我見朱古力溶晒咪將佢坐冰水降溫至27度，諗著再調溫至約30度時，一轉眼取得暖水時，朱古力已凝結，再要攪一輪先再將朱古力變番液態狀。真係攪到頭都大，最後放棄調溫，改用微波爐加熱朱古力算把啦。

雖然無預期咁順利，但微波爐加熱都好方便，因材料(2)的份量原來整出嚟都唔少，等到塗模的朱古力唔夠時，只需切小小朱古力碎放微波爐加熱一陣就可以用，非常方便，唔會用唔晒浪費朱古力。一路整已可一路食，放雪櫃好快凝結，呢個模細細，可一啖一粒，一咬落去都有咯一吓爆開嘅聲，成品自己都覺得可以，(當然無其他網友令立立的出品咁靚)，不過朱古力粒個底唔夠平，下次要用刀刮平就會靚啲。

黑森林蛋糕

黑森林蛋糕

朱古力蛋糕(7吋方模)

材料：  

低筋粉75克.    可可粉15克.     蛋4個.      砂糖80克.      植物油20克.     鮮奶30克.

做法：
1.   低筋粉和可可粉預先篩好備用。植物油和鮮奶先坐暖。

2.   蛋加砂糖打勻至企身，將低筋粉、可可粉加入輕手拌勻再加入暖牛油和奶攪拌均勻。

3.   將麵糊倒入模中，輕敲幾下後入焗爐180度約焗約25分鐘，取出倒扣放至涼透。切3片備用。

內餡：
1.   酒漬櫻桃
做法： 新鮮櫻桃160g加櫻桃酒17g及水17g，放煲內煮約10分鐘，放涼後至雪櫃備用。
2.   500g淡忌廉加50g糖粉打起備用
3.   黑加倫子啫哩粉90g加300g熱水溶解，雪凍後部份切粒，部份整碎備用

4.   另備朱古力碎適量

組合：   蛋糕片塗上煮過的酒漬櫻桃液，第一層抺上忌廉及加上酒漬櫻桃，第二層抺上忌廉及加上黑加倫子啫哩，最後抺上忌廉，側邊貼上朱古力碎及餅面放上裝飾即可。

後記：  第一次整黑森林蛋糕，整得唔係咁靚，好彩只係作為自己的生日蛋糕。蛋糕諗著用500g忌廉已經夠啦，點知只剛剛夠塗抺蛋糕本身，側邊位都只有薄薄一層，本來想係面度唧啲忌廉花紋都無，為有就咁放啲車厘子和啫哩碎。第一次用呢個7吋方模，用4個蛋嚟整，只能免強連面切得3塊，所以要用埋面層做埋蛋糕。抺蛋糕部份真係覺得自己越抺越差，反而覺得第一次抺忌廉嘅蛋糕整得比較好。

係網上搜尋酒漬櫻桃做法，有啲用紅酒或其他類酒，有啲要落糖，有啲無。所以我都係自己胡亂製作，見屋企有支櫻桃酒版，試過味道甜甜地，就嘗試自己整。我只要求有小小酒味和甜甜地就得。