焦糖慕士蛋糕

焦糖慕士蛋糕(6吋模)

海綿蛋糕：

材料：  低筋粉75g.   蛋3隻.   糖56g.   牛奶30g.    植物油20g.

做法：

1.   把蛋和砂糖一起打發到企身。
2.   將過篩過之低筋麵粉加入，用膠刮刀混合，
3.   接著將部份(2)加入暖和的植物油和牛奶混合，再倒回(2)中攪拌均勻即可。
4.   將麵糊倒入鋪有牛油紙的圓形模中，放入已預熱170度的焗爐中焗約25分鐘或竹籤插入不黏即可。取出倒扣放涼後切開成3片備用。

焦糖慕士 (參考Cake Chef)

材料：  
1.    水25g.  糖25g.   細全蛋1隻(45g).   魚膠粉3g.   水20g.   
2.    糖100g.   淡忌廉100g.     淡忌廉打起160g

做法：
1.   100g糖放煲煮至焦色，將100g的暖淡忌廉分次加進煲內至煮滾，放暖備用。
2.   25g水加25g糖煲滾，倒進蛋內，打至企身。
3.   魚膠粉加20g水叮溶。
4.   將(2)加進(1)中攪拌均勻，再加入魚膠粉水及已打起的淡忌廉拌勻即可。
5.   先在模中放上蛋糕片，然後將部份蕉糖慕士倒落蛋糕片上至完全覆蓋，再放上另外一塊蛋糕片，將餘下的焦糖慕士全倒進掃平便可。放入雪櫃至凝固。

後記：  記得好耐之前整過一個焦糖蘋果蛋糕，真係好好味。所以最近係Cake Chef網頁睇見有焦糖慕士，未試過，唔知會唔會又係咁好味，咁就又嚟試吓先，不過材料又無跟足。

自己覺得慕士部份整得太鬆，同埋魚膠粉應落得唔夠，感覺唔夠挺，好似食泡泡咁。慕士份量又整得太多，倒晒落去至差不多滿瀉。令到脫模後的慕士蛋糕變得頭重腳輕，要傾斜隻碟影相先可令到蛋糕唔會跌低。

海綿蛋糕今次改落植物油，但出嚟底部口感比較實啲，唔通拌得唔夠均勻。或下次可減少低粉份量試試會唔會好啲。雖然覺得無上次焦糖蘋果蛋糕咁好味，不過都唔係咁差，不過仲要練習多啲才可掌握好煮焦糖嘅技巧。

蘋果小蛋糕

蘋果小蛋糕

材料: (9小個)

1.     蘋果1個.     砂糖一湯匙.       檸檬汁一湯匙

2.     牛油50g.     砂糖50g.     蛋1個.      牛奶60g.      低筋麵粉105g.    泡打粉半茶匙.     梳打粉半茶匙. 

做法:

1.      蘋果去皮切薄片，放煲內加入1湯匙砂糖及1湯匙檸檬汁，煮到乾水為止。
2.      牛油軟化後和糖放盆中充分打勻變白。
3.      蛋液分次加入打勻，加入半量牛奶攪拌。
4.      麵粉、梳打粉及泡打粉混合過篩後加入拌合均勻後，再將餘下的半份牛奶拌勻。最後加入煮乾水的蘋果片。
5.      分別倒入9個紙模至8分滿。放已預熱烤箱170度C烤20-25分鐘即可。

後記：  今次煮呢個係紐西蘭蘋果，切出嚟好似幾多吓，點知煮完得番啲咁多，下次要揀隻大啲至得。今次梳打粉好似落多咗小小，出嚟嘅口感鬆泡泡咁。上次係蘋果日報睇過，好似話整小蛋糕的粉係唔需要先過篩，如果唔係蛋糕口感亦都會太鬆。

草莓慕士蛋糕

 草莓慕士蛋糕

蛋糕體:  (烤盤為24cm乘21cm)

材料：  牛油20克 .   牛奶30克.    低筋粉75.    蛋3個.    糖60克.

做法：

1.        烤盤鋪上鍚紙。把蛋和白砂糖一起打發到企身。
2.        將過篩過之低筋麵粉加入，用膠刮刀混合，
3.        接著將部份(2)加入暖和的牛油和牛奶混合，再倒回(2)中攪拌均勻即可。
4.        將麵糊倒入烤盤中，輕敲幾下後入焗爐180度約焗11分鐘，取出放在網架上，然後放至涼透。

草莓慕士餡料

材料：  

1.   草莓130g.  砂糖20g.   檸檬汁少許.    魚膠粉3g.  水20g.
2.     淡忌廉120g.   糖粉10g.       
做法：

1.   淡忌廉加10g糖粉打至7分發備用，魚膠粉加20g水，隔熱溶解。

2.     將草莓壓爛，加檸檬汁及砂糖攪勻。再加入魚膠粉水。
3.    將已打起的淡忌廉加入(2)拌勻即可。
4.       將草莓慕士餡料塗滿蛋糕片上，再分成3等份疊高即可。放入雪櫃至凝固。

後記： 見到街市好多草莓賣，重好平添，十蚊3盒，好似係紐西蘭出產，雖然唔係好甜，不過用嚟攪成茸做慕士都可以嘅。本來係整瑞士卷，諗著用3隻蛋嘅份量可以整多啲，點知焗完出嚟真係太厚，一捲就斷，為有疊埋一齊整成一舊舊咁。原來要切得靚個餅都唔係咁容易，比我切到又大又細，又四方形又梯形咁。不過都好好味。

朱古力戚風蛋糕

 朱古力戚風蛋糕 (6吋模)

材料：   蛋白3個.   糖 30克.   菜油30克.   奶40克.   低筋粉50克.   朱古力粉10克.   蛋黃3個.  糖22克.   rum酒5克

做法：

1.            預熱焗爐170度，低筋粉和朱古力粉先篩好。

2.            蛋黃加22克糖打至混合，再加入rum酒、暖菜油及奶拌勻。

3.            蛋白加入30克砂糖，打到企身。
4.            將低粉及朱古力粉加入(2)拌勻，再將1/3的蛋白加入裏面，用手打蛋器拌勻後再將剩下的蛋白切底拌勻，入模。拿起模dun兩下。
5.            放入己預熱170度的焗爐，焗25分鐘(如中途覺得蛋糕面太焦，可蓋鍚紙)。出爐後馬上倒扣。

後記：  戚風蛋糕真係好考功夫，無一次做得滿意。今次唔知係唔係蛋白打發過度，好難攪拌得均勻，所以焗好後仲有部份有白色嘅蛋白，亦因攪拌過度而令到無預期中的鬆發。用咗戚風模焗戚風蛋糕後，每次都好似近面的蛋糕體反而無近底的鬆發。

香橙小蛋糕

香橙小蛋糕

材料: (9小個)

牛油50g.     砂糖50g.     蛋1個.      低筋麵粉100g.    泡打粉半茶匙.     梳打粉1/4茶匙.  橙汁連渣100g.

做法:
1. 預先將橙榨汁。
2. 牛油軟化後和糖放盆中充分打勻變白。
3. 蛋液分次加入打勻，加入半量橙汁攪拌。
4. 麵粉、梳打粉及泡打粉混合過篩後加入拌合均勻後，再將餘下的橙汁拌勻。
5. 分別倒入9個紙模至8分滿。
6. 放已預熱烤箱170度C烤25分鐘即可。

後記：今次小蛋糕改用橙汁作變化，用咗100g橙汁連渣，水份比上次紅莓小蛋糕多，但出嚟口感較軟熟。不過可能因泡打粉落得小咗，所以爆得無咁靚。橙味亦不是很夠，下次可落小小橙皮茸，增加橙味。

芒果瑞士卷

芒果瑞士卷

蛋糕體:  (烤盤為24cm乘21cm)
材料：  低筋粉55克.  蛋2隻.  砂糖42克.  牛油10克.   鮮奶22克.
做法：

1. 烤箱預熱180度，烤盤鋪上鍚紙，低粉先過篩

2. 蛋加砂糖坐熱水打發至企身，先加低筋粉拌勻，取一大匙麵糊加入到暖的鮮奶和牛油攪勻，再倒回麵糊中攪拌均勻即可。

3. 將麵糊倒入烤盤中，輕敲幾下後入焗爐180度約焗9分鐘，取出放在網架上，撕低側邊錫紙，再用鑊蓋在上罩著(用作保濕)，要留番小小梳氣位，然後放至涼透。

忌廉餡料： 淡忌廉130克.  糖粉10克.  芒果肉一個

作法：
1.  淡忌廉加糖打至8成發待用.
2.  將冷卻後的蛋糕片蓋上一張保鮮紙後翻起，除掉鍚紙。再將忌廉餡全部抺在蛋糕片上，塗抹均勻後，再鋪上芒果肉捲起，用保鮮紙包緊後放雪櫃雪凍即可。

後記： 見到街市又有10蚊3個的芒果，又忍唔著要買番嚟。個售貨話擺一陣就會甜，點知又係呃人嘅，等到開始起黑點都係酸，不過我次次都會買。淡忌廉其實用120克應足夠，太多捲時會係2邊咇晒出嚟。

這篇網誌本來已寫好，存在草稿，唔知點解再開番出嚟得番1/3係度，又要打過。  

黃金戚風蛋糕

黃金戚風蛋糕(食譜妃娟)

6吋模

材料：
A
鮮奶 30g
牛油 38g
B
低粉 45g (先過篩)
C
蛋黃 3個
RUM酒 9g
D
蛋白 3個
細砂糖 42g

做法：
1. 鮮奶和牛油煮至65℃以上，加入低粉拌勻
2. 分次加入蛋黃及RUM酒拌勻
3. 蛋白打起泡後，分次加糖打至9分發
4. 將蛋白霜分兩次加入蛋黃麵糊混合，倒入烤模
5. 放入已預熱160℃焗爐，等焗上色後，降溫成至150℃，共約45-50分鐘。出爐後倒扣放涼。

後記： 妃娟網誌的出品好多都好吸引，就諗著搵個睇落好似易啲咁試吓，點知出嚟效果就真係麻麻。首先可能鮮奶和牛油煮得太熱，落粉後覺得好似整泡芙咁淥熟晒啲粉，加咗蛋黃和酒後都比較重係結成一糰，最後加埋蛋白霜，都重見到有啲結成粒的粉糰。焗緊時已見蛋糕爆裂，切開後組織唔鬆，口感麻麻，有小小酒味。鬼咩，都唔係跟足食譜份量，係咁上下架喇。  

芝士戚風蛋糕

 芝士戚風蛋糕(食譜情迷芝士餅)

材料: (6吋模)

A.  牛奶45g.  忌廉芝士30g(改用2片芝士40g).  牛油20g
B.  低筋麵粉 50g.  
C.  蛋黃 3隻.  
D.  蛋白 3隻.  糖 75g(只落50g.)    
　
做法：

1) 將芝士片、牛油和牛奶坐熱水溶至冇粒粒，完全溶解。

2) 離開熱水後加入低筋粉拌勻，再分3次加入蛋黃攪拌均勻。

3) 將蛋白分3次加入糖打發至企身。將1/3蛋白加入麵糊中拌勻，再加入其餘蛋白拌勻。入模。拿起模dun兩下。

4) 放入已預熱170度的焗爐，如中途覺得蛋糕面太焦，可蓋鍚紙，焗約40-45分鐘。出爐後馬上倒扣。

後記： 蛋糕焗咗40分鐘後及用竹籤插入都無黏著物，以為得啦，倒扣完，發覺有一邊小小塌咗，原來頂頂重有小小未全熟晒。但蛋糕非常鬆軟，好好味，好似疏芙里咁鬆軟，唔知係咪粉太少呢，但係已跟足食譜份量的比例囉喎。