鳯梨卷

鳯梨餡材料 ：

罐頭菠蘿 1大罐
麥芽糖 1大匙
玉桂粉 1/8茶匙
做法:
1. 先將菠蘿隔去水份，用义壓成絲再剪碎，稍為渣乾水份；
2. 放入鍋內，加入所有配料炒乾，要不停攪拌，直至乾身離火，放涼留用。(成品有145g)
3. 分成8g一粒。


酥酥外皮材料 (食譜Lyric Loves)

低筋面粉 90g
粟粉 10g
牛油 70g
煉奶 15g
蛋黃 6g

做法:
1) 牛油放軟, 攪打一下至忌廉狀, 加入煉奶攪打均勻, 再拌入蛋黃混合
2) 低筋面粉, 粟粉過篩後拌入, 攪拌成團即可
3) 面團放入唧咀, 唧出約5-6cm長度, 卷入一個鳯梨餡， 放入雪櫃約1 -2小時, 取出入爐180度15分鐘，見皮變金黃色即可。

後記：

終於都整咗呢個鳳梨卷，睇咗幾個blogger整嘅食譜，揀咗呢個酥皮做法，真係好鬆同好酥，小小甜，好味。一共只做到18粒，仲有啲皮剩。
個大號唧咀係家政方買，底有3cm闊，20蚊。

花卷

花卷

包材料：

中筋麵粉300g.
無鋁泡打粉3g.
糖30g.
速溶酵母4g.
水160g
煮食油12g
椰子粉 20g
椰子油 適量

做法：

1. 將麵粉和其餘材料放在盤中，慢慢加入水，攪拌至均勻。
2. 再將麵粉揉成糰，醒10分鐘。
3. 再將發麵揉至光滑便可使用。
4. 將發麵糰擀開成一大片，塗上椰子油，上下覆合成三折，用刀切成細條，每六細條一同疊好，拉長打結後放在蒸包紙上。
5. 放入蒸籠內，再發酵約25分鐘。
6. 凍水落鑊，以水滾起計，中小火蒸約12分鐘，再等5分鐘才開蓋。

後記： 

比起慢頭，喜歡這種花卷的口感多些，今次加咗椰子粉和椰子油，但椰子味都不太有。

芝麻糊

芝麻糊

材料： 黑芝麻110g. 花生20g. 白米60g. 糯米10g. 水4-5杯. 冰糖120-130g..

做法：
1. 白米和糯米洗淨浸水2小時。黑芝麻和花生洗淨，用白鑊炒香，盛起待凉
2. 把已炒過的黑芝麻和花生加2杯水攪拌隔喳，倒至煲中先煲約15分鐘。浸過的白米和糯米放有隔喳網的攪拌機，加2杯水攪打成槳，約2次3分鐘，至微粒更加幼細，然後全倒進煲裏(這時差不多沒有喳)。
3. 將冰糖碎加入煲中同煮，用慢火，邊煮邊攪，以防黏底，至糖溶及滾起即可。

後記：

今次嘅芝麻糊和之前整嘅改咗啲，加咗花生和糯米，希望會令到煲出嚟嘅芝麻糊香啲和口感好啲。

蘋果批

 蘋果批 (6吋)

材料：

批皮： 牛油 70g.  低筋麵粉 120g.  砂糖25g.  凍水 4大匙

餡： 蘋果3小個切粒.  砂糖 30g.  粟粉 1大匙.  肉桂粉1小匙.  牛油10g.


做法：　

1. 牛油、低粉和糖，用手指搓至麵包糠狀，倒入凍水，稍微拌至呈團狀即可，不要過度攪拌。放進雪櫃雪一陣。

2. 取出麵糰，搓幾搓，分成2份，約6和4的比例，桿成圓形薄片，放進6吋派盤裡，整理服貼。用叉子在批皮上刺孔，另一張麵皮桿至剛好6吋。

3. 餡：煲內放入蘋果粒，混合砂糖及牛油拌勻，煑至蘋果淋身收乾水份，將肉桂粉、粟粉倒入蘋果片中拌一拌即可。

4. 將備好的餡料倒入批盤裡鋪平，蓋上另一張批皮，將多出來的批皮邊覆上壓緊。然後用叉子在批皮邊緣壓出紋路。在蓋好的批皮上界幾刀。

5. 放已預熱200度的焗爐焗25分鐘。至表面金黃色即可，放在網架上待涼。






後記：

雪櫃有3個放咗一排，皺晒皮的蘋果，見到都唔想食，又好耐都無整蘋果批，老公又出晒口講話最好整蘋果批，咁就整啦。呢個係少甜版，食譜都係跟之前整過嘅，不過就將糖的份量全部減少，當早餐食都唔會覺得太甜。

覆盆莓/紅莓慕士蛋糕

覆盆莓/紅莓慕士蛋糕 (參考食譜幸福甜蜜之蛋糕點心DIY - 植本愉利子)

原味海綿蛋糕:

材料： 粟米油15克 . 牛奶15克. 低筋粉60克. 蛋3個. 糖50克.

做法：
1. 將蛋打散後加入砂糖。以隔水加熱的方式將蛋及砂糖利用打蛋器迅速攪拌，攪拌到提起時殘留捧子上的蛋液能靜止3-4秒不會往下滑動即可停止攪拌。
2. 將過篩過之低筋麵粉2次加入，用膠刮刀混合，
3. 接著將部份(2)加入暖和的粟米油和牛奶混合，再倒回(2)中攪拌均勻即可。
4. 將麵糊倒入鋪有牛油紙的模中，放入已預熱170度的焗爐中焗約12分鐘或竹籤插入不黏即可。取出放涼後切開備用。

蛋糊忌廉(巴伐露斯)

材料： 蛋黃2個. 砂糖37克. 牛奶150cc. 香草精數滴. (魚膠粉克 水42克.) 櫻桃酒1小匙. 淡忌廉150克

做法：
1. 糖和蛋黄一起混合均勻。 牛奶放煲內加熱至未滾，倒一部分到蛋漿中攪拌，然後再全部倒回煲内，小火煮及不停攪拌，一直煮到稍為杰身為止。
2. 隔著冰粒使其加速冷郤。稍涼後加入香草精數滴，再加櫻桃酒添味，再加入已叮溶魚膠粉水，

3. 將已打至8分發的淡忌廉加入攪拌均勻即可。

覆盆莓醬

材料： 覆盆莓泥75克. 砂糖30克. (魚膠粉3克. 水18克.) 淡忌廉 100克.

做法：
1. 將覆盆莓泥和砂糖一起混合均勻後，稍加熱使其溶解，接著加入己叮溶的魚膠粉水。
2. 將已打至8分發的淡忌廉加入攪拌均勻即可。

果凍

材料： 砂糖20克. 覆盆莓泥70克. 水30克. (魚膠粉3克. 水18克.)

做法： 將覆盆莓泥與砂糖一起混合後，加熱水攪拌(或叮一陣)，接著再加入已叮溶的魚膠粉水。

組合：

1. 將海綿蛋糕切好放入模內(7吋方模)

2. 將覆盆莓醬倒入蛋糊忌廉中，但是不要有攪拌的動作。
3. 用杓子將覆盆莓泥和蛋糊忌廉舀起淋上蛋糕上，使其呈現出大理石紋路，再放入雪櫃冷藏使其凝固。
4. 凝固後從雪櫃取出，在慕士表面淋上果凍液，再放入雪櫃冷藏使其凝固，脫模後，放上裝飾即可。

後記：

之前整呢個蛋糕已經係2008年，當時講過會再整，因覺得好好味。但點都諗唔到要等7年先再整。
咁多年後，對攪拌2種醬啲技巧都無進步，都係整得唔靚。因太想整到均勻，就越攪越令到兩種融合埋一齊。但整個步驟就比較順利完成。

綠茶戚風蛋糕

綠茶戚風蛋糕

材料：

蛋黃 5個
砂糖 20g

植物油 30g
牛奶 90g
低筋麵粉 90g
抹茶粉 10g

蛋白 5個
砂糖 50g

170度10分鐘轉150度30分鐘

軟式香蒜麵包

軟式香蒜麵包(食譜Carol自在生活)


材料:

高筋麵粉  150g 

砂糖   15g 

鹽   1/8茶匙 

速發酵母   1/4茶匙
水   105g 

油   15g

香草大蒜奶油醬:

蒜瓣   3粒 

牛油   10g 

雜香草   1/4茶匙
砂糖   1/8茶匙

做法：

所有材料搓揉成糰，先發酵30分鐘，放保鮮盒再放雪櫃過夜，第二天取出。發酵至2倍大。再做餘下動作。

170度焗15分鐘。

後記：

好耐無做麵包，見到Carol的大蒜麵包好想食，所以又手痕，要搓搓麵粉。因不是即時食，麵包留返來做早餐，所以算係做個低温冷藏法，等佢第日口感無咁乾。

脆皮奶皇月餅

脆皮奶皇月餅

月餅餡（約 65個@20克）

材料：

砂糖　　　 200克
低筋麵粉　 72克
吉士粉　　 72克
奶粉　　　 72克
煉奶　　　 92克
雞蛋　　　 120克
椰汁　　　 180克
花奶　　　 180克
牛油　　　 180克
鹹蛋黃　　 10隻


月餅皮 (約65個@30克)

材料：
砂糖　　　 260克
牛油　　　 461克
雞蛋　　　 86克 
鮮忌廉　　 80克
低筋麵粉　 990克
吉士粉　　 66克


做法：

1.先做月餅餡：將糖和麵粉、吉士粉及奶粉撈勻，加煉奶、雞蛋、一半椰汁，撈勻後再加另一半椰汁和花奶撈勻，然後加牛油（不用撈勻）。
2.滾水落鍋蒸 約15分鐘攪拌一下，再蒸約10分鐘再攪拌一下至全熟。拿出撈勻(要即時撈，否則涼後底部會變硬)(壓碎鹹蛋黃，在這時加入撈均，搓至有黏性)，攤凍即成奶黃餡，放入雪櫃雪一晚。
3.做月餅皮︰大碗中，加入砂糖、牛油搓勻，然後加雞蛋液、鮮忌廉，撈勻後加麵粉及吉士粉，搓勻。放入雪櫃雪半小時。
4.奶黃餡從雪櫃取出，再略搓勻，分成 20克一粒。
5.月餅皮粉團分成 30克一粒，每粒壓平成圓形，邊稍薄，將餡包入餅皮中。
6.月餅先撲上小量麵粉，光滑一面向下放入餅模中造型。留意餅模要灑上極少麵粉，以免黏着月餅皮。
7.預熱焗爐 250度。先焗 5至6分鐘(放焗爐最底格，睇自己爐温焗幾耐)，取出掃薄薄一層蛋漿或糖水(20g糖加20g水)，吹乾約 10分鐘後，再掃一層蛋漿，然後再焗 5分鐘(放中層只用上火220至230度焗至夠色)。

後記：

今年做的脆皮奶皇月餅對之前的有小小改動，今次跟返原食譜餡和皮的比例，真係皮多啲係會口感脆啲。及焗到最後上火再加多20至30度，等佢快啲著色和無咁快爆裂。

同埋今年係淘寶買咗啲包裝盒和貼紙返嚟，包裝好後覺得月餅睇落靚咗好多。淘寶的包裝盒真係又平又靚，係香港材料舖見到一樣款的盒，不過佢係6個裝，要9元一個，淘寶呢間4個裝，唔洗5毫人仔一個，真係平好多。不過運費就貴咗啲，要買多啲先化算，所以今年買咗好多好多，夠一排用。

奶皇包

奶皇包

包材料：(約50g一份共10個)

中筋麵粉300g.
無鋁泡打粉3g.
糖30g.
速溶酵母4g.
水160g
煮食油8g

做法：

1. 將麵粉和其餘材料放在盤中，慢慢加入水，攪拌至均勻。
2. 再將麵粉揉成糰，醒10分鐘。
3. 再將發麵揉至光滑便可使用。
4. 將發麵分成10份，再將小麵糰擀開成一大片，包入奶皇餡，放在蒸包紙上。
5. 放入蒸籠內，再發酵約25分鐘。
6. 凍水落鑊，以水滾起計，中小火蒸約12分鐘，再等5分鐘才開蓋。


奶皇餡

材 料 : (約25g一份共10粒)

麵粉 10 g

粟粉 10 g

吉士粉 20 g
棷漿120 g

花奶 65 g 

蛋黃 1 隻
砂糖 25 g

牛油 10 g

做法：

1.   將糖和麵粉、粟粉、吉士粉撈勻，加蛋黃、椰汁和花奶撈勻，然後加牛油（不用撈勻）。

2.   放鑊蒸 ，約每5分鐘攪拌一下至蒸至全熟。拿出撈勻(要即時撈，否則涼後底部會變硬)，稍涼搓至有黏性，攤凍即成奶黃餡。