香蕉加橙雪糕

香蕉加橙雪糕

材料：  糖60g.   淡忌廉230g.   牛奶150g.    2隻香蕉約160g.   1個橙汁約55g.

做法：
1.   橙先榨汁，香蕉壓茸。
2.   牛奶加糖叮溶，再將所有材料攪勻放雪櫃雪涷備用。
3.   將雪糕溶液倒入已預冷的雪糕機攪拌25分鐘至杰。

後記：  上次整嘅三果雪糕好好味，所以今次改少少再嚟，試下只用2種生果，香蕉和橙，味道出嚟都好味，就係少咗酸酸地咁，糖份量都可以落少啲。

哈密瓜雪糕

哈密瓜雪糕

材料： 
哈密瓜250克.      牛奶100克.       淡忌廉300克.      糖60克

做法：
1.  將哈密瓜加入牛奶放攪拌機打成茸，
2.  50克糖加100克淡忌廉叮熱至糖溶，
3.  再將全部材料拌勻，便可放雪櫃過夜備用。第二日倒入預先冷凍的雪糕機攪拌25分鐘至杰便可冷凍儲存。

      

後記： 
本來雪糕機狂熱好似淡咗啲，已經無之前咁一早諗定整乜嘢味，亦無乜心機寫雪糕食譜，好似隻隻都差不多，自己都覺得有啲悶，但個仔食完雪糕後的一句話：『嘩！今次哈密瓜雪糕好正呀！』咁，心機又好似有啲返番嚟。最緊要屋企人鐘意食。

其實味道真係好睇個人喜好，雖然哈密瓜雪糕味道都好好同好清新，但我自己就鐘意上次嘅士多啤梨多啲，個仔就話哈密瓜好味啲。雪糕本身有淡淡嘅橙色，但影相出嚟就唔到。

士多啤梨雪糕

士多啤梨雪糕

材料： 
士多啤梨果泥140克.      牛奶250克.       淡忌廉230克.        糖70克.       vanilla extract 1/2茶匙

做法：
將士多啤梨果泥加入牛奶和淡忌廉拌勻，最後加入vanilla extract，便可放雪櫃過夜備用。第二日倒入預先冷凍的雪糕機攪拌25分鐘至杰便可冷凍儲存。

後記：  自己覺得用生果整雪糕係首選，味道最天然和好味。今次雖然用果泥，唔係新鮮士多啤梨，但都己經好好味，係仲差少少果肉唧。

墨西哥包 (17小時中種)

墨西哥包 (17小時中種)

中種麵糰材料：   高筋麵粉140g.      速發酵母1g.     水90g.  

做法：  搓到擴展階段，靜置15-30分鐘後，放進冰箱低溫冷藏17小時

主麵糰材料：   高筋麵粉60g.     速發酵母1g.      牛油 20g.       糖 16g.      奶粉8g.      水40g.

做法：
1.   除牛油外的主麵糰材料搓揉成糰後，加入中種麵糰，(17小時低溫冷藏發酵)，最後加入牛油打至完成階段。
2.   延遲發酵30分鐘後
3.   中間分割，分割成6份，約58g。發酵20分鐘，做型，再發酵至約2倍大，唧上墨西哥餡料入爐。
4.   180度焗約13分鐘。取出放涼。

墨西哥餡料：     低筋麵粉36g.      牛油36g.      糖27g.      蛋20g

做法：
1.    將室溫牛油加糖攪勻 。
2.    加入蛋拌勻再加已過篩之麵粉， 攪拌均勻即可。
3.    將皮料放入唧筒，在麵團上以順時針方式繞圈唧上。

後記： 唔知點解今次麵糰好黏手，撻咗好耐先比較變得光滑。可能上次將部分水材料變蛋液，今次全用水。呢隻麵包仲熱時就最好食，因墨西哥餡會脆卜卜。

利賓納雪糕

利賓納雪糕

材料： 
濃縮利賓納200克.      牛奶300克.       淡忌廉200克.    vanilla extract 1/2茶匙

做法：
將利賓納加入牛奶和淡忌廉拌勻，最後加入vanilla extract，便可放雪櫃過夜備用。第二日倒入預先冷凍的雪糕機攪拌30分鐘至杰便可冷凍儲存。

後記：
喺夏天利賓納係我屋企一定有嘅凍飲，個個都好鐘意利賓納嘅味道，咁順理成章就會攞佢嚟整雪糕啦，係咪！
但雪糕出嚟味道我就覺得一般，無想像中咁好味，但個仔就覺得幾好味，話有啲乳酪味咁添，我就唔係好覺喎。我發覺佢乜都話好味嘅，開始唔係好相信佢話好味嘅嘢食係咪真係咁好味喇。

見到網上好多網友都讚貝印雪糕挖好用，我都唔好執輸都去買番個，之前都用過好多雜貨鋪買嘅雪糕挖，但個個都係用無幾耐中間嗰條圈圈就會甩出嚟，希望佢會襟用啲，不過買嗰時都尤疑過，好似大過平時啲好多咁，不過諗著一場嚟到，都係買咗先算。點知買返嚟都無人用，個個都鐘意就咁用匙羹嚟畢，無計。只好用佢畢雪糕影相，等睇落靚啲。

紅莓小蛋糕

紅莓小蛋糕

材料: (9小個)

牛油50g.   砂糖50g.   蛋1個.   麵粉100g.   泡打粉1小匙.   牛奶60g.   紅莓乾50g

做法:
1. 預先將紅莓乾用水略浸後，隔乾水份。
2. 牛油軟化後和糖放盆中充分打勻變白。
3. 蛋液分次加入打勻，加入半量牛奶攪拌。
4. 麵粉及泡打粉混合過篩後加入拌合均勻後，再將餘下的牛奶拌勻。
5. 最後紅每乾也加入混合後，分別倒入9個紙模至7分滿。
6. 放已預熱烤箱170度C烤20~25分鐘即可。

後記：
個仔投訴屋企呢排企無嘢食，所以嗱嗱聲搵啲容易整又好味嘅蛋糕仔塞住佢把口先。不過呢排真係少咗整蛋糕和曲奇餅，剩係顧住整雪糕。等我玩雪糕機嘅狂熱過咗，就會平衡番啲架喇。

佢另外仲點名要食威化餅，鐘意食佢嘅口感。呢隻餅我就無本事整比佢食，一定要買喇，真係好耐無食過呢隻餅，記得上次買時價錢好似大約$5.50至$6.0，而家已加價至$8.5一包。

榛子焦糖雪糕

榛子焦糖雪糕

材料： 
蛋黃2隻.      糖20克.      牛奶300克.       淡忌廉240克.       榛子醬70克 .       糖50克.    水20克.      vanila extract 1/2茶匙

做法：
1.     先將蛋黃和20克糖打勻，
2.     另將50g糖加水20g放煲煮至焦色，將240g的叮熱淡忌廉分次加進煲內至和焦糖拌和，再加入牛奶煮熱，
3.     將部份(2)倒入(1)中拌勻後，再全倒回鍋內，加入榛子醬用慢火煮至杰身。
4.     盡快放涼後加入vanila extract，便可放雪櫃雪過夜備用。
5.     取出倒入己冰過的雪糕機攪拌25分鐘至杰便可。

後記：   上次買嘅榛子醬仲有剩，所以整多次榛子焦糖雪糕。個盒仔明明寫著重100g，但上次用咗50g，今次再磅下佢，原來仲有70g剩喎。今次煮焦糖有加水，所以煮得好啲，比較容易控制，最主要技術未夠。平時整雪糕，如奶和淡忌廉都係新開盒，我都係就咁加就算，尤其係整生果味，但因今次淡忌廉已放超過一星期，所以要煲煲佢，殺下菌先，比較放心食用。

今次我自己就覺得好味過上次啲，因自覺今次煮焦糖靚啲，又加多咗vanila extract，榛子醬多啲啲，牛奶放少咗，整體好似creamy咗啲，但個仔話唔覺得有分別喎，佢話都唔記得上次乜嘢味囉。

鹹牛肉包及豆沙麵包 (17小時中種)

鹹牛肉包及豆沙麵包 (17小時中種)

中種麵糰材料：   高筋麵粉140g.      速發酵母1g.     水90g.  

做法：  搓到擴展階段，靜置15-30分鐘後，放進冰箱低溫冷藏17小時

主麵糰材料：   高筋麵粉60g.     速發酵母1g.     鹽少許.     牛油 20g.      糖 20g.     奶粉8g.     水10g.     蛋液30g.

做法：
1.   除牛油外的主麵糰材料搓揉成糰後，加入中種麵糰，(17小時低溫冷藏發酵)，最後加入牛油打至完成階段。
2.   延遲發酵30分鐘後
3.   中間分割，分割成6份，約58g。發酵20分鐘，包餡做型，再發酵至約2倍大，掃上蛋液(份量外)入爐。
4.   180度焗約12分鐘。取出放涼。

後記：  都係覺得17小時中種麵包好味啲。今次主麵糰好黏手，加咗中種後搓一陣又再撻一陣後，就越撻越光滑，雖然未到完全階段，但效果都唔錯。

好懶做形，將餡料就咁包好就算，不過焗完出嚟圓碌碌都好可愛。

芝麻雪糕

芝麻雪糕

材料： 
炒香黑芝麻90克.     焗香腰果20克.    蛋黃2個.     糖70克.    牛奶250克.      淡忌廉280克.  

做法：
1.     先將黑芝麻和腰果用攪拌機攪成漿，
2.     將鮮奶加一半糖放煲內慢火煮熱，另一碗將蛋黃和餘下的糖攪散，分次將熱奶倒入蛋黃中拌勻後，將黑芝麻漿加入，再全倒回鍋內，用慢火煮至杰身，離火待涼。
3.   放涼後加入淡忌廉攪勻，便可放雪櫃過夜備用。
4.   取出倒入己冰過的雪糕機攪拌25分鐘至杰便可。

後記：  今次黑芝麻落得太多，味道好濃，及因材料份量落太多，放雪糕機後攪咗約12分鐘己差不多滿至頂部，我成日都係咁，次次都貪心，應該情願整少啲，可以攪到預定時間，都好過攪得唔夠時間，今次就好似食芝麻糊雪糕磚咁。下次黑芝麻可減1/3至60克。

提子雪糕

提子雪糕

材料： 
A.     去皮鮮提子300克.     糖60克.     檸檬汁1茶匙     
B.     牛奶350克.      淡忌廉200克.  

做法：
1.     先將去皮提子壓爛，然後加糖及檸檬汁用慢火煮至收乾水份，稍放涼。
2.     放涼後加入牛奶及淡忌廉拌勻，便可放雪櫃過夜備用。
3.     倒入預先冷凍的雪糕攪拌25分鐘至杰便可。

後記：   老公前2日買咗啲提子，但唔甜啲皮又厚又硤，唔好食，咁佢就話，你睇下可以用嚟整啲乜。吓，提子喎，之前從來無諗過提子呢種材料，只見過用嚟做蛋糕或果塔裝飾。最終決定用嚟整雪糕，因而家成日都係諗整乜嘢雪糕咋。不過就要多啲功夫，要逐粒提子去皮先。
今次提子煮得太耐，稍放涼已好杰，仲杰過平時的果醬，本來諗著加啲利賓收納來加色，不過又驚利賓納啲味道大搶，破壞咗原味。或者下次又可試下整利賓納雪糕或威路士提子汁雪糕，我諗都會好好味。
26/8/09後補：

今日係蘋果日報又有刊登換購雪糕機印花，有興趣網友唔好錯過喇。

芝士煙肉麵包

芝士煙肉麵包 


材料:  
老麵50g,   高筋麵粉160g,   全麥麵粉40g,    速發酵母4g,   細砂糖20g,   雞蛋30g,   牛油20g,    水90g.

內餡：   芝士碎

表面裝飾:   全蛋液少許,   芝士碎適量,     煙肉碎適量.

做法：
1.   除牛油外的材料搓揉成糰後，加入牛油搓至光滑階段。
2.   第一次發酵約75分鐘或2倍半後
3.   分割成6份，每份約68g。中間發酵20分鐘，捍扁包入芝士碎做型，再發酵至約2倍大，掃上蛋液後加上芝士及煙肉碎，入爐。
4.   180度焗約14分鐘。取出放涼。
                   

                                        

後記：  好似好耐都無整包，今次都係用手搓，雖然我搓麵糰手勢麻麻，但都好似好過用麵包機 D，所以麵包機都放到舖晒塵。不過未用過麵包機又唔會心息，因用麵包機搓咗30分鐘嘅麵糰都起唔到筋，睇落就好似OK，但一摸就知搓唔到要求，一拉就斷。唔知係唔係我買呢部係咁，定其他牌子都係咁呢。

今次用嘅芝士係我奶奶有個好似係荷蘭嘅親戚返嚟嘅手信，之前都比過我地2次，但係擺到發毛都無人食。今次試下用嚟整麵包都OK，我都唔記得點解之前嗰啲唔食咗佢。

新增說明文字

阿華田雪糕

阿華田雪糕

材料：    阿華田 70克.     糖50克.      牛奶300克.      淡忌廉250克.

做法：
將阿華田和糖加熱奶溶解攪勻。最後加淡忌廉拌勻，便可放雪櫃過夜備用。第二日倒入雪糕機攪拌30分鐘至杰便可冷凍儲存。

後記：  阿華田雪糕好易整又好好味，不過今次好似甜咗少少，下次可減少10-15克糖。阿仔話仲好味過朱古力雪糕添，佢真係唔識貨。

豆腐雪糕

豆腐雪糕

材料：      糖120g.     鮮奶100g.   蛋黃2隻.    嫩豆腐330g.    淡忌廉280g.    vanilla extract 1/2茶匙

做法：  
1.   將鮮奶加一半糖放煲內慢火煮熱，另一碗將蛋黃和餘下的糖攪散，分次將熱奶倒入蛋黃中拌勻後，再全倒回鍋內，用慢火煮至杰身，將壓爛的豆腐加入，煮熱即離火，待涼。
2.   放涼後加入淡忌廉及vanilla extract攪勻，雪凍。
3.   取出倒入己冰過的雪糕機攪拌20分鐘至杰便可。

後記：  仲有好多種雪糕都想整，今次整呢款又係個仔想食，咁仲好又唔洗我諗，又可滿足到佢嘅要求。嫩豆腐係街市買，先將佢啲邊和表皮切去，只係要嫩滑的部份，用壓薯器壓爛就得，如想滑啲可用攪拌機攪溶，因我通常都好懶，唔想洗咁多嘢，要求比較低。今次用嘅豆腐因係街市買，所以用火煮熱後先用就比較放心食用。

豆腐雪糕出嚟好有豆腐味，雖然仲有少少豆腐粒粒，但都影響唔到佢嘅好味。

朱古力雪糕

朱古力雪糕 (食譜參考Homemade Ice Cream - Very Chocolate Ice Cream)

材料：   糖95g.   鮮奶200g.   鹽1g.   無糖可可粉5g.    蛋黃1隻.   53%朱古力50g.   淡忌廉300g.   vanilla extract 1/2茶匙

做法：  
1. 將糖、鮮奶、鹽和可可粉放煲內慢火攪溶和煮熱，另一碗將蛋黃攪散，將一部份熱奶倒入蛋黃中拌勻後，再全倒回鍋內，用慢火煮至杰身。離火，倒入朱古力攪拌至溶。
2. 放涼後加入淡忌廉及vanilla extract攪勻，雪凍。
3. 取出倒入己冰過的雪糕機攪拌25分鐘至杰便可。

後記：   今次整雪糕鹽落得好咗啲，1g太多，味道有啲鹹鹹地，不過雪糕好滑。

三果雪糕

三果雪糕 (食譜參考Six Threes Ice Cream)

材料：  糖100g.   淡忌廉200g.   牛奶150g.    2隻香蕉約200g.   1個橙汁.     1個檸檬汁

做法：
1.   橙和檸檬先榨汁，香蕉壓茸
2.   牛奶加糖叮溶，再將所有材料攪勻放雪櫃雪涷備用。
3.   將雪糕溶液倒入已預冷的雪糕機攪拌25分鐘至杰。

後記：  Six Threes Ice Cream 個名唔知點釋，以我理解佢用6種材料和3種生果整，所以取名Six Threes，咁就改佢為三果雪糕啦。其實份量比例無跟足，因上次整過香蕉雪糕覺得好好味，所以今次都放2隻香蕉，再加1個橙和1個檸檬後，最後只可再加150g牛奶和200g淡忌廉，已是雪糕機的極限份量。
外國人的雪糕食譜，糖份比例真係嚇死人，一杯杯咁落，我自己就通常都會試下味先，唔夠甜先才加糖。非常推薦整香蕉雪糕，真係好好味。今次呢種加多咗橙和檸檬，就多咗一種清新的感覺，一樣都好好味。

奇異果雪糕

奇異果雪糕

材料：      奇異果約300克.    牛奶 150克.       糖 70克.       淡忌廉 200克.    vanila extract 1小匙

做法：
1.   雪榚機預先放冰格冰過夜。
2.   將奇異果壓爛然後加糖叮至糖溶。然後全部材料混合放雪櫃至涼。
3.   將冰透後的雪榚機取出，倒入雪糕溶液攪拌25分鐘變杰即可。

後記：  奇異果雪糕個樣好靚仔，有啲似薄荷朱古力雪糕啲色。唔知係咪乜嘢生果都可以整雪糕呢，網上見到有人用西瓜添，都要搵次試下先。
平時用開嚟食雪糕個玻璃碗仔都打爛晒，仲要每日一隻咁打爛，我情願佢一次過打爛，咁就唔洗掃2次，因掃玻璃真係要好小心，要清理得好仔細。人都話可以著住拖鞋先，但如果吉到狗仔，佢地就話唔到比我知。   

蛋白脆餅

蛋白脆餅 (食譜參考周老師的幸運籤餅)

材料：    蛋白113克.    砂糖75克.    鹽小小.   低筋麵粉105克.    奶粉16克.    溶化牛油65克

做法：
1.    所有材料依序加入盆中攪拌均勻。靜置15分鐘以上使之均質。
2.    蛋捲模燒熱，及擦一點油。
3.    淋一小匙麵糊在蛋捲烤模正中間。蓋上，用力壓一下，翻面，至兩面呈金黃色。把餅撕下取出。
4.    放在小杯子裡或網架上使其冷卻固定。放密實盒防潮。

後記：   上次留番的蛋白，就係因睇到周老師的幸運籤餅，佢只要蛋白，唔要蛋黃，而我又有蛋卷模，所以好想試下。但做起上嚟，和想像中係好有出入，我仲睇埋佢個video，全部材料和用具都齊，只係差對綿質手套，結果就由想像中的幸運籤餅，變咗做蛋白脆餅。

我太高估自己，梗係以為自己練咗鐵沙掌，等麵糊燒至金黃，用刀將佢起出，諗著用手黏起時，嘩辣到飛起，當時亦諗唔到可以用乜嘢嚟整形，終於就變成咁樣，雖然個樣唔靚，但就真係好好味。比我想像中更好味，唔單只好味過之前食過嘅幸運籤餅，可能因我整得燶燶地，令我搵返細個時食過一種瓦坑餅嗰種味道。
記得細個時，阿叔佢做行船行業，成日週圍去，好多時都會帶啲手信返嚟比我地，印象最深刻只得兩樣嘢，一樣就係好靚嘅蝴蝶標本，因從未見過咁大隻又五顏六色又閃令令嘅蝴蝶。另一樣就係可以食嘅瓦坑餅，係喺日本買返嚟，對於細個時，唔理邊個地方仲之吾係香港都係好覺得好遙遠好犀利。隻餅唔記得有無獨立包裝，可能有，因每次阿媽都會收係衣櫃入面，當時只有阿媽有衣櫃，我地幾姐弟只有櫃桶，久唔久先會取出嚟每人一塊分嚟食，餅嘅形狀就好似以前啲屋頂上一片片嘅瓦坑咁，深啡色，四四方方，彎彎地，但就比較厚比較硬，其實我都唔知佢個名係咪咁，之前都好似係SOGO見過，不過就無買到。

呢隻餅嘅味道就真係好似，就係要燶燶地咁先似。比起用全蛋嚟整嘅蛋卷仲好味。