提子雪糕

提子雪糕

材料： 
A.     去皮鮮提子300克.     糖60克.     檸檬汁1茶匙     
B.     牛奶350克.      淡忌廉200克.  

做法：
1.     先將去皮提子壓爛，然後加糖及檸檬汁用慢火煮至收乾水份，稍放涼。
2.     放涼後加入牛奶及淡忌廉拌勻，便可放雪櫃過夜備用。
3.     倒入預先冷凍的雪糕攪拌25分鐘至杰便可。

後記：   老公前2日買咗啲提子，但唔甜啲皮又厚又硤，唔好食，咁佢就話，你睇下可以用嚟整啲乜。吓，提子喎，之前從來無諗過提子呢種材料，只見過用嚟做蛋糕或果塔裝飾。最終決定用嚟整雪糕，因而家成日都係諗整乜嘢雪糕咋。不過就要多啲功夫，要逐粒提子去皮先。
今次提子煮得太耐，稍放涼已好杰，仲杰過平時的果醬，本來諗著加啲利賓收納來加色，不過又驚利賓納啲味道大搶，破壞咗原味。或者下次又可試下整利賓納雪糕或威路士提子汁雪糕，我諗都會好好味。
26/8/09後補：

今日係蘋果日報又有刊登換購雪糕機印花，有興趣網友唔好錯過喇。

芝士煙肉麵包

芝士煙肉麵包 


材料:  
老麵50g,   高筋麵粉160g,   全麥麵粉40g,    速發酵母4g,   細砂糖20g,   雞蛋30g,   牛油20g,    水90g.

內餡：   芝士碎

表面裝飾:   全蛋液少許,   芝士碎適量,     煙肉碎適量.

做法：
1.   除牛油外的材料搓揉成糰後，加入牛油搓至光滑階段。
2.   第一次發酵約75分鐘或2倍半後
3.   分割成6份，每份約68g。中間發酵20分鐘，捍扁包入芝士碎做型，再發酵至約2倍大，掃上蛋液後加上芝士及煙肉碎，入爐。
4.   180度焗約14分鐘。取出放涼。
                   

                                        

後記：  好似好耐都無整包，今次都係用手搓，雖然我搓麵糰手勢麻麻，但都好似好過用麵包機 D，所以麵包機都放到舖晒塵。不過未用過麵包機又唔會心息，因用麵包機搓咗30分鐘嘅麵糰都起唔到筋，睇落就好似OK，但一摸就知搓唔到要求，一拉就斷。唔知係唔係我買呢部係咁，定其他牌子都係咁呢。

今次用嘅芝士係我奶奶有個好似係荷蘭嘅親戚返嚟嘅手信，之前都比過我地2次，但係擺到發毛都無人食。今次試下用嚟整麵包都OK，我都唔記得點解之前嗰啲唔食咗佢。

新增說明文字

阿華田雪糕

阿華田雪糕

材料：    阿華田 70克.     糖50克.      牛奶300克.      淡忌廉250克.

做法：
將阿華田和糖加熱奶溶解攪勻。最後加淡忌廉拌勻，便可放雪櫃過夜備用。第二日倒入雪糕機攪拌30分鐘至杰便可冷凍儲存。

後記：  阿華田雪糕好易整又好好味，不過今次好似甜咗少少，下次可減少10-15克糖。阿仔話仲好味過朱古力雪糕添，佢真係唔識貨。

豆腐雪糕

豆腐雪糕

材料：      糖120g.     鮮奶100g.   蛋黃2隻.    嫩豆腐330g.    淡忌廉280g.    vanilla extract 1/2茶匙

做法：  
1.   將鮮奶加一半糖放煲內慢火煮熱，另一碗將蛋黃和餘下的糖攪散，分次將熱奶倒入蛋黃中拌勻後，再全倒回鍋內，用慢火煮至杰身，將壓爛的豆腐加入，煮熱即離火，待涼。
2.   放涼後加入淡忌廉及vanilla extract攪勻，雪凍。
3.   取出倒入己冰過的雪糕機攪拌20分鐘至杰便可。

後記：  仲有好多種雪糕都想整，今次整呢款又係個仔想食，咁仲好又唔洗我諗，又可滿足到佢嘅要求。嫩豆腐係街市買，先將佢啲邊和表皮切去，只係要嫩滑的部份，用壓薯器壓爛就得，如想滑啲可用攪拌機攪溶，因我通常都好懶，唔想洗咁多嘢，要求比較低。今次用嘅豆腐因係街市買，所以用火煮熱後先用就比較放心食用。

豆腐雪糕出嚟好有豆腐味，雖然仲有少少豆腐粒粒，但都影響唔到佢嘅好味。

朱古力雪糕

朱古力雪糕 (食譜參考Homemade Ice Cream - Very Chocolate Ice Cream)

材料：   糖95g.   鮮奶200g.   鹽1g.   無糖可可粉5g.    蛋黃1隻.   53%朱古力50g.   淡忌廉300g.   vanilla extract 1/2茶匙

做法：  
1. 將糖、鮮奶、鹽和可可粉放煲內慢火攪溶和煮熱，另一碗將蛋黃攪散，將一部份熱奶倒入蛋黃中拌勻後，再全倒回鍋內，用慢火煮至杰身。離火，倒入朱古力攪拌至溶。
2. 放涼後加入淡忌廉及vanilla extract攪勻，雪凍。
3. 取出倒入己冰過的雪糕機攪拌25分鐘至杰便可。

後記：   今次整雪糕鹽落得好咗啲，1g太多，味道有啲鹹鹹地，不過雪糕好滑。

三果雪糕

三果雪糕 (食譜參考Six Threes Ice Cream)

材料：  糖100g.   淡忌廉200g.   牛奶150g.    2隻香蕉約200g.   1個橙汁.     1個檸檬汁

做法：
1.   橙和檸檬先榨汁，香蕉壓茸
2.   牛奶加糖叮溶，再將所有材料攪勻放雪櫃雪涷備用。
3.   將雪糕溶液倒入已預冷的雪糕機攪拌25分鐘至杰。

後記：  Six Threes Ice Cream 個名唔知點釋，以我理解佢用6種材料和3種生果整，所以取名Six Threes，咁就改佢為三果雪糕啦。其實份量比例無跟足，因上次整過香蕉雪糕覺得好好味，所以今次都放2隻香蕉，再加1個橙和1個檸檬後，最後只可再加150g牛奶和200g淡忌廉，已是雪糕機的極限份量。
外國人的雪糕食譜，糖份比例真係嚇死人，一杯杯咁落，我自己就通常都會試下味先，唔夠甜先才加糖。非常推薦整香蕉雪糕，真係好好味。今次呢種加多咗橙和檸檬，就多咗一種清新的感覺，一樣都好好味。

奇異果雪糕

奇異果雪糕

材料：      奇異果約300克.    牛奶 150克.       糖 70克.       淡忌廉 200克.    vanila extract 1小匙

做法：
1.   雪榚機預先放冰格冰過夜。
2.   將奇異果壓爛然後加糖叮至糖溶。然後全部材料混合放雪櫃至涼。
3.   將冰透後的雪榚機取出，倒入雪糕溶液攪拌25分鐘變杰即可。

後記：  奇異果雪糕個樣好靚仔，有啲似薄荷朱古力雪糕啲色。唔知係咪乜嘢生果都可以整雪糕呢，網上見到有人用西瓜添，都要搵次試下先。
平時用開嚟食雪糕個玻璃碗仔都打爛晒，仲要每日一隻咁打爛，我情願佢一次過打爛，咁就唔洗掃2次，因掃玻璃真係要好小心，要清理得好仔細。人都話可以著住拖鞋先，但如果吉到狗仔，佢地就話唔到比我知。   

蛋白脆餅

蛋白脆餅 (食譜參考周老師的幸運籤餅)

材料：    蛋白113克.    砂糖75克.    鹽小小.   低筋麵粉105克.    奶粉16克.    溶化牛油65克

做法：
1.    所有材料依序加入盆中攪拌均勻。靜置15分鐘以上使之均質。
2.    蛋捲模燒熱，及擦一點油。
3.    淋一小匙麵糊在蛋捲烤模正中間。蓋上，用力壓一下，翻面，至兩面呈金黃色。把餅撕下取出。
4.    放在小杯子裡或網架上使其冷卻固定。放密實盒防潮。

後記：   上次留番的蛋白，就係因睇到周老師的幸運籤餅，佢只要蛋白，唔要蛋黃，而我又有蛋卷模，所以好想試下。但做起上嚟，和想像中係好有出入，我仲睇埋佢個video，全部材料和用具都齊，只係差對綿質手套，結果就由想像中的幸運籤餅，變咗做蛋白脆餅。

我太高估自己，梗係以為自己練咗鐵沙掌，等麵糊燒至金黃，用刀將佢起出，諗著用手黏起時，嘩辣到飛起，當時亦諗唔到可以用乜嘢嚟整形，終於就變成咁樣，雖然個樣唔靚，但就真係好好味。比我想像中更好味，唔單只好味過之前食過嘅幸運籤餅，可能因我整得燶燶地，令我搵返細個時食過一種瓦坑餅嗰種味道。
記得細個時，阿叔佢做行船行業，成日週圍去，好多時都會帶啲手信返嚟比我地，印象最深刻只得兩樣嘢，一樣就係好靚嘅蝴蝶標本，因從未見過咁大隻又五顏六色又閃令令嘅蝴蝶。另一樣就係可以食嘅瓦坑餅，係喺日本買返嚟，對於細個時，唔理邊個地方仲之吾係香港都係好覺得好遙遠好犀利。隻餅唔記得有無獨立包裝，可能有，因每次阿媽都會收係衣櫃入面，當時只有阿媽有衣櫃，我地幾姐弟只有櫃桶，久唔久先會取出嚟每人一塊分嚟食，餅嘅形狀就好似以前啲屋頂上一片片嘅瓦坑咁，深啡色，四四方方，彎彎地，但就比較厚比較硬，其實我都唔知佢個名係咪咁，之前都好似係SOGO見過，不過就無買到。

呢隻餅嘅味道就真係好似，就係要燶燶地咁先似。比起用全蛋嚟整嘅蛋卷仲好味。

榛子焦糖雪糕

榛子焦糖雪糕

材料： 
蛋黃3隻.    糖20克.   牛奶400克.    淡忌廉250克.    糖50克.     榛子醬50克

做法：
1.     先將蛋黃和20克糖打勻，
2.     另將50g糖放煲煮至焦色，將100g的暖淡忌廉分次加進煲內至和焦糖拌和，再加入牛奶煮熱，
3.     分次將(2)倒入(1)中拌勻後，再全倒回鍋內，加入榛子醬用慢火煮至杰身。
4.     放涼後加入剩下的淡忌廉拌勻，便可放雪櫃雪過夜備用。
5.     取出倒入己冰過的雪糕機攪拌25分鐘至杰便可。
                         

後記：  呢隻雪糕係個仔要求要整，佢話係外面食過覺得好好味。係網上找一輪，又係出現好多版本，最後都係參考各方食譜及自己的主意。
雪糕出嚟啲味道我自己就覺得好似拖肥糖味，不過就梗係無拖肥糖咁甜啦。問返個仔嘅意見，佢話個味道都好似，都好好味。
本來整雪糕我都好少用蛋黃煮嚟整，不過就係因為要整下一個食譜，需要用到蛋白，所要就等登用咗啲蛋黃先。

榴槤芒果雪糕

榴槤芒果雪糕

材料： 
(A)  鮮奶 (200克 + 100克),    蛋 1隻,    砂糖 70克,    榴槤肉380克,    芒果肉  200克,   
(B)  淡忌廉 200克

做法：
1. 榴連肉和芒果肉加100克牛奶放攪拌機攪打成泥。
2. 將雞蛋及砂糖打散至奶黃色，然後將200克奶放入煲中煮至微熱，將奶分次倒入蛋糊中拌勻後，全倒回煲內，已慢火煮至杰身即可熄火，不需煮滾，待涼。
3. 放涼後，只取用500克及將淡忌廉200克加入拌勻及放雪櫃放過夜。
4. 第二天倒入已冰8小時以上的雪糕機攪拌30分鐘即可。

後記：  買咗榴槤和芒果，但兩種生果都唔甜，免強食咗大部分，剩餘的決定用來整雪糕。果肉材料太多，一次過整唔晒，所以要分2次整。雪糕榴槤味全部蓋過芒果味，但都整體好好味。
雪糕真係夏天最佳甜品，食極都食唔厭，一到差不多食完就諗著整下一款。 

咖啡雪糕

咖啡雪糕

材料： 
即溶咖啡 10克.     熱水1/4杯.      糖60克.      牛奶330克.      淡忌廉240克.

做法：
先將即溶咖啡用熱水開勻，再加糖溶解攪勻。最後落牛奶及淡忌廉拌勻，便可放雪櫃過夜備用。第二日倒入雪糕機攪拌30分鐘至杰便可冷凍儲存。

後記：  這個份量比較多咗少少，攪到25分鐘後，雪糕開始拈到蓋頂，令到近頂部的雪糕有少少溶解現象，冰凍後可見到一部份組織無咁綿密。

藍莓雪糕

藍莓雪糕

材料： 
A.     藍莓2盒 (260克).     糖110克.      水1大匙.        RUM酒 3克     
B.      牛奶250克.      淡忌廉210克.     vanila extract 半茶匙

做法：
1.     先將材料(A)除RUM酒外慢火煮爛至收乾水份，稍放涼後加RUM酒攪勻。
2.     放涼後加入vanila extract、牛奶及淡忌廉拌勻，便可放雪櫃過夜備用。
3.     倒入雪糕攪拌30分鐘至杰便可。

後記：  係街市臨收檔時見到有$10二盒美國藍莓賣，好底呀，咁梗係拿拿聲買返2盒先。網上找到好多個藍莓雪糕食譜，有要用蛋及無蛋食譜，問番個仔，佢鐘意邊類，佢都係喜歡清爽啲，咁仲簡單啦，全部材料攪勻就整得，唔使再煮個吉士底。

今次用雪糕機攪拌好後，就咁成筒放番入冰格冰佢2個鐘後才轉盒。藍莓雪糕好多果肉仲好好味添。

香蕉雪糕

香蕉雪糕

材料：        熟香蕉2條   (約186克).       牛奶 250克.       糖 45克.       淡忌廉 150克.    vanila extract 1小匙

做法：
雪榚機預先放冰格冰過夜。先將部份牛奶和糖叮溶，另香蕉壓爛。然後全部材料混合放雪櫃至涼。冰透後的雪榚機取出，倒入雪糕溶液攪拌25分鐘變杰即可。

後記：
終於比我換到部雪榚機喇。不過唔係我自己親自換，係托朋友幫我換，真係要唔該佢先。
說明書話雪糕機個凍碗最好要在 – 18度以下的冰格冰8小時己上，及材料要預先雪凍。我將材料臨攪拌前放入冰格冰佢半小時至45分鐘才用，確保夠凍。部機好細部，好似個2人飯煲咁細架咋。
香蕉雪糕真係好好味，每次材料比例都可自己調校，落多啲淡忌廉就會變得creamy啲，多啲牛奶就清爽啲。第一次整都幾滿意，不過好似仲未攪得夠杰身。一倒出來就好快會溶。
之前無用雪糕機整的雪糕冰凍後要取出放一陣才可筆出，但用機整嘅就算冰凍後都可即刻筆到出嚟食。

片段係攪拌至20分鐘時(本來係YAHOO有一個VIDEO，但轉來時己不見了)

草莓慕士蛋糕

草莓慕士蛋糕

海綿蛋糕

材料：    雞蛋2個.      砂糖 50克      蜜糖5克.     麵粉60克.     牛奶20克.      牛油10克

做法：
1.    將蛋置入不鏽綱盆內打散後加入砂糖及蜜糖。以隔水加熱的方式利用打蛋器迅速攪拌，攪拌到提起時殘留捧子上的蛋漿能靜止數秒不會往下滑動即可停止攪拌。
2.     接著分兩次將篩過麵粉倒入盆內，利用打蛋器由下往上仔細攪拌均勻，直看不見麵粉的顆粒為止。
3.     最後加入奶和加熱溶解後的牛油，儘快攪拌均勻。
4.     將麵糊倒入模後敲兩三下，再放入己預熱170度焗爐焗30分鐘左右。待涼切片備用。

草莓慕士材料：        草莓泥100克.        魚膠粉5克.          水30克.          砂糖38克.            淡忌廉200克

做法：
1.     魚膠粉和水先叮溶備用，淡忌廉打至6分發備用
2.     草莓泥加入魚膠粉水攪勻，再加入淡忌廉拌勻。
組合：  先在模中放上蛋糕片，然後將部份草莓慕士倒落蛋糕片上至完全覆蓋，再放上另外一塊蛋糕片，將餘下的草莓慕士全倒進掃平便可。放入雪櫃至凝固。

後記：    好耐無整慕士蛋糕，亦係第一次用草莓泥，發覺好似用泥整慕士比較用果醬，出嚟較果會順滑啲。


最近好想買部雪糕機，噚日係蘋果日報睇見7-11有雪糕機換購，只需$168，每次可整1kg雪糕，一陣放工去睇下先，因報紙無講到係用乾電定濕電及size尺寸。
後補資料，這台雪糕機是用濕電，但size未知，只知唔係好大部。噚日放工走去7仔問，啲職員好似唔知有雪糕機換，後尾問返其他人，先知可能廣告出咗，但啲貨無咁快到。打去億世通問，電話响極都無人聽。
1公升雪糕機

產品編號	IC1000
原價	$398
換購價	$168
特價	-
特點及功能	1公升雪糕機: 先預冷內鍋,按掣即做.
換購點	億世集團有限公司門市部 - 九龍觀塘成業街20號怡生工業大廈10樓
其他資料

咖啡杏仁曲奇

咖啡杏仁曲奇(食譜參考自西式甜品一書)

材料：   牛油120克.     糖霜50克.     低筋麵粉175克.      杏仁片40克.      即溶咖啡1湯匙.      熱水1湯匙

做法：
1.  麵粉篩勻待用，杏仁片預先焗香。用熱水先調溶即溶咖啡
2.  牛油與糖打至奶白色成忌廉狀
3.  將咖啡溶液加入(2)中打勻
4.  再將麵粉加入(3)中拌勻，下杏仁片拌勻成粉糰，先雪片刻，再將粉糰放入保鮮紙中整成長條狀，放冰格雪約2小時
5.  將粉糰取出切成一塊塊，放入已預熱的焗爐用165 度焗10分鐘，轉150度焗多5分鐘即可。

後記：  又係整呢款曲奇，睇番上次原來有成年半未整過，其實杏仁片買咗好耐，差不多夠期，所以要快快整。
今次好似無上次整得咁靚咁，不過都好鬆脆。

金牛角麵包

金牛角麵包 (食譜 Carol 自在生活)

材料(約做4個):  
老麵50g,   高筋麵粉90g,   低筋麵粉60g,   速發酵母(instant  dry yeast)1/4茶匙,   鹽1/4茶匙,   奶粉15g,    細砂糖25g,   牛奶40g,   雞蛋25g,   牛油15g,    小麥胚1大匙(我無落)
表面裝飾:   全蛋液少許,   白芝麻少許,    牛油適量

做法:
1.    將所有材料放入鋼盆中混合均勻再攪拌搓揉6-7分鐘成為一個不黏手且無粉粒狀態的麵團
2.    桌上灑些高筋麵粉,麵團表面也灑些高筋麵粉
3.    用橄麵棍慢慢將麵團桿開成為一個正方形大薄片
4.    將麵團對折然後再度桿開
5.    重覆桿開對折這個步驟至少12-15次以上(我只桿咗5次),使得麵團變的非常細緻光滑
6.    最後將麵團桿成大薄片,由一側密實捲起成為柱狀
7.    平均切成4等份(每一個約80g),然後滾成圓形
8.    在小麵團表面罩上擰乾的濕布,休息20分鐘(30分鐘)9.    休息好的小麵團用手搓揉成為水滴形狀
10.  一手拉著水滴形麵團,一手用桿麵棍桿壓,將麵團桿成約35cm的長形麵皮
11.  前端切出約10cm的切口
12.  將切口往2邊拉開,由上往下慢慢密實捲起
13.  尖端處用手搓成尖型
14.  將2端往內捲成為牛角型,收口朝下,間隔整齊排入烤盤中
15.  整盤放入烤箱中,麵團表面噴些水然後蓋上烤箱門,再發酵40分鐘(最後發酵1.5小時)16.  發酵好前8-10分鐘,將烤盤從烤箱中取出,烤箱打開預熱180度
17.  進烤箱前在發好的麵團上輕輕刷上一層全蛋液,灑上一些白芝麻
18.  放進已經預熱至180度c的烤箱中烘烤10分鐘時取出,在每一個牛角包表面抹上一層牛油,再放回烤箱繼續烘烤5分鐘
19.  再度將烤盤取出,將烤盤上牛角麵包上塗抹上牛油,再放回烤箱烘烤5分鐘至顏色呈現均勻金黃色即可(我只塗抺咗一次牛油)

後記：

本來都係做17小時中種麵包，但雪咗中種4日都無時間整，為有將中種變成老麵嚟用。
食譜差不多全篇複製過來，原作非常詳盡。但我在製作時都係偷工減料。

花生醬曲奇

花生醬曲奇 (食譜君之)

材料：    低筋麵粉100克，   雞蛋10克，    牛油65克，   花生醬45克，   砂糖50克

做法：
1. 牛油軟化後，加砂糖打發至忌廉狀，再加蛋液打發至混合。
2. 將花生醬加入打至均勻後，最後篩入麵粉切底混合均匀。
3. 成團後，放入膠袋搓成圓柱型，放入冰格冷藏至硬身。
4. 取出麵糰切成一片片，放入已預熱170度焗爐，焗約10分鐘後轉150度焗多10分鐘或金黃即可。

後記：   花生醬係自己整，只係將花生炒香，去衣和用攪拌機打至成醬即可，好容易。花生醬比原食譜落多10克，因橫掂整多咗，梗係要落多少少啦，有剩仲攞嚟塗麵包添，味道都唔錯架。

呢隻曲奇都幾好味，口感亦都好鬆脆。

鹹牛肉麵包 (17小時中種)

鹹牛肉麵包 (17小時中種)

中種麵糰材料：   高筋麵粉140g.    速發酵母1g.     水90g.  

做法：  搓到擴展階段，靜置15分鐘後，放進冰箱低溫冷藏17小時

主麵糰材料：   高筋麵粉60g.     速發酵母1g.     鹽少許.     牛油 20g.      糖 16g.     奶粉8.     水40g.

做法：
1.   除牛油外的主麵糰材料搓揉成糰後，加入中種麵糰，(17小時低溫冷藏發酵)，最後加入牛油打至完成階段。
2.   延遲發酵20分鐘後
3.   中間分割，分割成6份，約60g。發酵20分鐘，包餡做型，再發酵至約2倍大入爐。
4.   180度焗約12分鐘。取出放涼。

後記：  其實整咗2款，另一款火腿芝士包，無芝士碎鋪面嗰2個。因先生不食牛，所以鹹牛肉麵包係我同個仔食，呢個放咗太多餡，令到麵包有空洞。今次個麵糰用麵包機打完，再取出撻一輪先處理，發覺麵包機真係好難打到麵糰有筋性。
呢排好懶，無乜意欲寫網誌，但其實睇番自己整和寫嘅記錄又真係有用架喎。好多時諗起想食乜嘢都會摷返出嚟整。呢排都整咗幾樣嘢，份量加減又無mark低，再唔寫就唔記得份量架喇。    

粟米戚風蛋糕

粟米戚風蛋糕 (食譜愛和自由)

材料 (10吋水泡模)：  
A.   蛋白4個.   砂糖 40克.  
B.   低筋粉60克.   蛋黃4個.  砂糖15克.   煮食油30ml.   罐頭粟米汁40克.     
C.   罐頭粟米粒40克.      少許低粉  

做法：
1.   先將蛋黃加15克糖打發。再加入油及粟米汁完全拌勻混合後，再加入粉拌勻。
2.   蛋白分3次加入40克糖，打到乾性發泡。
3.   將1/3的蛋白霜加入(1)，用手動打蛋器攪拌後，再全部倒回蛋白霜中，切底拌勻，最係加入沾了低筋粉的米粒拌勻入模。拿起模dun兩下。
4.   放入已預熱180度的焗爐，焗40分鐘(如中途覺得蛋糕面太焦，可蓋鍚紙)。出爐後馬上倒扣。

後記：    最近2次打的蛋白霜，未到乾性發泡，個尖尖仲係灣嘅，但己覺得蛋白霜出現類似綿花絮咁，所以當加入蛋糊時，蛋白好明顯咁消泡。但啲蛋又唔似假蛋吖。