紅莓曲奇

紅莓曲奇( 食譜來自亞 B)

材料:  牛油75克.   砂糖45克.   蛋38克.   發粉1克.   奶粉半湯匙.     低筋粉100克.   杏仁粉45克.   紅莓乾50克 

做 法:    

1.  所有粉類預先篩好，紅莓乾先用水浸透備用。
2.  將已軟化牛油加入砂糖打至忌廉狀。

3.  再分次加入蛋黄攪拌均勻後，加入低筋粉、發粉、奶粉及杏仁粉，最後加入紅莓乾攪拌均勻。

4.  成團後，放入膠袋搓成圓柱型，放入冰格冷藏至硬身。
5.  取出麵糰切成一片片，放入已預熱170度焗爐，焗約10分鐘後轉150度焗多10分鐘或金黃即可。

後記：  其實呢款曲奇之前整過一次，因上次相機壞咗，無影到留底，亦唔記得係咪用呢個食譜，不過唔緊要，最緊要好食就得。上次整只係記得紅莓乾好"UN"，因無預先浸淋，今次浸咗先焗就好好多。自己覺得要雪到硬啲曲奇唔落發粉都可以，口感會無咁鬆。

原食譜只落半隻蛋黃，但如果用少少又剩番一部份蛋實嘥咗，次次之後都會唔記得，所以就用晒成隻，麵糰出嚟比較濕。呢隻係初生蛋，所以特別細隻，平時就好少會買呢類蛋，今次係類似以物換物咁得返嚟。話說我先生幫襯開買嘢嘅鋪頭，佢地話好多時唔夠膠袋和報紙，咁我地又有呢類剩餘物品，行開時咪順便囉比佢地用，點知囉咗幾次後，佢地就好客氣咁硬要比盒初生蛋過我地。雖然雙方的物品都唔係乜嘢貴重嘢，但咁樣交換法好有以前啲農村feel，好開心。

日式芝士蛋糕(芝士片)

 日式芝士蛋糕(芝士片)

材料: (6吋模)

低筋麵粉 27g.   粟粉 3g.  蛋 3隻.   糖 45g.   卡夫芝士 4片.   淡忌廉 35g.   淡奶20g.    水20g. 
　
做法：

1) 將芝士片、淡忌廉、淡奶和水坐熱水攪溶至冇粒粒，完全溶解。
2) 離開熱水後分3次加入蛋黃攪勻，再篩入粉類拌勻。
3) 將蛋白分3次加入糖打發至8成企身左右，將1/3蛋白加入麵糊中拌勻，再全部倒進蛋白中拌勻。

4) 放入已預熱170度的焗爐(預先在爐內放入網架及有水的焗盆)，約10分鐘後轉150度，可中途蓋上鍚紙，免蛋糕面太燶，全程焗約60分鐘。

後記：  上次買盒細嘅淡忌廉，整完蛋糕卷和夾心朱古力後，仲用剩少少，唔知整乜好，又唔想嘥咗去，最後雜不lung咁整咗芝士蛋糕。點解雜不lung，因取低筋麵粉時，先發現原來上次最後用剩得27g，咁為有加少少平時煮餸用嘅粟粉。唔夠淡忌廉，就加淡奶和水搭夠。不過蛋糕出嚟都好好味，唔覺同之前整嘅有太大分別。可能自己要求唔係太高啦。

椰蓉餡麵包

椰蓉餡麵包(參考e-pan Studio)

材料：  高筋粉200g.   水104g.    雞蛋20g.    砂糖40g.     牛油20g.     即溶酵母4g.     奶粉7g.

椰蓉餡料：  軟化牛油 15g.    砂糖 45g.   蛋 25g.    椰絲 45g.  

椰蓉做法：

餡料一起攪拌，分成6份。

做法：

1.  將乾性材料放入盆中，以手稍微混合均勻。

2.  將2/3液態材料倒入盆中以手混合均勻後，再加剩餘1/3混合均勻。

3.  取出搓成較不黏手的麵糰時，將麵糰壓平，然後把牛油塗在麵糰中間均勻抺平。直到搓至麵糰光滑。

4.  將麵糰滾圓放入容器中進入基本發酵90分鐘，翻面再發酵30分鐘。

5.  取出排氣，分割成6份(每份約62g)，滾圓靜置約30分鐘。

6.  醒發好的麵糰，用棍搌開，將一頭界開成梳形，放上椰蓉餡，捲起並將邊沿壓實，排入烤盤。進行最後發酵，約40分鐘，發酵到2倍大。塗上蛋液。

7.  放進己預熱200度焗爐，焗約11分鐘左右，烤至表面深黄色即可。

                              

後記： 我幾時會整麵包呢？好多時都係當遊走各網頁時，忽然間睇見一款麵包，覺得好吸引，咁就會好想整，如果唔盡快整，一過咗一段時間又會提唔起勁。因用手搓麵糰對我來講都略為吃力。食譜參考自日本網頁，日文我一啲都唔識，只係認得幾個漢字，就算由翻譯網譯咗，都唔係好知佢講乜，所以都係估估下。第一次做麵糰翻面再發酵，只係跟時間，而無睇發酵大細。不過當日有約25度的溫度，都應該唔會差好遠。麵包出嚟口感都軟熟，隔咗2晚後食都未變硬。餡料就整最簡單易整的椰蓉餡。

夾心朱古力

夾心朱古力 (約20粒)

材料：　
1.   Valrhona 53%朱古力 適量
2.   Valrhona 53%朱古力 30g.   淡忌廉20g.   蘭姆酒4g.  
3.   花生仁(先焗香).

做法：　
1.     把30g朱古力先用刀切碎，加淡忌廉坐熱水或放微波爐分數次(每次約1分鐘)加熱。然後輕輕攪拌至巧克力融化，放涼後加入蘭姆酒攪勻備用。
2.     將部分材料(1)的朱古力放容器於微波爐加熱約20秒，輕輕攪拌至溶，將己溶的朱古力用毛筆塗在模內，放雪櫃一陣，取出再塗一層，重覆直到塗過三層，或放模在光線下光線不穿透。
3.     再在已塗朱古力的模注入(1)至6-7成滿，放入花生仁後，放雪櫃至稍為凝固，取出於表面再塗上朱古力溶液封口，放雪櫃一會即可食用。吃不完可以放回雪櫃冷藏保存。

後記：  睇番上次整朱古力已經係舊年7月時。過年前諗著放成18日年假，所以買定好多材料，點知放完假都好似無乜嘢整過。其中包括買咗啲朱古力條和朱古力粒，雖然新年時都食咗啲有牌子嘅朱古力，但都好似唔係好合自己口味，所以決定再次整嚟食，今次比例上加多咗一倍酒的份量，所以真係香好多，雖然果仁方面只係加咗花生仁，但都唔錯。個仔第一次食，佢都話好好味，仲話點解整咁少。放朱古力入口咬時，感到外層朱古力仲好脆添。全部朱古力用咗約100克。

掃完模外層後，加朱古力忌廉餡。

放上花生仁

再注入朱古力忌廉餡至9成

最後用朱古力溶液封口

紅豆綠茶蛋糕卷

紅豆綠茶蛋糕卷

蛋糕體:  (烤盤為24cm乘21cm)

材料：   低筋粉50克.   蛋3隻.    砂糖45克     奶30克.

做法：
1.    烤箱預熱180度，烤盤鋪上鍚紙，低粉先過篩
2.    蛋白分次加砂糖打發至企身的程度，加入蛋黃，用打蛋器拌勻。
3.    接著篩入低筋粉充分混合，拌至沒有粉狀物為止。最後分2次加入奶攪拌均勻即可。
4.    將麵糊倒入烤盤中抺平，輕敲幾下後入焗爐180度約焗11分鐘，取出放在網架上，撕低側邊錫紙，再用鑊蓋在上罩著(用作保濕)，然後放至涼透。

餡料：   淡忌廉110g.   糖粉14g.    綠茶粉3g.   奶25g.    紅豆蓉約200g 

做法：
1.    綠茶粉加奶先攪溶，
2.    淡忌廉加糖粉打至8成發，加入(1)拌勻放雪櫃備用。
3.    將冷卻後的蛋糕片蓋上一張保鮮紙後翻起，除掉鍚紙。再將綠茶忌廉全部抺在蛋糕片上，塗抹均勻後，放上紅豆餡後捲起，用保鮮紙包緊放雪櫃雪凍即可。

後記：  尋日放假，先生問今日整乜野蛋糕呀，既然開到口，本來無諗著整都要整啦，咁為有快啲整完先帶狗仔行街街。好似好耐無整蛋糕卷，睇吓有乜材料先，之前整紅豆糕用剩嘅紅豆，煮咗好多紅豆餡，仲有啲綠茶粉，咁就決定整紅豆綠茶蛋糕卷。因時間關係，紅豆餡無預先雪硬成條，及整得太大舊，出嚟個樣唔係咁靚。屋企呢排都無買牛奶，只係將花奶加水以1:1調成牛奶。

花生糊

花生糊

材料 ：   花生仁140g     白芝麻 20g.     米35g.     水 4 - 5杯      砂糖130g.    淡奶適量

做法 ：
1.  先將白芝麻洗淨，瀝乾水分，用鑊炒香，放涼。花生仁放鑊炒香，放涼去衣。
2.  把花生仁、白芝麻和浸透的白米放有隔喳網的攪拌機，加2杯水攪打成槳，約2分鐘，然後將漿水倒進煲裏，再放2杯水到攪拌機續打2分鐘至微粒更加幼細，然後全倒進煲裏(喳不要的)
3.  將冰糖碎加入花生米水中同煮，邊煮邊攪，以防黏底，至糖溶及滾起即可。如喜歡可倒入淡奶，增添香味。

後記： 
呢排整咗好多次糊食，芝麻糊、杏仁糊和花生糊。芝麻糊最好食，已經食咗3次，而覺得花生糊就比較漏。

花生糊出嚟顏色比較淡，花生味都夠濃，無加淡奶都好好味。自己唔係好鐘意食太杰，所以米嘅份量就唔落咁多。

芝麻糊

芝麻糊

材料：  黑芝麻90g.   白米60g.   水4-5杯.    冰糖120-130g..

做法：

1.     白米洗淨浸水2小時。黑芝麻洗淨，用白鑊炒香，炒到啪啪聲，盛起待凉
2.     把已炒過的黑芝麻和浸過的白米放有隔喳網的攪拌機，加2杯水攪打成槳，約2分鐘，然後將漿水倒進煲裏，再放2杯水到攪拌機續打2分鐘至微粒更加幼細，然後全倒進煲裏(喳不要的)。
3.     將冰糖碎加入芝麻米水中同煮，邊煮邊攪，以防黏底，至糖溶及滾起即可。

後記：

最近買咗一部攪拌機，舊嗰部已老化到漏水。PHILIP有埋隔喳網，真係方便啲，所以整咗芝麻糊，杏仁糊嚟試吓，效果唔錯，遲啲再試吓花生糊先。圖片中的芝麻糊係第一次整時影的，無隔喳，口感確係差小小，不過連喳食應該有益啲。呢個份量嘅米好似杰咗少少，下次試吓50g米，100g芝麻先。

第一次用呢部機整豆漿時，攪咗無幾耐，就聞到燶燶地味，原來部機出緊煙，後尾睇說明書先知，原來係唔可以攪多過3分鐘，有無攪錯，而家啲機咁喳嘅。自己覺得好似無攪到3分鐘咁耐架，不過好彩部機都仲用到。所以而家每次都SET定時間制，每次唔多過2分半鐘。但呢部機整豆漿就唔係隔得好清。

芝麻蛋卷

芝麻蛋卷(食譜參考TPC復活日記)

材料:    牛油50g.    砂糖65g.     蛋2隻.     低筋粉65g.     香草粉小小.   炒香芝麻15g. 

做法:

1.   低筋粉過篩
2.   將牛油及砂糖攪打至糖溶化
3.   分次加入蛋液攪拌均勻後續加入粉類拌勻
4.   攪拌均勻後，將蛋卷模加熱後放入一小匙麵糊，合上模壓實，烘烤至熟，趁熱捲起，待涼即可。

後記：  上次整時發覺有牛油由模邊漏出嚟，所以今次加多10g低筋粉試試，但都一樣有這情況出現，加咗粉都無影響到個鬆脆度，加咗芝麻仲香口啲添，真係好好味。今次教細咗個火嚟整，所以無咁燶喇。

香蕉朱古力蛋糕

香蕉朱古力蛋糕 (食譜自在生活)

材料:

牛油110g,     砂糖80g,     低筋麵粉120g,     可可粉50g,      蘇打粉1茶匙,       雞蛋2隻,     淡忌廉30g,      香蕉泥180g,       巴西果仁40g,      朱古力碎30g,

做法:

1.    焗模先鋪上一層烤焙紙，香蕉先壓成泥，果仁預先用140度焗香(約8分鐘)後切碎。
2.    牛油加砂糖用打蛋器打至泛白呈現毛絨絨狀態
3.    雞蛋分次加入，每一次都要確實攪拌均勻才加下一顆
4.    再加入淡忌廉，香蕉泥攪拌均勻
5.    再將過篩的粉類分2次加入攪拌均勻，最後將果仁碎及朱古力碎加入攪拌均勻
6.    麵糊倒入焗模中，用橡皮括刀整平，放進已經預熱至165度c的焗爐中焗約50分鐘，在焗到20分鐘的時候取出，用刀在蛋糕中央界一線，再放回焗爐中繼續焗至竹籤插入沒有黏即可。
7.    出爐後馬上倒出放到鐵網上放涼。

後記：     蛋糕整出嚟真係好黑，相片已經再調教，差啲都睇唔見蛋糕本身。材料有部份減料，香蕉、朱古力和果仁都減咗啲，蛋糕覺得應加合桃夾啲，但屋企只得巴西果仁，都攞嚟試試，出嚟味道唔係好夾。蛋糕口感好好，好軟熟。但總係樣樣味道都好似差啲啲，香蕉味差啲啲，甜味又好似差啲啲，果仁味又無合桃咁香。可能就係減料嘅後果喇。

豆沙包

豆沙包

發麵材料：   低筋麵粉24g.   中筋麵粉96g(低筋48g+高筋48g).    糖30g.    速溶酵母2g.    水70g.    植物油3g.    紅豆茸 200g

做法：

1. 將麵粉放容器內，其餘材料放在中間，慢慢加入水，攪拌至均勻。
2. 再將麵粉揉成光滑麵糰，醒40分鐘。

3. 將發麵麵糰排氣後，再分成8份約25g一份，將一份的麵糰壓扁加入23g紅豆餡，收口係底，放在牛油紙上。

4. 放入蒸籠內，放鑊中蓋上鑊蓋，再發酵45分鐘。
5. 真接凍水開火蒸，以中火蒸約10分鐘，收至慢火蒸2分鐘，熄火，留在鑊內約5分鐘後取出。

後記： 

平時包好餡後只需再發酵20-30左右，因呢幾日天氣凍，成日覺得麵糰無發大，最後等到45分鐘都要開火蒸。蒸好後好彩又無發過頭。好多時包包蒸出嚟都皺皮，今次試下咁樣調教細火後才熄火，包包又真係無塌陷喎。

材料今次無放泡打粉，只放酵母，口感都唔係好覺有分別。紅豆包都係百吃不厭。