合桃提子牛油蛋糕

 合桃提子牛油蛋糕

材料(8個)：  牛油 90g.   蛋2隻.   糖 75g.  低筋粉100g.  發粉1/3茶匙.  提子干50g.   合桃30g

做法﹕
1. 粉類過篩，合桃預先烤烘備用，提子干用水浸透。
2. 牛油放軟加糖打至發白成忌廉狀，分次加入雞蛋，每加一次必須與牛油完全打勻，
3. 將粉類加入拌勻，最後加入提子干攪拌均勻。
4. 將麵糰裝入紙模至8成滿，最後放上合桃碎即可
5. 預熱180度焗爐，焗約25分鐘或用竹籤插入沒黏著物即可。

後記： 牛油蛋糕今次分成小杯裝焗，焗好後就咁食就外皮比較脆而裏面就好軟熟，但隔天之後食就比較香，但比較上嚟覺得用大蛋糕模焗口感比較好。

紅豆批

紅豆批(6"模)

材料(可做2個)：  牛油60g.  砂糖 35g.  低筋麵粉 120g.  杏仁粉30g.    雞蛋 1/2隻.    香草精約2滴  

紅豆餡材料：  紅豆茸100g.  糖15g.  牛奶20g.  淡忌廉24g.  蛋20g.  粟粉12g.

批皮做法：
1.  牛油放軟打起，再分次加砂糖打至淺色
2.  分次加入雞蛋和香草精拌勻，再加入杏仁粉攪拌
3.  篩入低粉拌至9成即可，用保鮮紙包好雪30分鐘
4.  取出之粉團輕輕搓壓成糰，然後擀成批皮(可用食物袋/保鮮紙包住去擀，免痴底)，然後按入批模，用叉剌孔，用豆類或重物壓著來焗己防拱起
5.  放入已預熱180度的焗爐底層焗10分鐘，取去壓著物，再焗10分鐘，取出
6.  將所有紅豆餡撈勻，倒入批底，180度焗約15分鐘即可。

後記：通常我每次整批都整2個，因2個6吋批底較容易處理。本來買咗忌廉芝士諗著整芝士批，但又驚用唔晒250g芝士，開咗會好易變色，所以就試吓整紅豆批。紅豆餡材料都係自己試吓調教，有乜嘢就落乜嘢，成品出嚟紅豆餡比較實，下次可落多小小牛奶或淡忌廉，一來覺得唔夠滿，和我比較喜歡嫩滑的口感多些。

法式蘋果批

法式蘋果批(6"模)

材料(可做2個)：  牛油60g.  砂糖 35g.  低筋麵粉 120g.  杏仁粉30g.    雞蛋 1/2隻.    香草精約2滴  

撻皮做法：
1.  牛油放軟打起，再分次加砂糖打至淺色
2.  分次加入雞蛋和香草精拌勻，再加入杏仁粉攪拌
3.  篩入低粉拌至9成即可，用保鮮紙包好雪30分鐘
4.  取出之粉團輕輕搓壓成糰，然後擀成批皮(可用食物袋/保鮮紙包住去擀，免痴底)，然後按入批模，用叉剌孔，用豆類或重物壓著來焗己防拱起
5.  放入已預熱180度的焗爐底層焗10分鐘，取去壓著物，再焗10分鐘，取出放涼

餡料： 蘋果1個.  牛油10g.  砂糖2小匙.  檸檬汁１湯匙.   黃梅醬1湯匙

蘋果餡做法：
１.  蘋果去皮去心，切粒，
２.  燒熱牛油，放入蘋果粒，慢火煮至軟身後，攪爛成茸
３.  加入糖、檸檬汁、黃梅醬，用中大火煮至水分收乾
４.  盛起蘋果茸，放入批盤內

批面材料﹕ 蘋果半個.  砂糖1湯匙.   檸檬汁1茶匙.  

蘋果批面做法：
１.  蘋果去皮去心，削成薄片
２.  排放上蘋果茸上，掃上檸檬汁及洒上糖
３.  置入己預熱焗爐中層，以１８０Ｃ焗２０分鐘至金黃色即可

後記： 上次蘋果用刀切，點切都好厚，今次識得用削皮器，所以可削到薄一薄，睇落都靚啲。但焗極都焗唔到金黃色，又驚個批皮會太燶，所以就咁睇，焗前和焗後都好似差唔多咁。比較起嚟，都係喜歡食美式蘋果批多啲。前一排相機壞咗時曾焗過一個朱古力批，所以無post出嚟，焗批時咪要用重物壓著，避免批皮拱起嘅，初時意為只是因美觀，原來拱起後個批底會裂開，令到啲朱古力漿流晒出嚟，所以焗批底時一定要唔好比佢拱起。

香蕉麵包

香蕉麵包

材料：  高筋麵粉175g.  即溶酵母4g.   糖9g.   牛油20g.   蛋1隻.   奶40cc.   脫脂奶粉1大匙.   鹽2g.  香蕉53g.

做法：

1.    將所有粉類、酵母、糖、蛋及牛奶攪勻，搓至均混。

2.    將牛油加入搓揉成團，最後把搗碎成糊狀的香蕉加入麵糰中，混合揉搓。

3.    麵團作第一次38度發酵約30分鐘。將粉團分成6份，每份約60克，搓成小圓球，靜置10分鐘後。
4.    將每份麵糰搓長，做形成辮子狀。

5.    排好麵團於烤盤上，用保鮮紙蓋好，讓其發酵至1倍大。

6.    放入已預熱焗200度，焗11分鐘即成。

後記： 原食譜高筋麵粉份量本用250g，我諗著整一半，唔知點解心算後一半會計咗175g出嚟，搓搓吓覺得唔對路，好似好乾，之後先發覺計錯數，為有中途補救，本來落半隻蛋，要加埋餘下的半隻。但到加咗香蕉後，麵糰又變得好黏手，好難搓，加咗2次手粉先免強成形。原食譜並不需要第一次發酵，搓成糰就可分割，靜置後就作最後發酵。雖然烏烏龍龍，好彩最終都可以整到出嚟。麵包焗好即刻食咗一個，有淡淡嘅香蕉味。雖然剛食完晚飯，都要食番個，因這時麵包係最好食嘅。

蘇打餅乾

蘇打餅乾(食譜參考Flowerbee Sweetening)

材料：    即用酵母1/2大匙(1小匙).   溫水90cc(暖牛奶80cc).   沙拉油25g.   低筋麵粉150g.   鹽1/8小匙.   小蘇打粉1/8小匙. 

飾面：    芝麻適量.  金黃幼砂糖適量

作法:
1.    芝麻預先烤香備用。酵母先融於暖牛奶中約5分鐘
2.    加入低粉、鹽、小蘇打及油揉成光滑的麵糰，放置鬆弛15-20分鐘
3.    將麵團桿成約0.2公分的薄片，用模型押出餅乾形狀或直接切割成長方形小片，用叉子在餅乾上刺小洞
4.    在表面刷一層水，灑一點金黃幼砂糖及芝麻，放在溫暖處發酵10分鐘，以200度烤約6(10)分鐘即可。

後記：   第一盤餅焗咗6分鐘後，見啲顏色幾靚，以為可以，但放涼後原來中心還是淋淋地，諗著再放焗爐焗多一陣，點知一擰個制就跌咗出嚟，原來個制裏面裂咗，嘩咁差嘅，用咗2年啲膠就爆裂。好彩老公夜晚返嚟幫我用銅線縛緊，咁個制先可以再用。唔知呢間公司有無spare parts換呢。到焗第二盤時就焗多4分鐘，所以焗得比較燶，但就可以keep到第二日食都脆。我將材料裏面的水改咗用牛奶，但落到80cc已好黏手，要將麵糰撻多幾次才可成糰。餅乾做形非常之難，因麵糰太軟，最後只是用刀界開嚟焗。餅乾口感都脆，但就唔鬆。可能發酵唔夠，並沒有好似flower啲咁漲卜卜。(紅色自己改咗的份量)

第一盤成品

第二盤比較燶

就咁爆裂

朱古力瑞士卷

朱古力瑞士卷

蛋糕體(模24cm x 21cm)：

材料：   低筋麵粉58g.    可可粉10g.    蛋3個.     砂糖58g.    牛奶25g

做法：
1.  烤箱預熱180度，烤盤鋪上鍚紙。低筋粉和可可粉預先篩好備用。
2.  蛋加砂糖坐熱水打勻至企身，先將低筋粉、可可粉加入攪拌，最後加奶拌勻。 
3.  將麵糊倒入烤盤中，輕敲幾下後入焗爐180度約焗9分鐘，取出放在網架至涼透。
餡料： 淡忌廉120克.  牛奶朱古力32克

做法：

1.  淡忌廉加朱古力坐熱水加熱至溶解，朱古力溶解後，將容器抵在冰水裡，用手提攪拌器起泡到八分。

2.  將冷卻後的蛋糕片除掉鍚紙。再將朱古力忌廉餡全部抺在蛋糕片上，塗抹均勻後捲起，用保鮮紙包緊後放雪櫃雪凍定形即可。

後記： 比較之前用多蛋黃食譜和這用全蛋食譜整的蛋糕卷，多蛋黃蛋卷口感比較鬆化，全蛋就感到有小小un的口感。本來諗著聖誕整木頭蛋糕都係用朱古力卷，過咗聖誕為有就咁食，唔洗做裝飾就最arm我喇。

燕麥椰子餅

燕麥椰子餅(食譜參考妃娟)

材料：
A：  牛油 60g.  金黃細砂糖(soft brown sugar)25g. + 20紅糖.   鹽小小.   金黃糖漿 17g.

B：  全蛋 半個

C：
低粉 80g + 蘇打粉 1/4t 先混合過篩
杏仁粉13g
即食燕麥片50g
椰子粉 50g
核桃碎36g (預先烤香)

做法：

1.  A材料打發均勻，加入蛋液拌勻。
2.  再加入C材料混合均勻，放雪櫃冷藏鬆弛20分鐘以上。
3.  取出麵糰，分成小糰，搓圓並壓扁。
4.  放入焗爐以150度焗約10分鐘即可。

後記： 加咗蘇打粉啲餅乾口感真係脆好多。原食譜用爐溫170度焗20-25分，我第一次用160度焗約10分鐘已比較燶，所以第二次用150度焗約10分鐘即取出放涼。椰子粉係印尼鋪頭買嘅，但個名叫椰漿粉，$3一包有50g，應該無買錯掛。我自己覺得這餅乾味道都唔錯，但老公就好喜歡，主動同我講話幾好食喎。原材料入面的糖類和楓糖漿我都改咗用另外一啲，唔知係咪咁，所以焗咁短時間就會燶呢。

香蕉提子scone

香蕉提子scone

材料：  自發粉200g.  泡打粉 一茶匙.   牛油 50g.   提子乾30g.   香蕉1隻.   砂糖25g.   牛奶20g.   奶(完成時用)少許

做法：

1.  預先將提子乾用水浸軟及壓爛香蕉備用。
2.  將粉類先篩好，加入凍牛油粒，用手指把牛油和粉類碎至麵包屑狀。
3.  即可拌入香蕉溶、糖、提子乾及牛奶，用塑膠刀切伴至混合成糰。
4.  用切伴膠刀由下將麵糰剷起重疊在上後，再由上往下壓扁。重覆3至4次即可。
5.  幹薄麵粉糰至約2cm厚，用圓管模型壓出圓形塊狀，於餅面塗上牛奶。 
6.  放入已預熱200°C焗爐，焗約15分鐘即可。

後記： 屋企有2隻好熟嘅香蕉，本來諗著整香蕉蛋糕，但好似已經整過好幾次，想整吓第二樣嘢，終於諗到整好耐都無整過嘅scone啦。整scone真係好容易和快手，前後唔洗一個鐘，巳有得食。scone最好食就係重暖暖地嗰時，外脆內軟，一口氣就比我食咗3個，真係食到唔停得口。不過下次就咁食而唔涂果占或其他餡料，可落多小小糖，或加多些香蕉份量相信會重好味。壓模後重有多出的麵糰就咁將佢切成三角形，睇落都ok吖。

其他scone食譜參考網誌

http://www.joyofbaking.com/SconesIntroduction.html

紅豆酥

紅豆酥:(15個) (食譜TPC復活日記)

材料: 紅豆餡200克(分成15等份，每份13g，備用)

油皮:
高粉37克. 低粉38克.  牛油28克.  糖粉15克.  水35克. 

酥皮:
低粉102克.  牛油50克.  

先製作小包酥：

1.   製作油皮：將所有油皮材料混合，搓揉均勻至表面光滑且麵團有彈性，覆蓋保鮮膜，靜置15-30分鐘後，分割成15等份，每份10克。
2.   此時可以製作酥皮：混合低筋麵粉與牛油，搓揉至成團狀。將酥皮也分割成15等份，同樣每份10克備用。
3.   每個油皮包裹一個酥皮，收口，用掌心按壓一下，再用桿麵杖從中間向前後兩側桿開，捲起，如此包完全部的酥皮。將每個捲好的油酥皮換方向打直再輕壓、桿開、包捲。

做法：

1.   將酥油皮好似圖的樣子，從上向下壓下再桿開，取一份豆沙餡放在中央，右手張開虎口慢慢收緊油酥皮並向內收攏使成圓球狀，最後把收口處捏緊。
2.   排放在烤盤上，均勻刷上蛋黃液。
3.   將焗爐預熱至190度，放入烘烤約15分鐘即可。

後記： 這紅豆酥好耐之前已想做，但感覺好似好難咁，但原來只要跟著食譜做一啲都唔難，只係比較多步驟。油皮搓起並唔係好似整麵包糰的質感，比較軟和油，好易就可將酥皮包好。本來有啲芝麻可放在紅豆酥面焗，會感覺靚啲，但放芝麻的玻璃樽點都擰唔開，為有就咁就算啦。見到有啲食譜係用酥油或豬油，不過因怕無咁健康，所以就揀咗呢個用牛油整嘅食譜，焗出嚟口感都算鬆脆，可考慮整嚟農曆新年時送比親友，不過都係有時間先算啦。

聖誕雪芳蛋糕

聖誕雪芳蛋糕(食譜A mun's little world)

黃糖肉桂乾果雪芳蛋糕

材料：6吋模

低粉70g.  玉桂粉1小匙.   薑粉2小匙.   蛋黃3隻.   蛋白4隻.   黃糖(soft brown sugar)60g.   鹽小小.   植物油35g.  Rum酒20g.  水20g.  提子乾(預先用rum酒浸過夜)適量.   糖漬橙皮適量

做法：

1. 蛋黃加1/3糖打至淡黃色，加油、酒和水續打均勻，篩入所有粉類和乾果拌勻

2. 蛋白打發成幼泡，分三次加入餘糖及鹽，打發至幼滑企身

3. 先加三分一蛋白霜於(1)攪拌均勻後，再將麵糊全倒入蛋白霜一起攪拌均勻。

4. 麵漿入模，以竹簽劃幾圈消去大氣泡(別碰檯，否則乾果全沉底)，入爐180度焗50分至糕面金啡全乾透，倒扣待涼，脫模。

後記： 本來預計今年聖誕都會整木頭蛋糕(舊年整咗個樹頭蛋糕)，但忽然間好似無乜心情，又發生阿爸失蹤事件，好彩最後都知佢係邊。係網上見到A moon整呢個聖誕雪芳蛋糕簡簡單單，咁都算有整聖誕蛋糕吖。原食譜只焗咗約25-30分鐘，但我於30及40分鐘取出時，竹籤插入時都有粉漿，所以一共焗咗50分鐘至完成。

自從博愛醫院急症室重開後，元朗區的急症救護車都直接送元朗區病人到博愛醫院。但好奇怪，將病人送到博愛又話病人的病歷係屯門醫院，要再安排救護車送病人返屯門醫院睇，你話係咪廢時失事吖，而家乜重未可以係網上檢閱病人病歷架咩。

事原十二月廿四日下午，阿爸唔舒服，阿爸已八十幾歲喇，首次主動叫阿媽call白車入院。當救護員話要送阿爸去博愛時，阿媽諗著元朗去博愛好近啫，當時又煲緊粥，咪同救護員話轉頭自己會跟著去博愛會合。點知當阿媽去到博愛時，急症分流當值人員同阿媽講，話我阿爸已走咗喇，自己出咗院喇。阿媽都好奇怪，平時阿爸行幾步都湍氣，無可能自己走，而身上又無帶錢，又無鑰匙，點可能返屋企，不過都要返去睇吓先可確定。點知返到去屋真係唔見人，於是諗阿爸身上無錢，會唔會佢行路返屋企呢，雖然機會微啲，都要搵吓先。咁為有沿路行去博愛睇吓見唔見阿爸嘅蹤影，最大可能係阿爸重係博愛範圍等緊阿媽。一路都唔見，返到博愛再問分流人員話無返到屋企喎，佢地先叫阿媽問啲護士，原來阿爸送咗去屯門醫院。

你話有無攪錯吖，一間醫院可以咁樣做嘢嘅，你係嗰到做嘢，你咁講，我地梗係信你講嘅嘢啦，唔可以隨口up架嘛，講嘢要負責任架，我阿媽都七十幾歲，要佢咁周為撲，如果有事邊個負責吖。又話阿媽嘈都無用，佢都唔知架(係度做唔知，咁邊個先知喇)，唔知就唔好亂咁講，或者佢地可以問清楚先答人(呢個唔係佢地嘅責任呢架咩)，咁咪好啲囉，做多小小嘢，對大家都好啲吖。

後補：

原來最後先知道個實情係，連個護士都話唔知，係阿媽問會唔會送咗去第二間醫院，佢先叫阿媽自己去問，只係比個電話號碼佢，佢地係唔會幫手問嘅。
我對呢間醫院，呢啲係嗰度做嘢嘅人，同埋佢地嘅做事態度都無話可說囉。為有希望最好唔好病囉。

發完惱騷後，另有一樣嘢和大家分享，尋日收到一個e-mail，係一個勁攪笑的聖誕跳舞製作，可將自己嘅頭key上去，做出一個類似動話嘅影片，好易整，又唔需要log-in至玩得，所以和大家分享一吓，希望重趕得及今日給親友送出多些歡笑。

請click入以下網址：

ElfYourself