紅豆戚風蛋糕

紅豆戚風蛋糕 (6吋模)

材料：  
1.   蛋白3個.   砂糖 35克.  
2.   自發粉65克.   蛋黃3個.  砂糖10克.   沙拉油20克.   奶50克.   紅豆茸100克

做法：
1.   蛋黃加10克糖打至混合。先加入菜油及奶拌勻後，再加入自發粉拌勻。

2.   蛋白加入35克糖，打到乾性發泡。

3.   將紅豆茸加入(1)拌勻，再將1/3的蛋白霜加入，用膠刮輕手攪拌後再將剩下的蛋白加入切底拌勻，入模。拿起模dun兩下。

4.   放入已預熱170度的焗爐，焗35-40分鐘(如中途覺得蛋糕面太焦，可蓋鍚紙)。出爐後馬上倒扣。

後記： 好多戚風蛋糕的食譜都係蛋白份量(隻數)多過蛋黃，但我通常都用相同數量。因好多時剩低嗰隻都係浪費居多。可能因唔係好夠蛋白霜的關係，所以蛋糕係比較重身，雖然軟熟，但唔夠鬆化。不過唔緊要啦，自己食飽肚啲添(自我安慰)。

紅豆糯米餅

紅豆糯米餅(食譜Honney的美食廣場)

材料(4個份量)：
糯米粉 70g.   糖 20g.   水 60g.   芥花籽油 5g.   豆沙餡 適量

做法：
1. 糯米粉、糖、橄欖油預先置於碗中，煲滾60g水並沖入碗中，用筷子快速攪勻。
2. 然後用手搓成糰，分成4份，用桿輾薄；包入適量豆沙餡，收口，搓圓，再按扁。

3. 將餅放入白鑊中，用中小火煎至熟，即成。

後記：我已跟著貼士做，用細火來煎，但上下皮都係硬咗小小，側面還可以，因唔知幾時先叫做熟，所以煎得耐咗。自己好鐘意食糯米煙un嘅口感，雖然硬咗小小，都覺得好味道。

咖啡卷

咖啡卷

材料：
即溶咖啡  1大匙
鮮奶   24g
蛋黃   3個
蛋白   3個
砂糖   38g
砂糖   10g
沙拉油  21g
低筋麵粉  55g

餡料： 淡忌廉125g加糖粉16g打發至7成
 
做法：
1   即溶咖啡先溶於暖鮮奶中備用。
2   蛋黃加10g砂糖拌勻，再放入沙拉油、咖啡牛奶及過篩後的低筋麵粉拌勻，成蛋黃麵糊。
3   蛋白攪拌至發泡後再分次放入砂糖一起打至溼性偏乾性發泡，成蛋白麵糊。
4   先取部分作法3蛋白麵糊加入作法2的蛋黃麵糊中拌勻後，再將剩餘加入拌勻，即成蛋糕體麵糊。
5   取烤盤，於內層鋪上一層鍚紙，將作法4的蛋糕體麵糊倒入、抹平，放入烤箱以170℃烤約9分鐘。
6   取出烤好的蛋糕體放涼，撕掉鍚紙後以較漂亮面朝下，另一面均勻抹上忌廉餡料及加上適量朱古力針，再用桿面棍與保鮮紙一起捲起，即可放雪櫃至定形。

後記： 好似好耐無整瑞士卷嘅物體，又心思思整番次。今次用分蛋法，焗嗰時幾驚會好似火山咁爆裂，好在蛋白只打發至溼性偏乾性發泡，焗時只是稍微漲起。淡忌廉通常我都買1公升裝，所以要落多啲嚟整個忌廉餡先可快啲用晒。

甜酸齋

甜酸齋(食譜儍媽廚房)

材料: 油筋3兩

汁料: 茄汁約1/4碗, 鹽約1/4茶匙, 糖2湯匙, 生抽1/2湯匙, 米醋3/4湯匙, 水3/4碗,  粟粉1/4茶匙

做法:
1. 油筋先出水過冷河, 揸乾水份備用. 
2. 將汁料煮滾，下油筋炆煮至收汁試味，加1/4茶匙粟粉水埋芡煮滾即可上碟。

後記： 見到周太太的甜酸齋整得好靚，原來食譜出自儍媽，我都好鐘意食甜酸齋，咁就即刻要試吓先。係街市問有冇麵筋賣，個檔主指著一舊舊咁嘅嘢，我話唔係呢啲喎，係整酸齋嗰啲，佢就話我應該買油筋先arm，頭先一舊舊個啲係整齋义燒用嘅。原來油筋好平咋，1蚊1兩，買咗3蚊已有9件。齋舖好似10蚊得先3件咋。呢個小食好易整，味道我就鐘意甜啲，所以我落糖的份量多過儍媽，屋企無白醋，就用米醋代替同埋我在最後加咗小小粟粉水埋芡，等個汁可以杰啲。味道真係好好食，冇9成都有8成似齋舖賣嗰啲。

橙味曲奇

橙味曲奇(食譜參考楊桃文化的烘焙食譜)

材料： 牛油  100g.    砂糖  50g.     蛋  30g.     橙汁 30g.    低筋粉 160g.     橙皮蜜餞  30g
橙皮茸    1大匙

做法：
1.          牛油軟化後，加入過篩的細砂糖一起打至鬆發變白。
2.          蛋打散成蛋液，分2～3次加入作法1中拌勻，再加入橙汁拌勻。
3.          把低筋麵粉過篩後加入作法2中拌勻，再把橙皮蜜餞和橙皮茸加入攪拌，即為麵糊。
4.          將作法3的麵糊裝入唧筒，並將麵糊擠在鋪有烤盤布的烤盤上，放已預熱160度的焗爐，焗約25分鐘即可。

後記：最近係楊桃文化網頁，見到好多甜品蛋糕食譜。好多款都好鐘意，睇番啲材料，這橙味曲奇，所有材料我都有係屋企，咁就試吓呢款先。曲奇經過唧嘴唧出，口感並不鬆脆，覺得比較硬身。不過可試到不同口味的曲奇都不錯。

芒果布甸

芒果布甸(食譜參考星級甜品)

材料：  可整5 杯
芒果 3個 (260g打成茸、另切粒)  
清水 160g
鮮奶 260g
糖 65g
淡忌廉 100g
魚膠粉 10g

做法：
1. 魚膠粉先加部份水開溶。
2. 清水加鮮奶煲熱，加糖及魚膠粉水至滾。
3. 放涼一會，即可將芒果茸、果粒及淡忌廉加入拌勻。
4. 用杯裝好，便可放雪櫃。

後記：終於都要買過部相機，咁又可以再post啲製成品出嚟喇。

後記：

屋企買咗芒果，可能唔係當造，唔係好香甜，咁最好就係用嚟做甜品啦。
之前整過一次芒果慕士，芒果布甸都係第一次整。係圖書館借咗呢本星級甜品，
裏面呢個芒果布甸整得好靚，最重要係食譜係無用生雞蛋，咁就比較放心。
可能我無將芒果打成茸，只壓爛，所以顏色同本書差好遠。我只係做佢一半份量，
初時只需用2個芒果，但試味時覺得好甜，所以加多一個芒果的份量落去，希望可令到無咁甜。 

綠茶紅豆芝士蛋糕

綠茶紅豆芝士蛋糕(參考自美味DIY)

海綿蛋糕:(6吋模) 

材料：  油5克 .   牛奶10克.    低筋粉22克.    蛋1個.    糖20克.

做法：
1.        把蛋和白砂糖一起攪拌到企身。
2.           將過篩過之低筋麵粉加入，用膠刮刀混合，接著再加入牛油和牛奶混合。
3.           倒入鋪有牛油紙的圓形模中，放入已預熱170度的焗爐中焗約15分鐘或竹籤插入不黏即可。放涼備用。


紅豆芝士餡料
材料：  忌廉芝士65g.  糖30g.  牛奶15g.  淡忌廉100g.   魚膠粉3g.  水20g.   紅豆茸100g

做法：

1.   淡忌廉7分打發備用，魚膠粉加水，隔熱溶解。
2.    忌廉芝士加糖打滑至糖溶解，加入紅豆茸拌勻。
3.    再加入已打起的淡忌廉攪勻，最後將暖的魚膠粉水加進芝士餡內拌勻，
4.       先在模中放上蛋糕片，然後將全部芝士餡倒落蛋糕餅上掃平便可。放入雪櫃1小時至凝固。

綠茶慕士
材料：  糖40g.  淡忌廉100g.   魚膠粉2g.  水40g.   綠茶粉6g.   白酒3g (無放)

做法：
1.     魚膠粉加水拌勻，再加入綠茶粉拌勻，隔熱溶解。
2.           淡忌廉7分打發，加入微暖的綠茶魚膠水拌勻，倒入芝士餅面，抺平後放雪櫃至凝固。

後記： 蛋糕整好都唔知有乜唔妥，當脫模後諗住影相，先發現，咦，點解綠茶慕士咁奇怪，會有條邊凸出嚟，都重未知發生乜事，諗著移好啲個位影相，見個綠茶慕士面會走位嘅，應該係溶魚膠粉出事。先整紅豆芝士時，魚膠粉係加水再放入微波爐叮溶，這部份ok，無問題。到綠茶慕士部份，魚膠粉加水攪溶再加綠茶粉坐熱水至溶，咁我之前未試過咁加綠茶粉放微波爐叮，咪依足食譜坐熱水攪溶，咁諗著攪溶咪得囉，原來唔係架，咁係唔得架，相信係要熱到出煙好熱個種至得。用咗幾個鐘整出嚟，結果唔係咁好，都有小小失望。終於只係得番紅豆芝士蛋糕食。連影相都out埋 focus添。

紅豆西米糕

紅豆西米糕(食譜參考為食貓)

材料： 西米 75g.  糖 22g.  食油 8g.  紅豆蓉適量

做法：

1.        先將西米浸1小時，沖洗乾淨，瀝乾水分，加入糖和生油攪勻。
2.        放鑊內蒸5分鐘(注意:在這5分鐘內要攪3次，每攪一次必需合上蓋)。
3.        蒸好之西米便可放入蛋塔模上（撻模一定要掃油，才可容易摸），第一層西米，第二層豆沙，第三層西米，按平表面。
4.        然後再放回鑊蒸8分鐘，完成。

後記： 因重有好多紅豆茸係冰格未食，所以就要諗多啲有紅豆嘅甜品嚟整，繼上一個西米布甸後(本來唔需要落紅豆茸，都特登落啲落去)，就再整呢個紅豆西米糕，今次用牛油來掃模，蒸完出嚟係完全無油味。個仔食完話個皮唔夠甜。我自己就覺得ok，可能今次放得唔夠多紅豆茸，所以皮多過餡，就會覺得無咁甜。

西米布丁

西米布丁(3杯份量)

材料：  西米45g.   吉士粉1湯匙.   粟粉1湯匙.   水100ml.  牛油10g.  糖50g.   雞蛋1隻.   鮮奶200g.   紅豆茸適量

做法：
1.      預熱焗爐，西米用水煮至半透明後，過冷河，隔水備用

2.      將100ml水加牛油和糖煲至糖溶，拌勻

3.      吉士粉及粟粉過篩後加入鮮奶攪溶後，倒進(2)，再加入西米及已稍為打發的蛋拌勻至煮沸後，離火
4.      先將紅豆茸放入，再倒西米布丁入焗杯內，用200度焗約15分鐘至面微焦。

後記：西米布丁好香好滑，凍食熱食都得。今次加咗紅豆餡，不過自己鍾意無紅豆餡多啲。個仔都話好味。好奇柽，今次份量只夠整3杯。

碎朱古力曲奇

碎朱古力曲奇(參考自美味DIY)

材料： 牛油100g.   沙糖75g.   蛋1 隻.   低筋麵粉150g.   可可粉20g.  碎朱古力粒(自己喜歡落幾多就幾多)

做法：
(1)  焗爐預熱至170 度。牛油與糖霜徹底拌勻至變白，然後分次拌入蛋。
(2)  麵粉、可可粉篩勻，與(1)拌勻即可，不要過份攪拌。放雪櫃30分鐘後取出。
(3)  將約16g曲奇料滾成球形，表面黏上碎朱古力粒，壓平成塊狀。入焗爐用170 度焗10 分鐘後，轉150度焗多15分鐘即可。

後記：而家整曲奇多數都整15-17g一個，因唔想分3次焗，盡可能2次焗完。今次曲奇比之前的落多咗可可粉而減少咗低筋粉，因想要朱古力味濃啲。

日本棉花蛋糕

日本棉花蛋糕(8.5" x 9.5")(蔡師奶)


材料： 牛油60克.    低筋麵粉80克.     牛奶80ml.      雞蛋6隻.     砂糖80克.     鹽 少許

做法：

1) 預熱焗爐至160度

2) 牛油置煲中以慢火煮滾後熄火，分數次加入低筋麵粉拌勻，再下淡奶及6隻蛋黃慢慢攪拌至完全混合滑身，無粒狀備用

3) 6隻蛋白打發至起泡，下鹽及砂糖分三次加入，直至呈現角狀即可

4) 蛋黃漿分兩次拌入蛋白中而fold-in形式輕輕混合至均勻，然後倒入已舖上鍚紙的焗盆中，雙手提起焗盆在桌上輕敲一下使空氣排出

5) 置於焗爐中層焗15分鐘，轉140度再焗5分鐘出爐後並馬上移出，撕去鍚紙邊，放在鐵架上待涼

後記：今次無再睇video就出事喇，一次過加入低粉，就咁睇好似無乜嘢，焗完先發覺有麵粉結粒沉底。上次蛋糕焗完見個面縐皮，所以今次打蛋白時打得無咁發，但蛋糕出嚟口感比較無上次咁鬆。

椰汁馬豆糕

椰汁馬豆糕(食譜為食貓)

材料：  馬豆 150g.  花奶165g.  砂糖300g.  椰汁1大罐(400g).  鷹粟粉170g.  水5材(1250ml)

做法：
1.          馬豆洗淨用適量之水煲淋，隔去水份備用。
2.          椰汁，花奶和砂糖先放煲內開慢火煲住先。

3.          水5杯，續杯加入一部份鷹粟粉開匀，倒入(2)中，直到所有水和粟粉已倒入，開大火，不停地攪拌直至煮滾加入馬豆攪匀，倒入耐熱盒中，凍後放入雪柜，數小時後切件進食。

後記：馬豆糕好耐前都跟為食貓食譜整過，但上次依足它的做法，只用椰汁和花奶開極都開唔勻的粟粉，所以今次調轉，用水續杯開就好好多，出嚟都可以成型，切出嚟食。馬豆份量比原食譜多50g，因喜歡多馬豆。

藍梅醬曲奇

藍梅醬曲奇

材料：  牛油120克.    砂糖50克.    蛋1個.    麵粉200克.    雲尼拿香油2滴.    適量藍莓果醬

做法：

1.  預熱焗爐170度
2.  牛油略軟化後，加入糖打起至忌廉狀

3.  分次加蛋攪拌後，加入己篩勻的麵粉拌勻，放雪櫃雪凍

4.  取大約15克麵糰，搓圓壓扁，用手指在中間壓一小凹位，放上果醬，

5.  入焗爐用170 度焗10 分鐘後，轉150度焗多10分鐘即可。

後記：今次曲奇可能大粒咗啲，焗完放涼之後覺得唔夠脆，要再用150度番焗10分鐘至得。好耐無整這款曲奇，今次再整都係因為係個仔嘅至愛之一。

日式芝士蛋糕

日式芝士蛋糕(6吋模)


材料：  忌廉芝士97克.  雞蛋(分蛋)3隻.  淡忌廉75克.  糖40克.  低筋粉15克.  粟粉15克

做法：

1) 將芝士和淡忌廉坐熱水攪溶至冇粒粒，完全溶解。

2) 離開熱水後分3次加入蛋黃攪勻，再篩入粉類拌勻。

3) 將蛋白分3 次加入糖打發至杰身約6成，將1/3蛋白加入麵糊中拌勻，再加入其餘蛋白拌勻。

4) 放入已預熱160度的焗爐(預先在爐內放入網架及有水的焗盆)，焗約10分鐘即蓋上鍚紙，免蛋糕面太燶，全程焗約1小時。

後記：  個仔話鐘意食軟熟啲嘅蛋糕，咁我就整咗呢個比較耐無整嘅日式芝士蛋糕喇(下次會整日本綿花蛋糕)，爐火今次調教至160度，高上次20度，只需焗1個鐘便可，但個面就有爆裂情況出現。