芒果布甸

芒果布甸(食譜參考星級甜品)

材料：  可整5 杯
芒果 3個 (260g打成茸、另切粒)  
清水 160g
鮮奶 260g
糖 65g
淡忌廉 100g
魚膠粉 10g

做法：
1. 魚膠粉先加部份水開溶。
2. 清水加鮮奶煲熱，加糖及魚膠粉水至滾。
3. 放涼一會，即可將芒果茸、果粒及淡忌廉加入拌勻。
4. 用杯裝好，便可放雪櫃。

後記：終於都要買過部相機，咁又可以再post啲製成品出嚟喇。

後記：

屋企買咗芒果，可能唔係當造，唔係好香甜，咁最好就係用嚟做甜品啦。
之前整過一次芒果慕士，芒果布甸都係第一次整。係圖書館借咗呢本星級甜品，
裏面呢個芒果布甸整得好靚，最重要係食譜係無用生雞蛋，咁就比較放心。
可能我無將芒果打成茸，只壓爛，所以顏色同本書差好遠。我只係做佢一半份量，
初時只需用2個芒果，但試味時覺得好甜，所以加多一個芒果的份量落去，希望可令到無咁甜。 

綠茶紅豆芝士蛋糕

綠茶紅豆芝士蛋糕(參考自美味DIY)

海綿蛋糕:(6吋模) 

材料：  油5克 .   牛奶10克.    低筋粉22克.    蛋1個.    糖20克.

做法：
1.        把蛋和白砂糖一起攪拌到企身。
2.           將過篩過之低筋麵粉加入，用膠刮刀混合，接著再加入牛油和牛奶混合。
3.           倒入鋪有牛油紙的圓形模中，放入已預熱170度的焗爐中焗約15分鐘或竹籤插入不黏即可。放涼備用。


紅豆芝士餡料
材料：  忌廉芝士65g.  糖30g.  牛奶15g.  淡忌廉100g.   魚膠粉3g.  水20g.   紅豆茸100g

做法：

1.   淡忌廉7分打發備用，魚膠粉加水，隔熱溶解。
2.    忌廉芝士加糖打滑至糖溶解，加入紅豆茸拌勻。
3.    再加入已打起的淡忌廉攪勻，最後將暖的魚膠粉水加進芝士餡內拌勻，
4.       先在模中放上蛋糕片，然後將全部芝士餡倒落蛋糕餅上掃平便可。放入雪櫃1小時至凝固。

綠茶慕士
材料：  糖40g.  淡忌廉100g.   魚膠粉2g.  水40g.   綠茶粉6g.   白酒3g (無放)

做法：
1.     魚膠粉加水拌勻，再加入綠茶粉拌勻，隔熱溶解。
2.           淡忌廉7分打發，加入微暖的綠茶魚膠水拌勻，倒入芝士餅面，抺平後放雪櫃至凝固。

後記： 蛋糕整好都唔知有乜唔妥，當脫模後諗住影相，先發現，咦，點解綠茶慕士咁奇怪，會有條邊凸出嚟，都重未知發生乜事，諗著移好啲個位影相，見個綠茶慕士面會走位嘅，應該係溶魚膠粉出事。先整紅豆芝士時，魚膠粉係加水再放入微波爐叮溶，這部份ok，無問題。到綠茶慕士部份，魚膠粉加水攪溶再加綠茶粉坐熱水至溶，咁我之前未試過咁加綠茶粉放微波爐叮，咪依足食譜坐熱水攪溶，咁諗著攪溶咪得囉，原來唔係架，咁係唔得架，相信係要熱到出煙好熱個種至得。用咗幾個鐘整出嚟，結果唔係咁好，都有小小失望。終於只係得番紅豆芝士蛋糕食。連影相都out埋 focus添。

紅豆西米糕

紅豆西米糕(食譜參考為食貓)

材料： 西米 75g.  糖 22g.  食油 8g.  紅豆蓉適量

做法：

1.        先將西米浸1小時，沖洗乾淨，瀝乾水分，加入糖和生油攪勻。
2.        放鑊內蒸5分鐘(注意:在這5分鐘內要攪3次，每攪一次必需合上蓋)。
3.        蒸好之西米便可放入蛋塔模上（撻模一定要掃油，才可容易摸），第一層西米，第二層豆沙，第三層西米，按平表面。
4.        然後再放回鑊蒸8分鐘，完成。

後記： 因重有好多紅豆茸係冰格未食，所以就要諗多啲有紅豆嘅甜品嚟整，繼上一個西米布甸後(本來唔需要落紅豆茸，都特登落啲落去)，就再整呢個紅豆西米糕，今次用牛油來掃模，蒸完出嚟係完全無油味。個仔食完話個皮唔夠甜。我自己就覺得ok，可能今次放得唔夠多紅豆茸，所以皮多過餡，就會覺得無咁甜。

西米布丁

西米布丁(3杯份量)

材料：  西米45g.   吉士粉1湯匙.   粟粉1湯匙.   水100ml.  牛油10g.  糖50g.   雞蛋1隻.   鮮奶200g.   紅豆茸適量

做法：
1.      預熱焗爐，西米用水煮至半透明後，過冷河，隔水備用

2.      將100ml水加牛油和糖煲至糖溶，拌勻

3.      吉士粉及粟粉過篩後加入鮮奶攪溶後，倒進(2)，再加入西米及已稍為打發的蛋拌勻至煮沸後，離火
4.      先將紅豆茸放入，再倒西米布丁入焗杯內，用200度焗約15分鐘至面微焦。

後記：西米布丁好香好滑，凍食熱食都得。今次加咗紅豆餡，不過自己鍾意無紅豆餡多啲。個仔都話好味。好奇柽，今次份量只夠整3杯。

碎朱古力曲奇

碎朱古力曲奇(參考自美味DIY)

材料： 牛油100g.   沙糖75g.   蛋1 隻.   低筋麵粉150g.   可可粉20g.  碎朱古力粒(自己喜歡落幾多就幾多)

做法：
(1)  焗爐預熱至170 度。牛油與糖霜徹底拌勻至變白，然後分次拌入蛋。
(2)  麵粉、可可粉篩勻，與(1)拌勻即可，不要過份攪拌。放雪櫃30分鐘後取出。
(3)  將約16g曲奇料滾成球形，表面黏上碎朱古力粒，壓平成塊狀。入焗爐用170 度焗10 分鐘後，轉150度焗多15分鐘即可。

後記：而家整曲奇多數都整15-17g一個，因唔想分3次焗，盡可能2次焗完。今次曲奇比之前的落多咗可可粉而減少咗低筋粉，因想要朱古力味濃啲。

日本棉花蛋糕

日本棉花蛋糕(8.5" x 9.5")(蔡師奶)


材料： 牛油60克.    低筋麵粉80克.     牛奶80ml.      雞蛋6隻.     砂糖80克.     鹽 少許

做法：

1) 預熱焗爐至160度

2) 牛油置煲中以慢火煮滾後熄火，分數次加入低筋麵粉拌勻，再下淡奶及6隻蛋黃慢慢攪拌至完全混合滑身，無粒狀備用

3) 6隻蛋白打發至起泡，下鹽及砂糖分三次加入，直至呈現角狀即可

4) 蛋黃漿分兩次拌入蛋白中而fold-in形式輕輕混合至均勻，然後倒入已舖上鍚紙的焗盆中，雙手提起焗盆在桌上輕敲一下使空氣排出

5) 置於焗爐中層焗15分鐘，轉140度再焗5分鐘出爐後並馬上移出，撕去鍚紙邊，放在鐵架上待涼

後記：今次無再睇video就出事喇，一次過加入低粉，就咁睇好似無乜嘢，焗完先發覺有麵粉結粒沉底。上次蛋糕焗完見個面縐皮，所以今次打蛋白時打得無咁發，但蛋糕出嚟口感比較無上次咁鬆。

椰汁馬豆糕

椰汁馬豆糕(食譜為食貓)

材料：  馬豆 150g.  花奶165g.  砂糖300g.  椰汁1大罐(400g).  鷹粟粉170g.  水5材(1250ml)

做法：
1.          馬豆洗淨用適量之水煲淋，隔去水份備用。
2.          椰汁，花奶和砂糖先放煲內開慢火煲住先。

3.          水5杯，續杯加入一部份鷹粟粉開匀，倒入(2)中，直到所有水和粟粉已倒入，開大火，不停地攪拌直至煮滾加入馬豆攪匀，倒入耐熱盒中，凍後放入雪柜，數小時後切件進食。

後記：馬豆糕好耐前都跟為食貓食譜整過，但上次依足它的做法，只用椰汁和花奶開極都開唔勻的粟粉，所以今次調轉，用水續杯開就好好多，出嚟都可以成型，切出嚟食。馬豆份量比原食譜多50g，因喜歡多馬豆。

藍梅醬曲奇

藍梅醬曲奇

材料：  牛油120克.    砂糖50克.    蛋1個.    麵粉200克.    雲尼拿香油2滴.    適量藍莓果醬

做法：

1.  預熱焗爐170度
2.  牛油略軟化後，加入糖打起至忌廉狀

3.  分次加蛋攪拌後，加入己篩勻的麵粉拌勻，放雪櫃雪凍

4.  取大約15克麵糰，搓圓壓扁，用手指在中間壓一小凹位，放上果醬，

5.  入焗爐用170 度焗10 分鐘後，轉150度焗多10分鐘即可。

後記：今次曲奇可能大粒咗啲，焗完放涼之後覺得唔夠脆，要再用150度番焗10分鐘至得。好耐無整這款曲奇，今次再整都係因為係個仔嘅至愛之一。

日式芝士蛋糕

日式芝士蛋糕(6吋模)


材料：  忌廉芝士97克.  雞蛋(分蛋)3隻.  淡忌廉75克.  糖40克.  低筋粉15克.  粟粉15克

做法：

1) 將芝士和淡忌廉坐熱水攪溶至冇粒粒，完全溶解。

2) 離開熱水後分3次加入蛋黃攪勻，再篩入粉類拌勻。

3) 將蛋白分3 次加入糖打發至杰身約6成，將1/3蛋白加入麵糊中拌勻，再加入其餘蛋白拌勻。

4) 放入已預熱160度的焗爐(預先在爐內放入網架及有水的焗盆)，焗約10分鐘即蓋上鍚紙，免蛋糕面太燶，全程焗約1小時。

後記：  個仔話鐘意食軟熟啲嘅蛋糕，咁我就整咗呢個比較耐無整嘅日式芝士蛋糕喇(下次會整日本綿花蛋糕)，爐火今次調教至160度，高上次20度，只需焗1個鐘便可，但個面就有爆裂情況出現。

木槺布甸

木槺布甸

材料︰

麥維他消化餅 110克.  淡忌廉 250克.  煉奶 50克. 

做法：
1. 先壓碎餅備用
2. 將忌廉打至6分發，再拌入煉奶打起

3. 將餅碎先鋪在餅模的底層，然後在餅碎上鋪忌廉，再鋪上一層餅碎，再鋪忌廉，如是者以(梅花間竹)方法填滿餅模，然後放進冰箱。

後記：近排工作非常忙碌，加上個仔係12號返來放暑假，就算整咗甜品和蛋糕，都無時間寫上網誌，終於等到而家先補上。這木糠布甸係個仔上年話好味，所以今次再整。因上次這份量整咗4杯，但我自己覺得食一杯太多。所以將麥維他消化餅加多咗， 唔止用咗110克，做成較薄的分層，結果整咗6杯。

椰塔

椰塔(食譜參考自為食貓)

撻皮材料:  牛油 100 g.   糖40 g.   蛋黃 1隻.   花奶 16 g.  低粉 160 g
撻皮做法:

1.           牛油和糖打勻至淺色，再加蛋打滑
2.           加入花奶, 再加入麵粉, 搓成粉團後，放入雪櫃冷藏片刻
3.           取出麵糰，壓至約6mm厚，用吸模吸出撻皮形狀
4.           將撻皮放入撻殼中央，由底部開始按壓，撻皮圍邊要高於撻殼。

餡材料:    糖95 g.   水 60 g.  牛油 28g.  蛋 1.5 隻.  花奶10g.  椰蓉 85 g. 泡打粉 1/3 茶匙

餡做法：
1.   糖、水、牛油和椰蓉細火煮至糖溶，冷卻後加入蛋及花奶混合
2.   再加入泡打粉拌勻，雪1個鐘

3.   將椰餡倒入撻模，放焗爐底層180度焗約25 分鐘.

後記： 今次餡的糖份量減咗10g，感覺淡咗小小。9個小模加5個大模，皮和餡的份量剛剛好。180度焗咗25分鐘後取出，退模後再放回用底火焗多一陣，放涼後，皮脆的口感第二天還可以keep到。

綠茶紅豆糯米糍(草餅)

綠茶紅豆糯米糍(草餅)

材料：   澄麵粉10g.  糯米粉90g.  砂糖55g.  奶粉8g.  水150ml..  綠茶粉2g.  熟糯米粉20g.  紅豆蓉180g.

做法：

1.            預先將20g糯米粉在鑊中慢火炒熟，放涼。
2.            將糯米粉、澄麵粉、奶粉、綠茶粉及砂糖撈勻，慢慢注入清水，將材料溶解至沒有粒狀物，成為軟滑粉漿。將粉漿傾倒至鍚紙盤中蒸熟，約5-6分鐘。
3.            將粉團放涼，平均分約25g一份，約12份。
4.            用熟糯米粉黏滿糯米糍皮表面，壓扁包入15g紅豆蓉，搓成球形。

後記：紅豆蓉今次整得比較無咁乾身，綠茶粉原來只用剩2克，所以出嚟效果只有小小綠色，綠茶味就無乜喇。紅豆糯米糍真係好好味，個皮好易整又軟滑，但就用咗比較多嘅時間來包餡。

藍莓芝士凍餅

藍莓芝士凍餅

海綿蛋糕:(6吋模) 

材料：
1.  沙拉油15克 .   牛奶20克.    低筋粉50克.    泡打粉1/4茶匙.    蛋黃2個.    糖15克. 2.  蛋白2個.    糖30克.

做法：
1.    將蛋白打至稍為起泡，再將糖分3次加入打至企身。
2.    將蛋黃加入糖打至稍起泡，再將沙拉油和奶加入拌勻，將(1)的一半加入輕手攪拌，再加入低筋粉拌勻。 將餘下的(1)全加進拌勻即可入模

3.   放入已預熱170度的烤箱，焗約25分鐘至熟或用竹簽插入沒有粉黏著即可。取出倒扣放涼。切成2半，只取用一半。

藍莓芝士餡料 (參考自美味DIY)

材料：  忌廉芝士125g.  糖30g.  淡忌廉125g.   魚膠粉1 茶匙.   水1 湯匙.   藍苺果醬35g

做法：

1.   淡忌廉7分打發備用。

2.    忌廉芝士加糖打滑至糖溶解，加入藍莓果醬拌勻。
3.    魚膠粉加水，隔熱溶解，加進芝士餡內，再加入已打起的淡忌廉攪勻
4.   先在模中放上蛋糕一片，然後將全部芝士餡倒落蛋糕餅上掃平便可。放入雪櫃凝固。

後記：今次的海綿蛋糕用類似戚風蛋糕的整法，但覺得用全蛋法的蛋糕出嚟賣相和口感都比較好。魚膠粉需然只落咗1茶匙，但都好似杰咗啲，一係就手腳慢，出嚟有小小洞洞係芝士餡。

紅茶朱古力蛋糕

紅茶朱古力蛋糕(食譜巧克力甜點專輯)

海綿蛋糕(6吋模)


材料：  全蛋100g.  白砂糖 60.  低筋麵粉65g.  牛油16g.  牛奶26g.

做法：

1.    把蛋和白砂糖混合，隔熱水加溫至約40度，高速打發3-4分鐘至變白企身，再轉低速打2分鐘使泡沬均勻。
2.     將過篩過之低筋麵粉加入，用膠刮刀混合，接著再加入已熱至溶和的牛油和牛奶混合。
3.        倒入圓形模中，放入已預熱160度的焗爐中焗約30-35分鐘或竹籤插入不黏即可。

紅茶糖漿材料：  水100ml.  紅茶3g.  砂糖35g.  威士忌適量

做法：  將紅茶茶包注入熱水浸約5-6分鐘，壓出茶味。取走茶包，加入砂糖溶解後冷郤，再加威士忌攪勻。

朱古力忌廉

材料： 甜朱古力粒53g.  牛奶35g.   淡忌廉160g.

做法：

1.            將朱古力粒加牛奶坐熱水攪拌至溶，再冷卻

2.            加入淡忌廉拌勻，坐冰水中打發至約八分。

組合：

蛋糕放涼後切成3片。將最底下的蛋糕底面朝上，塗上大量紅茶糖漿後，加朱古力忌廉用抺刀抺平。疊上第二塊，用同樣的模式塗上糖漿和朱古力忌廉。第三塊則切面朝上的疊上，將糖漿塗在上層。上面再塗朱古力忌廉即成。

後記：蛋糕塗咗紅茶糖漿，口感濕濕地和有紅茶香，味道唔錯。今次的朱古力忌廉唔知係唔係打發過度，覺得比較難塗抺得均勻，整咗好耐都係差唔多咁醜樣就算啦，放棄喇。就咁睇成個蛋糕，好似泥膠整出嚟咁樣。紅茶糖漿我無用晒，下次應搽多啲，盡量用晒應重好味。