木槺布甸

木槺布甸

材料︰

麥維他消化餅 110克.  淡忌廉 250克.  煉奶 50克. 

做法：
1. 先壓碎餅備用
2. 將忌廉打至6分發，再拌入煉奶打起

3. 將餅碎先鋪在餅模的底層，然後在餅碎上鋪忌廉，再鋪上一層餅碎，再鋪忌廉，如是者以(梅花間竹)方法填滿餅模，然後放進冰箱。

後記：近排工作非常忙碌，加上個仔係12號返來放暑假，就算整咗甜品和蛋糕，都無時間寫上網誌，終於等到而家先補上。這木糠布甸係個仔上年話好味，所以今次再整。因上次這份量整咗4杯，但我自己覺得食一杯太多。所以將麥維他消化餅加多咗， 唔止用咗110克，做成較薄的分層，結果整咗6杯。

椰塔

椰塔(食譜參考自為食貓)

撻皮材料:  牛油 100 g.   糖40 g.   蛋黃 1隻.   花奶 16 g.  低粉 160 g
撻皮做法:

1.           牛油和糖打勻至淺色，再加蛋打滑
2.           加入花奶, 再加入麵粉, 搓成粉團後，放入雪櫃冷藏片刻
3.           取出麵糰，壓至約6mm厚，用吸模吸出撻皮形狀
4.           將撻皮放入撻殼中央，由底部開始按壓，撻皮圍邊要高於撻殼。

餡材料:    糖95 g.   水 60 g.  牛油 28g.  蛋 1.5 隻.  花奶10g.  椰蓉 85 g. 泡打粉 1/3 茶匙

餡做法：
1.   糖、水、牛油和椰蓉細火煮至糖溶，冷卻後加入蛋及花奶混合
2.   再加入泡打粉拌勻，雪1個鐘

3.   將椰餡倒入撻模，放焗爐底層180度焗約25 分鐘.

後記： 今次餡的糖份量減咗10g，感覺淡咗小小。9個小模加5個大模，皮和餡的份量剛剛好。180度焗咗25分鐘後取出，退模後再放回用底火焗多一陣，放涼後，皮脆的口感第二天還可以keep到。

綠茶紅豆糯米糍(草餅)

綠茶紅豆糯米糍(草餅)

材料：   澄麵粉10g.  糯米粉90g.  砂糖55g.  奶粉8g.  水150ml..  綠茶粉2g.  熟糯米粉20g.  紅豆蓉180g.

做法：

1.            預先將20g糯米粉在鑊中慢火炒熟，放涼。
2.            將糯米粉、澄麵粉、奶粉、綠茶粉及砂糖撈勻，慢慢注入清水，將材料溶解至沒有粒狀物，成為軟滑粉漿。將粉漿傾倒至鍚紙盤中蒸熟，約5-6分鐘。
3.            將粉團放涼，平均分約25g一份，約12份。
4.            用熟糯米粉黏滿糯米糍皮表面，壓扁包入15g紅豆蓉，搓成球形。

後記：紅豆蓉今次整得比較無咁乾身，綠茶粉原來只用剩2克，所以出嚟效果只有小小綠色，綠茶味就無乜喇。紅豆糯米糍真係好好味，個皮好易整又軟滑，但就用咗比較多嘅時間來包餡。

藍莓芝士凍餅

藍莓芝士凍餅

海綿蛋糕:(6吋模) 

材料：
1.  沙拉油15克 .   牛奶20克.    低筋粉50克.    泡打粉1/4茶匙.    蛋黃2個.    糖15克. 2.  蛋白2個.    糖30克.

做法：
1.    將蛋白打至稍為起泡，再將糖分3次加入打至企身。
2.    將蛋黃加入糖打至稍起泡，再將沙拉油和奶加入拌勻，將(1)的一半加入輕手攪拌，再加入低筋粉拌勻。 將餘下的(1)全加進拌勻即可入模

3.   放入已預熱170度的烤箱，焗約25分鐘至熟或用竹簽插入沒有粉黏著即可。取出倒扣放涼。切成2半，只取用一半。

藍莓芝士餡料 (參考自美味DIY)

材料：  忌廉芝士125g.  糖30g.  淡忌廉125g.   魚膠粉1 茶匙.   水1 湯匙.   藍苺果醬35g

做法：

1.   淡忌廉7分打發備用。

2.    忌廉芝士加糖打滑至糖溶解，加入藍莓果醬拌勻。
3.    魚膠粉加水，隔熱溶解，加進芝士餡內，再加入已打起的淡忌廉攪勻
4.   先在模中放上蛋糕一片，然後將全部芝士餡倒落蛋糕餅上掃平便可。放入雪櫃凝固。

後記：今次的海綿蛋糕用類似戚風蛋糕的整法，但覺得用全蛋法的蛋糕出嚟賣相和口感都比較好。魚膠粉需然只落咗1茶匙，但都好似杰咗啲，一係就手腳慢，出嚟有小小洞洞係芝士餡。

紅茶朱古力蛋糕

紅茶朱古力蛋糕(食譜巧克力甜點專輯)

海綿蛋糕(6吋模)


材料：  全蛋100g.  白砂糖 60.  低筋麵粉65g.  牛油16g.  牛奶26g.

做法：

1.    把蛋和白砂糖混合，隔熱水加溫至約40度，高速打發3-4分鐘至變白企身，再轉低速打2分鐘使泡沬均勻。
2.     將過篩過之低筋麵粉加入，用膠刮刀混合，接著再加入已熱至溶和的牛油和牛奶混合。
3.        倒入圓形模中，放入已預熱160度的焗爐中焗約30-35分鐘或竹籤插入不黏即可。

紅茶糖漿材料：  水100ml.  紅茶3g.  砂糖35g.  威士忌適量

做法：  將紅茶茶包注入熱水浸約5-6分鐘，壓出茶味。取走茶包，加入砂糖溶解後冷郤，再加威士忌攪勻。

朱古力忌廉

材料： 甜朱古力粒53g.  牛奶35g.   淡忌廉160g.

做法：

1.            將朱古力粒加牛奶坐熱水攪拌至溶，再冷卻

2.            加入淡忌廉拌勻，坐冰水中打發至約八分。

組合：

蛋糕放涼後切成3片。將最底下的蛋糕底面朝上，塗上大量紅茶糖漿後，加朱古力忌廉用抺刀抺平。疊上第二塊，用同樣的模式塗上糖漿和朱古力忌廉。第三塊則切面朝上的疊上，將糖漿塗在上層。上面再塗朱古力忌廉即成。

後記：蛋糕塗咗紅茶糖漿，口感濕濕地和有紅茶香，味道唔錯。今次的朱古力忌廉唔知係唔係打發過度，覺得比較難塗抺得均勻，整咗好耐都係差唔多咁醜樣就算啦，放棄喇。就咁睇成個蛋糕，好似泥膠整出嚟咁樣。紅茶糖漿我無用晒，下次應搽多啲，盡量用晒應重好味。

忌廉芝士批

忌廉芝士批(食譜點心達人輕鬆學)

撻皮 (15cm)


材料：  牛油30g.  砂糖 17g.  低筋麵粉 60g.  杏仁粉15g.    雞蛋 1/4隻.    香草精約2滴   

撻皮做法：
1.      牛油放軟打起，再分次加砂糖打至淺色
2.      加入杏仁粉攪拌，再分次加入雞蛋和香草精拌勻
3.      篩入低粉拌至9成即可，用保鮮紙包好雪30分鐘
4.      取出之粉團輕輕搓壓成糰，然後擀成批皮(可用食物袋/保鮮紙包住去擀，免痴底)，然後按入批模，用叉剌孔，用豆類或重物壓著來焗己防拱起
5.      放入已預熱180度的焗爐底層焗10分鐘，取去壓著物，再焗10-15分鐘，取出放涼

芝士餡料材料：  忌廉芝士48g.  沙糖 15g.  淡忌廉30ml.   牛奶30ml.   粟粉5g.  檸檬汁3/4大匙.    香草精約1滴 

餡料做法：
1.       忌廉芝士放軟打起，加砂糖打至滑身
2.       再分次加入淡忌廉及牛奶攪拌均勻，篩入粟粉攪至無粉粒，最後加入檸檬汁和香草精拌勻 
3.       將芝士餡倒在批皮上，放已預熱160度的焗爐中層焗20分鐘，出爐後脫模。

後記：原食譜檸檬汁只落1/4大匙，但試不出有檸檬汁味，所以加至3/4大匙，咁先覺得酸酸地，好味啲。原食譜芝士餡要先過濾，可令效果更滑。批皮係前幾日整杏仁批時預留係雪櫃備用，只需取出搟成批皮即可。下次芝士餡料可加多1/3份量，今次感覺好似唔夠滿。

杏仁批

杏仁批(食譜點心達人輕鬆學)

撻皮 (15cm)


材料：  牛油30g.  砂糖 17g.  低筋麵粉 60g.  杏仁粉15g.    雞蛋 1/4隻.    香草精約2滴   

撻皮做法：
1.      牛油放軟打起，再分次加砂糖打至淺色
2.      加入杏仁粉攪拌，再分次加入雞蛋和香草精拌勻
3.      篩入低粉拌至9成即可，用保鮮紙包好雪30分鐘
4.      取出之粉團輕輕搓壓成糰，然後擀成批皮(可用食物袋/保鮮紙包住去擀，免痴底)，然後按入批模，用叉剌孔，用豆類或重物壓著來焗己防拱起
5.      放入已預熱180度的焗爐底層焗10分鐘，取去壓著物，再焗15分鐘，取出放涼

餡料材料：  牛油 30g.  沙糖 23g.  杏仁粉30g.  雞蛋 1/2隻.    香草精約2滴 

餡料做法：
1.       牛油放軟打起，再分次加砂糖打至淺色
2.       加入杏仁粉攪拌，再分次加入雞蛋和香草精拌勻 
3.       將麵糊鋪在批皮上，再加杏仁片和提子乾作裝飾，放已預熱180度的焗爐中層焗15分鐘至金黃，出爐後脫模。

後記：今次個批底先焗好，然後才放餡料再焗，效果較一齊焗好，批底第二日食都可保持脆的口感。同埋覺得第二日食比即食更好味。批底先做兩個份量，放雪櫃留待另一款批之用。因一個的材料太少，比較難做。因焗爐擺放不平，以至焗好的批側埋一邊。

日本棉花蛋糕

日本棉花蛋糕(8.5" x 9.5")(蔡師奶)

材料： 牛油40克.    低筋麵粉53克.     牛奶53ml(53克).      雞蛋4隻.     砂糖60克(55克).     鹽 少許

做法：
1) 預熱焗爐至160度
2) 牛油置煲中以慢火煮滾後熄火，加入低筋麵粉拌勻，再下淡奶及4隻蛋黃慢慢攪拌至完全混合滑身，無粒狀備用

3) 4隻蛋白打發至起泡，下鹽及砂糖分三次加入，直至呈現角狀即可

4) 蛋黃漿分兩次拌入蛋白中而fold-in形式輕輕混合至均勻，然後倒入已舖上鍚紙的焗盆中，雙手提起焗盆在桌上輕敲一下使空氣排出
5) 置於焗爐中層焗15分鐘，轉140度再焗5分鐘出爐後並馬上移出，撕去鍚紙邊，放在鐵架上待涼

後記：這蛋糕真係好軟熟，就算就咁食唔夾其他嘢都好味。不過今次又睇錯材料份量，牛奶應係53ml，但以為係53克，唔知影響大唔大。這食譜之前真係非常之人氣，不過我通常都慢人幾拍嘅，等到而家先整。做法我改咗小小，因我睇完蔡師奶的video示範，當我加到第4隻蛋黃時，已覺比她的麵糊稀，所以我唔係加3隻蛋黃和1隻全蛋。亦都可能因為咁，我用4隻蛋白打發，再加落麵糊度，所以焗出嚟個面有縐紋。又可能因我無倒扣而就咁放在鐵架上放涼，我唔想浪費多一張牛油紙呀。

日式朱古力芝士蛋糕

日式朱古力芝士蛋糕(6吋模)


材料：  忌廉芝士95克.  雞蛋(分蛋)3隻.  牛奶72克.  朱古力粒30g.    糖40克.  低筋粉20克.   粟粉10克

後記：整過幾次日式芝士蛋糕，今次想試吓整朱古力味，但搵極都搵唔到食譜，咁為有自己用原有食譜改，咁就變成咁喇。應該係水份落得太多。用坐水焗咗60分鐘，試吓熟未，未得，咁再乾焗15分鐘，又未得，又焗多15分鐘，都重係支竹籤插入有粉漿秥著，為有再焗最後15分鐘，熟唔熟都算喇。結果總共焗咗105分鐘，都算焗得最耐的時間紀錄喇。

蛋糕出嚟雖然口感唔鬆，但都幾軟，味道唔算差，可能因蛋糕本身粉的比例唔多，主要都係芝士和蛋，焗出嚟唔實，所以都唔難食，我都照食可也。唔知點解，有咁多本食譜係度，我都唔照食譜啲靚靚蛋糕嚟整，偏偏要自己亂咁嚟，結果為有自食其果啦。

壽包

壽包(食譜參考麵麵俱到一書)


發麵材料：   低筋麵粉34g.   中筋麵粉86g.     泡打粉1.2g.    黃豆粉2.4g(我無用).    糖12g.    速溶酵母2g.    水64g.    豬油2.4g(煮食油3g)

做法：

1. 將麵粉放容器內，其餘材料放在中間，慢慢加入水，攪拌至乳化均勻。
2. 再將麵粉揉成糰，醒10分鐘。

3. 再將發麵揉至光滑便可使用。

4. 將發麵麵糰取出一部份加入綠色素揉勻，做成葉子狀。餘下分成8份約23g一份，將一份的麵糰壓扁加入20g紅豆餡後，整型成一頭尖的桃子形狀，收口係底，放在墊紙上。

5. 放入蒸籠內，再發酵約30分鐘。

6. 鍋內水滾後放上蒸籠，以中小火蒸8分鐘，趁熱壓出壽桃形並貼上葉子，再回蒸籠蒸2分鐘，出爐趁熱刷上紅色素。可用牙刷來噴顔色，但一定要趁熱噴，冷了顔色就沾不上了(書的提示)。

後記：今次整壽包並唔係有邊個生日，係見到本書入面啲壽包整得咁靚，咁諗著試吓整，第日可整嚟送比人生日時食，點知原來都好難整得靚架。份量有小小改咗，因剩番得86g中筋粉。今次可能發得耐咗小小，個包有啲豆皮，又因個蒸籠太細，蒸好後好難加葉落去，塊葉又整得醜樣。咁為有暫時打消送壽包呢個念頭啦。

葡萄乾合桃朱古力曲奇

葡萄乾合桃朱古力曲奇(食譜來自精巧甜品DIY3)

材料：   牛油60g.   紅糖60g.   蛋1 隻.   低筋麵粉150g.   發粉1/2茶匙.    香油1/2茶匙.    碎朱古力粒30g.   合桃60g.   葡萄乾30g.

做法：
1.     合桃先焗香，待涼切碎。焗爐預熱至160 度。
2.    牛油與紅糖徹底拌勻至變白，然後分次拌入蛋液，打至完全溶入。
3.    麵粉、發粉篩勻，加入(2)拌至均勻即可，不要過份攪拌。再加入碎朱古力粒、合桃碎及葡萄乾

4.   

用匙筆出一匙份量分放上焗盤，稍為整形。入焗爐用160 度焗10 分鐘後，轉150度焗多10分鐘即可。

後記：見個食譜啲材料我樣樣都有，牛油份量又咁低，所以就決定揀佢嚟整，用嚟做下午茶點就最好不過喇。

鏡面夾心芒果芝士蛋糕

鏡面夾心芒果芝士蛋糕(參考為食貓)

海綿蛋糕(6吋模)(參考好吃的西點蛋糕祕訣 – THE SWEET TRICK)

材料：  全蛋90g.  白砂糖 50.  蜂蜜5g.  糖膠5g.  低筋麵粉52g.  牛油7g.  牛奶12g.

做法：

1.    把蛋和白砂糖一起攪拌，慢慢加入已加熱到約40度的蜂蜜和糖膠，打發到變白企身。

2.     將過篩過之低筋麵粉慢慢加入，用膠刮刀混合，接著再加入已熱至溶和的牛油和牛奶混合。
3.     倒入鋪有牛油紙的圓形模中，放入已預熱170度的焗爐中焗約30分鐘或竹籤插入不黏即可。放涼切去面備用。


芒果啫哩夾心

材料：  芒果啫哩粉30g.    魚膠粉1g.     熱水90g.     芒果肉半個切粒

做法：在一個5吋的圓形批模內放入芒果粒，再將芒果jelly粉、魚膠粉、熱水放在碗內攪至溶化，倒入放了芒果粒的模內，稍涼後放雪櫃內凝固備用。

芒果餡

材料：  忌廉芝士  140克.    砂糖 38克.    淡忌廉130克.    芒果茸  60克.    魚膠粉 5克.    水30克 .    芒果粒適量

做法：
(1)  淡忌廉7分打發備用。
(2)  忌廉芝士加糖打滑至糖溶解，加入芒果茸拌勻。
(3)  魚膠粉加水，微波爐叮熱溶解，加進芝士餡內拌勻，再加入已打起的淡忌廉攪勻備用。

鏡面裝飾

材料：  芒果啫哩25g.     魚膠粉1g.     熱水50g.      芒果片適量

蛋糕組合：

1.     將己放涼的蛋糕放入6吋蛋糕模，鋪上芒果粒，倒入一半芒果芝士餡，再將己凝固了的芒果jelly夾心放在中間， 再將餘下的芒果忌廉芝士餡倒入，用力轉一轉模令芒果芝士餡表面變得平滑，放雪櫃至凝結。

2.      芒果啫哩粉、魚膠粉、熱水放在碗內攪至溶化待涼，取出己凝結的芝士蛋糕，先小心放上芒果片花作裝飾，再倒上已放涼的芒果啫哩水在已凝固的蛋糕上，再放雪櫃至凝固便可。

後記：

雖然七月一日係我生日，但回歸十年對我嚟講都無乜特別好的感覺，只感到這十年比起97年前的日子，生活真係艱難咗，為有希望嚟緊的日子會變得更美好。不過做人都係知足啲好，唔好太貪心，而家都唔係太差吖，最緊要健康和屋企人個個齊齊整整就應該滿足喇。今年個仔雖然重未返，唔可以同我一齊過生日，不過佢都係七月一日嘅零辰，就打電話返嚟同我講生日快樂，咁我已經好開心喇，最緊要佢有呢個心。講番個蛋糕先，呢個就係我嘅生日蛋糕喇，其實好耐之前見為食貓網登時己想整，但睇見好似好複雜咁，等等吓就擺低咗。點知早幾日見到網友荔枝整得好靚，自己又未諗到整乜嘢作為生日蛋糕，咁就試吓啦。

今次的海綿蛋糕比較甜咗啲，自己本身不喜咁甜。原食譜用糖稀(應該係麥芽糖類)，我改咗用糖膠，因唔想特別買，不過其實有好多食譜都會用到嘅。唔知係咪多糖類的關係，所以焗出嚟蛋糕比較深色啲。至於芒果啫哩夾心，我無4吋容器所以用咗5吋，第一次整啫哩夾心，真係覺得自己好蠢，又唔識先用保鮮紙墊係個容器底，到凝結咗後，咁諗著用風筒吹吓容易啲取出，但又整到啫哩開始溶變水，於是又用碟裝起放返入雪櫃，再等陣先拎出嚟，又要用剷先剷得起，結果都比我攪到變晒形囉，好彩出嚟效果都唔係太差。為有算係攞經驗，下次一定會整得靚啲嘅。第一次用芒果切片整芒果花，雖然無餅店啲咁靚，自己都覺得還可以，無咁單調。