蜜桃蛋糕

蜜桃蛋糕(16cm x 16cm)(食譜參考意大利的心靈湯)


材料： 低筋粉 30 克.   粟粉 20克.   蛋 3只.    糖 50克.    淡忌廉 50克.    牛油30克.    罐頭蜜桃2塊及一塊切碎

做法﹕

1.           焗爐預熱170度，粉類篩好備用。

2.          蛋白和30克糖打至企身，蛋黃20克加糖伴混，再將兩者混合好後再拌入粉類。

3.          牛油和淡忌廉格水加熱至溶再加進麵糊，最後落切碎蜜桃拌勻入模，
4.          170度焗至蛋糕面開始有小小轉色(約12分鐘)，可放切片蜜桃在面，全程焗約50分鐘至全熟。

後記：  蛋糕圖片上排是在蛋糕焗約8分鐘時放蜜桃片，但當放到第三塊蜜桃片時，蜜桃片沉咗落去，可能切得太大舊太重，蛋糕的表面唔夠承托力。所以等再焗多大約4分鐘，先再放其餘3塊。我原先預計整完會係好似切開單一嗰塊咁，靚靚仔仔，但事實永遠都同理想不同。不過都好彩有一塊比較似樣。這蛋糕不建議落切碎的蜜桃在內，因蜜桃出水，整到蛋糕有蜜桃的部份比較濕。同埋這蛋糕係雪凍好食過焗好即食。

日式綠茶芝士蛋糕

日式綠茶芝士蛋糕(6吋模)

材料： 忌廉芝士95克.  雞蛋(分蛋)3隻.  淡忌廉75克.  糖40克.  低根粉20克.  粟粉10克.  綠茶粉10克

做法：

1.          焗爐預熱165度，預先在爐內放入網架及有水的焗盆在爐內，粉類過篩備用
2.          將芝士和淡忌廉坐熱水攪匀，至冇粒粒，完全溶解。

3.          離開熱水後分3次加入蛋黃拌勻，再篩入粉類拌匀。

4.          將蛋白分3次加入糖打至企身。將1/3蛋白加入麵糊中拌匀，再加入其餘蛋白拌匀，放上網架入爐。

5.          入爐後等蛋糕面微色，轉150度焗，全程焗約1個鐘。

後記：今次是外觀最靚的一次，蛋糕面無爆開(不過燶咗小小)，因今次打蛋白無打至10成，只打到蛋白尖重微微向下。雖然個面無爆開，但就成個蓋在側面裂開再升起，所以冷卻後睇唔出。口感就無將蛋白打到十成咁鬆軟。係唔係永遠無兩全其美呢，可做到又靚又鬆軟又唔爆。我相信應該只係的我技術未夠。比較原味和綠茶味，我喜歡原味多啲，因覺得這芝士蛋糕好似無乜芝士味。蛋糕面亦比較濃，應在後期加上鍚紙蓋一蓋。

失敗的朱古力瑞士卷

失敗的朱古力瑞士卷

蛋糕體:(烤盤為28cm乘24cm)
材料： 低筋粉30克.  可可粉12克.  蛋2個.  蛋黃1個.  砂糖40克.  沙律油20克 

做法：

1.           烤箱預熱170度，烤盤鋪上鍚紙。低筋粉和可可粉預先篩好備用。

2.           蛋加砂糖坐熱水打勻至企身，將低筋粉、可可粉及油加入攪拌勻。

3.           將麵糊倒入烤盤中，輕敲幾下後入焗爐170度約焗12分鐘，取出放在網架至涼透。

忌廉餡料： 淡忌廉80克.   糖粉12克. 

做法：

1.  淡忌廉加糖打至企身待用.
2.   將冷卻後的蛋糕片蓋上一張烘焙紙後翻起，除掉鍚紙。再將忌廉餡全部抺在蛋糕片上，塗抹均勻後灑上提子乾捲起，用烘焙紙包緊後放雪櫃雪凍即可。

後記： 今次整呢個朱古力瑞士卷好失敗，落粉時已覺得啲泡消失得好快，所以倒落焗盤時都唔咁dun啲泡出嚟，所以焗完出嚟變到好多豆皮粒粒係面。同埋應該焗過咗火，蛋糕放涼後側邊位變得比較脆和乾。相信這個份量應焗10分鐘就可以。捲時見到個蛋糕咁裂曬都無心機整，真係整得好醜樣。

好多豆皮粒粒係面

核桃豆沙包

核桃豆沙包(食譜來自東洋點心DIY)

材料： 

A.        (蛋黃1個、細砂糖26克)
B.  (蛋白1個、細砂糖40克)、蘇打粉2克、水2/3小杯(7.5ml)、低筋麵粉130克、紅豆粒餡250克、蛋黃汁(蛋黃1個、味醂5cc)、核桃11個

做法：
1.  把A混勻呈現檸檬色。再把B打發起泡到呈乳白色加入於A，又加以用份量水溶解過的蘇打粉，拌勻。
2.  篩入低筋麵粉，拌勻後蓋上保鮮紙放進雪櫃雪1小時。在沾粉(我用低粉)上放適當分出11份(每份約20克)。每份包入1個22克的紅豆餡丸。
3.        排入烤盤，抺上蛋黃汁，上面壓入已洪烤過核桃，再放進預熱180度的焗爐焗15分鐘。

紅豆餡(參考CL的手創點心坊)

材料:
紅豆200克.  細砂糖100克.  牛油10克.

做法:
1. 紅豆(預先浸過夜)洗淨煮至熟軟後。
2. 牛油入鍋中加熱至溶，加入紅豆與糖攪拌均勻.
3. 煮至稍收乾成黏性即可! (在煮的過程中要不停的攪拌)

後記：這個便是上次整錯咗冒牌銅鑼燒的真身。上次因食譜寫水的份量為2/3小杯，睇曬全本書都找不到一小杯即幾多份量，咪以為2/3量杯，但整出嚟係太稀。所以今次我參考本書其餘食譜，水加蘇打粉的份量，都係靠估，但都可以成形。原食譜麵糰的份量可整到20個，豆沙餡要600克，每個餡30克。但我試過用15克粉糰包22克豆沙餡，免強都包到，但個皮好薄，一壓粒核桃落去就好易爆。所以都係用多啲粉糰包小啲餡。原本個包應該再壓扁啲。另外要留意就係，個粉糰整形時好黏手，要預備多啲手粉。蛋黃汁要用味醂，我無，所以用咗3cc水加幾滴白醋。這個核桃豆沙包，一整出嚟放涼一陣，我就食咗3個，個皮重脆脆地好好味。這個日式的甜品同之前整的甜品真是完全不同風味。

蜜桃生日蛋糕

蜜桃生日蛋糕

戚風蛋糕:(6吋模) 

材料: 沙拉油32克.  鮮奶36克.  糖60克.  低筋粉65克.  蛋3個
做法:
(1) 將蛋加入糖坐暖水打至綿密，
(2) 分次加入低筋粉及暖的奶和沙拉油再拌勻，拌勻入模後即可入烤箱。
(3) 焗爐預熱170度烤焗10分鐘後見蛋糕面開始轉色，可將溫度轉至160度，總共大約焗25分鐘。如用竹簽插入沒有粉黏著即可。倒扣放涼後可切開兩半備用。

忌廉餡：淡忌廉150克.  15克糖粉.  罐頭蜜桃半個切粒

淡忌廉加糖粉打至9成企身放雪櫃備用

組合：在兩片切開的蛋糕面都抺上忌廉，然後在其中一塊放上蜜桃粒，再將兩塊合埋。將其餘的忌廉塗抹在蛋糕面及四周至均勻即可。最後唧花和鋪上蜜桃。

後記：今日係我先生的生日，所以特別整咗呢個蜜桃生日蛋糕同佢慶祝，喻意我地永遠都咁甜甜蜜蜜。
我係度祝佢生日快樂、身體健康和事事順利。第一次整塗忌廉的蛋糕，真係有一定的困難，蛋糕切開後有好多蛋糕碎，當塗抹時，忌廉和蛋糕碎黏埋一齊，全部忌廉都布滿蛋糕碎。都唔似睇人整咁，忌廉真係只有忌廉，好乾淨咁。同埋因我無塗忌廉用旳抺刀，只係用切嘢的刀，所以整得麻麻，不過誠意搭夠啦。150克淡忌廉剛剛好薄薄塗滿一個6吋蛋糕。今次整戚風蛋糕本來是用分蛋法，但點知打蛋時整爛咗啲蛋黃，咁就試吓用全蛋法來整戚風，咁重算唔算係戚風呢。全蛋法有一個好處就係個面好靚，無爆開。因星期日都要返工，所以這蛋糕是星期六晚整定放雪櫃，好彩星期日返工前攞出嚟睇，個蛋糕個形重係到，幾驚啲忌廉溶曬。蜜桃就等食之前先放。

剛剛舖好，忌廉度好多蛋糕碎。

唧完花，睇落靚咗啲。

冒牌銅鑼燒

冒牌銅鑼燒

本來係整第二樣嘢，但食譜裏面水的份量有唔清楚的地方，卒之出嚟變咗太稀要煎，為有當銅鑼燒食囉。但味道都ok架。遲幾日會再試整原本想整的東東。

杏仁酥

杏仁酥(食譜來自kitchen圓舞曲)

材料： 無鹽奶油   50g.  糖 18g.  低筋麵粉   65g.  杏仁奶露 33g

做法：
(1) 室溫的牛油與糖稍微攪拌均勻
(2) 加入過篩的低筋麵粉、杏仁露粉混合均勻
(3) 將麵團揉成每個約 20g 的小圓型
(4) 預熱焗爐160度，焗10分鐘後轉150度多焗10-15 分鐘

後記：這個酥餅真的好神奇，無落任何泡打粉，都可以咁鬆同酥脆。初初以為杏仁奶露成份有問題，但睇吓只不過係南北杏、葡萄糖、奶粉、糖、殿粉和川貝。我只做原食譜一半的份量，可作如圖的8個。有一點要留意係，焗前每個麵團要留多小小空間，因入爐後會脹大2倍。原食譜用糖粉，但我用咗砂糖，已減2克糖，都覺得甜，可再減多小小。或可能各杏仁奶露成份問題。

瑞士卷

瑞士卷


蛋糕體:(烤盤為28cm乘24cm)
材料： 鮮奶24克.  低筋粉60克.  蛋3個.  砂糖60克. 
做法：
1.         烤箱預熱170度，烤盤鋪上鍚紙

2.     蛋加砂糖坐熱水打勻至40度及企身，將低筋粉及40度的鮮奶加入攪拌勻。
3.    將麵糊倒入烤盤中，輕敲幾下後入焗爐170度約焗12分鐘，取出放在網架至涼透。
忌廉餡料： 淡忌廉60克.  砂糖10克.  已浸透rum酒的提子乾適量
作法：
1.  淡忌廉加糖打至8成發待用.
2.   將冷卻後的蛋糕片蓋上一張烘焙紙後翻起，除掉鍚紙。再將忌廉餡全部抺在蛋糕片上，塗抹均勻後灑上提子乾捲起，用烘焙紙包緊後放雪櫃雪凍即可。

後記：我的瑞士卷終於有面見人啦，之前所整的瑞士卷皮都是甩皮甩骨的，只能以底見人。之後請教到網友綠萼的方法後，有大大改善。因自己的技術麻麻，卷得不好(這部份真喺覺得有難度)，表皮都不是太完美，有啲皺紋，同埋將刀唔夠利(咁都有得賴)，但都總算似似地街賣嗰啲啦。今次的蛋糕體食譜是參考咗一本叫《東洋點心DIY》一書。書中整啲卷狀形蛋糕全是用全蛋法，我之前多次用分蛋法，焗出嚟嘅蛋糕面都有爆裂的問題出現，今次就無，好開心。同埋這個食譜係無落油嘅。我將原食譜份量改咗小小及減糖。蛋糕口感鬆軟，配這個加咗酒味提子的忌廉餡都唔錯。

原食譜：蛋1隻.  蛋黃半隻.  低筋30克.  奶15cc.  砂糖40克

栗子慕士蛋糕

栗子慕士蛋糕

戚風蛋糕 (6吋模)

材料： 蛋白3個.   糖 35克.  油28克.   低筋粉70克.   蛋黃3個.  糖20克.  熱水48克

做法：

1.  預熱焗爐170度，低筋粉先篩好。

2.  蛋黃加20克糖混合，再加入油及熱水拌勻。
3.  蛋白加入35克砂糖，打到企身。
4.  將低粉加入(2)拌勻，再將1/3的蛋白加入裏面，用手打蛋器拌勻後再將剩下的蛋白加入切底拌勻，入模。拿起模dun兩下。入爐，焗35-40分鐘。出爐後馬上倒扣放涼。

栗茸慕士(參考為食貓)
材料:  淡忌廉125克.  砂糖20克.  水20克.  魚膠粉4克. 栗茸100克.  RUM酒1茶匙
作法：
1. 淡忌廉125克加糖打發再加RUM酒打均.
2. 魚膠粉加20克水叮溶備用.
4. 將栗茸加入打發的忌廉攪拌均勻，再將魚膠粉溶液加入攪拌均勻，然後倒在戚風蛋糕上即可。

裝飾：100克栗茸加20克奶及4克糖攪勻，唧上蛋糕面。

後記：又係栗子當做期，啲栗子好平10元有2磅生栗子肉，其實自己喜歡食炒栗子多啲。前幾天煮栗子炆猪利做餸時，買咗2磅栗子肉用唔曬，留起咗啲嚟整蛋糕。栗子肉煲咗成2個幾鐘，之後用薯茸壓和棍壓爛。做慕士嗰啲就留翻小小栗子肉粒，比較有口感。第一次做蛋糕面裝飾，都唔知點樣入手，求其唧啲花紋上面就算，出嚟的效果覺得有好過冇啦。平時買蛋糕比較少買栗子蛋糕，因覺得比較漏，但今次自己整覺得ok喎，唔漏。可能自己唔喜歡咁甜，就著自己唔落咁多糖，適合自己口味多啲。

碎朱古力曲奇

碎朱古力曲奇

材料：
牛油100g.   沙糖75g.   蛋1 隻.   低筋麵粉155g.   可可粉15克.  碎朱古力粒(自己喜歡落幾多就幾多)

做法：
(1)  焗爐預熱至170 度。牛油與沙糖徹底拌勻至變白，然後分次拌入蛋。
(2)  麵粉、可可粉篩勻，與蛋漿拌勻即可，不要過份攪拌。
(3)  將約10g曲奇料滾成球形，輕輕壓扁，表面黏上碎朱古力粒。入焗爐用170 度焗10 分鐘後，轉150度焗多10分鐘即可。

後記： 忽然很想食朱古力曲奇，所以再一次整這美味的曲奇。這是其中一種我會想食完再食的曲奇。今次可可粉落多過上次，而低筋粉就減翻少少。依然口感鬆脆，甜度剛好。這個份量可做約36塊，我個爐細，要分3次焗。

椰汁紅豆糕

椰汁紅豆糕(食譜參考為食貓)

材料： 椰汁1杯.   水800ml.   糖1杯.   花奶1杯.   鷹粟粉1杯.   魚膠粉5克.   紅豆茸

做法：
1.         將750ml水、糖和紅豆茸煮滾。
2.         50ml水加魚膠粉叮溶，加入(1)中。
3.         椰汁同鷹粟粉和花奶伴均後慢慢倒入，用慢火攪均至熟。

4.         倒入杯內待涼後放入雪櫃至凍。

後記：將之前餘下之紅豆茸全部放曬，唔記得量，所以唔知有幾多。因紅豆茸本身有糖，所以糖量減咗半杯。原食譜用20克大菜片，我無，所以改為落魚膠粉。粟粉比較難伴均，我分幾次放落椰汁和花奶中伴均才倒入。1杯的份量是250ml。這材料的份量可做到如圖中的膠杯8杯。

香橙戚風蛋糕

香橙戚風蛋糕 (6吋模)

材料： 蛋白4個.   糖 30克.   菜油25克.   低筋粉65克.   蛋黃3個.  糖20克.   橙皮茸1個.  橙汁55克

做法：

1.            預熱焗爐170度，低筋粉先篩好。

2.            蛋黃加20克糖混合，再加入橙汁，橙皮茸及菜油拌勻。

3.            蛋白加入30克砂糖，打到企身。

4.            將低粉加入(2)拌勻，再將1/3的蛋白加入裏面，用手打蛋器拌勻後再將剩下的蛋白切底拌勻，入模。拿起模dun兩下。入爐，焗35分鐘。出爐後馬上倒扣。

後記：蛋糕有小小濕，可能橙汁落多咗，45克應該夠。不過都好好味。

小椰塔(

小椰塔(食譜參考自為食貓)

材料:

撻皮:  牛油 100 g.   糖40 g.   蛋黃 1/2 隻.   花奶 20 g.  低粉 160 g

餡:    糖105 g.   水 60 g.  牛油 28g.  蛋 1.5 隻.  花奶10g.  椰蓉 85 g. 泡打粉 1/3 茶匙
做法:

撻皮:

1.           牛油和糖打勻至淺色，再加蛋打滑
2.           加入花奶, 再加入麵粉, 搓成粉團後，放入雪櫃冷藏片刻
3.           取出麵糰，壓至約6mm厚，用吸模吸出撻皮形狀
4.           將撻皮放入撻殼中央，由底部開始按壓，撻皮圍邊要高於撻殼。

餡：
1.   糖、水、牛油和椰蓉細火煮至糖溶，冷卻後加入蛋及花奶混合
2.   再加入泡打粉拌勻，雪凍
3.   將椰餡倒入撻模，放焗爐底層180度焗約25 分鐘.

後記： 這次撻放底層焗，撻皮焗得靚啲，不用脫模後再烤多會，已很脆。撻皮放冷凍後壓薄才放撻模，出來撻皮厚薄比較平均。