駭人的紅豆包

嘩！駭人的紅豆包(食譜參考麵麵俱到一書)

發麵材料：   低筋麵粉24g.   中筋麵粉96g(低筋48g+高筋48g).     泡打粉1.2g.    黃豆粉2.4g(我無用).    糖12g.    速溶酵母2g.    水64g(68g).    豬油2.4g(煮食油3g)

做法：
1. 將麵粉放容器內，其餘材料放在中間，慢慢加入水，攪拌至乳化均勻。
2. 再將麵粉揉成糰，醒10分鐘。

3. 再將發麵揉至光滑便可使用。

4. 將發麵麵糰分成10份約20g一份，將一份的麵糰壓扁加入15g紅豆餡，收口係底，放在牛油紙上。
5. 放入蒸籠內，再發酵30-60分鐘(45分鐘)。
6. 鍋內水滾後放上蒸籠，以中小火蒸8-12分鐘(今次我用中大火蒸9分後焗1分鐘才開蓋)。

後記：諗著上次整過雙色饅頭後，都ok喎，但今次改咗小小嘢就失敗喇。材料方面落多咗4g水，麵糰搓落比較黏手，相信這個都不是主要問題所在，而係蒸時的火候大小問題，上次用中小火蒸就好地地，今次開大咗啲就出事喇。臨熄火時見到啲包重好好地，脹卜卜，但開蓋就即刻縮晒縐晒皮，好醜樣。其實書入面都有講，中筋粉係要用中小火蒸就得。低筋粉就要用大火蒸，咁先唔會黏牙。同埋開蓋太快，會令到溫度驟降，表面收縮得太快，就會縐皮。今次都無落黃豆粉，去咗幾間雜貨舖都無得賣，不過從其他書知道黃豆粉係用炒過的黃豆磨成粉就得，落黃豆粉或檸檬汁可令到麵糰出嚟比較白。這紅豆包雖然醜樣但都好味。會下次再試。

剛剛包好紅豆餡

發酵完代入爐，都重好地地