焦糖布丁蛋糕

焦糖布丁蛋糕(食譜克萊兒的點心小棧)

(6吋模份量)

焦糖材料：   砂糖40g.   水20g.

做法：  砂糖和水用小火煮至焦糖色，再倒入在模內代涼凝固

布丁蛋液材料：   砂糖25ｇ.   全蛋3隻.    牛奶230ｇ.   雲呢拿香油數滴
做法：  蛋用打蛋器打散加香油，牛奶和糖用小火煮溶至約80°C沖倒入蛋液中攪勻，過濾後倒入模型

蛋糕體材料： 
1.   低筋麵粉50g.  蛋黃3隻.   牛奶50g.   牛油45g
2.   蛋白3隻.   細砂糖30g.   

做法：
1.   牛油加熱融化，熄火，篩入低筋麵粉拌勻，蛋黃分次也加入拌勻，倒入牛奶拌勻
2.   蛋白打至發泡，分次加入砂糖，繼續打發到中性發泡（提起攪拌頭，蛋白泡呈略為彎曲狀但不會滴落），用橡皮刀把蛋黃麵糊輕輕拌入蛋白泡中，攪拌均勻。
3.   把布丁液倒入已凝固焦糖的模裡，再把蛋糕麵糊倒在布丁液表面，因為蛋糕麵糊裡有很多蛋白氣泡，所以比重比布丁液重，會漂浮在表面。用橡皮刀輕輕撥平麵糊表面，把模整個放進另一個大烤盤裡，在烤盤之間注入熱水，水量高度以稍為高過布丁為佳，如此放進焗爐隔水焗約40分鐘即可。等蛋糕降溫時即可脫模。脫模時可用細薄的刀輕輕沿著烤盤四周刮一圈，放上一個大盤子，翻轉倒扣即可扣出（要小心焦糖灑出來）。
4.   爐溫170°C，蒸焗至表面上色，轉成150°C繼續烤到熟（假如表面繼續快速上色甚至裂開，可將爐溫轉至更小），以竹籤插入不沾麵糊即可。

後記：好耐之前係Eupho Cafe見到這蛋糕已很喜歡，佢整得好靚，又覺得好神奇，點解布丁和蛋糕一齊焗都得。但因佢啲份量多數都係用量杯，覺得好難計算，所以而家食譜係跟克萊兒的份量。蛋糕睇落好似好複習，但跟著食譜整一啲都唔難。焗完出嚟見到成品真係好開心，覺得自己都整到，雖然無Eupho Cafe咁靚，都有七八成似樣吖，最主要係布丁部份焗得好滑，成個蛋糕都好好味。所以忍唔著咁影咗咁多相。

焦糖放底致凝固

倒上布丁液

再倒入蛋糕糊

剛焗好取出，燶咗小小，蛋糕糊份量多咗小小，整多咗一個蛋糕仔

從側面睇，

放涼後收縮

倒扣出蛋糕後

奶茶曲奇

奶茶曲奇(食譜西點大百科一書)

材料：     

牛油120克.     砂糖40克.      練奶38克.       蛋1隻.      低筋麵粉210克.       紅茶葉6克  

做法：

1.    麵粉和紅茶葉篩勻待用

2.    牛油與糖打至奶白色成忌廉狀，加入練奶打勻，再分次加入蛋液打勻

3.    再將麵粉加入(2)中拌勻成粉糰，先雪片刻，再將粉糰放入保鮮紙中整成長條狀，放冰格雪約2小時

4.    將粉糰取出切成一塊塊，放入已預熱的焗爐用170度焗10分鐘，轉155度焗10分鐘即可。

後記：  好似好耐無食曲奇喇，見到西點大百科書中的奶茶曲奇未整過，材料又有，咁就試吓啦。不過曲奇出嚟唔係好覺有紅茶味，本書度練奶應落30克，我唔覺意倒多咗8克，仲驚會甜得滯，點知曲奇只覺小小甜，可再落多啲糖都唔怕。自己好鐘意食練奶，焗嗰時好香練奶味，但食時就唔多覺，有小小失望。

香蕉戚風蛋糕

香蕉戚風蛋糕

材料：  

1.   芥花子油 22克.   奶53克.   自發粉80克.   蛋黃4個.  糖20克.   香蕉茸125克
2.   蛋白4個.   糖 40克.  

做法：
1.   預熱焗爐170度，自發粉先篩好。香蕉先壓成茸。
2.   蛋黃加20克糖打至糖溶解混合，加入菜油、奶及香蕉茸拌勻，再將粉類加入拌勻。
3.   蛋白打發至起泡，再分次加入40克砂糖，打發到企身。

4.   將1/3的蛋白霜加入(2)裏面，用膠刮拌勻後再將剩下的蛋白加入切底拌勻，入模。拿起模dun兩下。入爐，焗25-30分鐘(如中圖覺得蛋糕面太焦，可蓋鍚紙)。出爐後馬上倒扣。

後記：   今次香蕉戚風蛋糕好軟熟好好味，蛋糕體組織亦好綿密。但脫模時失手，蛋糕斷開三段。主因都係懶字，見到枱面有嘢又唔執乾淨先。諗著就咁用手接著個蛋糕，又接唔穏，係空中爭啲跌落地，咁咪變成3段囉。覺得仲未掌握到點樣脫呢個水泡模嘅技巧，部份蛋糕底部都係會黏著個模。

朱古力戚風蛋糕

朱古力戚風蛋糕

材料：  
1.   蛋黃5個.   糖35克.    植物油 50ml.   鮮奶50ml.   自發粉 100克.   朱古力粉20克.    水75ml.
2.   蛋白5個.   糖 55克.  

做法：

1.   預熱焗爐170度，朱古力粉和75ml熱水先混和溶解。

2.   蛋白加入55克砂糖，打到企身。
3.   蛋黃加35克糖打至混合，加入植物油及奶拌勻後，再加入已溶解的朱古力漿拌勻。

4.   將已過篩自發粉加入(3)拌勻，再將1/3的蛋白霜加入裏面，用手打蛋器拌勻後倒回蛋白霜切底拌勻，入模。拿起模dun兩下。

5.   放入己預熱170度的焗爐，焗35分鐘(如中途覺得蛋糕面太焦，可蓋鍚紙)。出爐後馬上倒扣。

後記：   呢個模係n年前買鑊送架，推廣時教用鑊嚟焗蛋糕，覺得好犀利，就買咗番嚟，但之後都係好似試過一兩次，不過都唔記得當時蛋糕係點樣。最近知道戚風蛋糕係可用手搣出嚟，咁就試吓用佢嚟焗，個模咁大，所以用咗5隻蛋嘅份量，出嚟效果都唔錯，口感都好鬆軟。唔知點解個底有啲一粒粒好似朱古力咁，但食又唔覺有粒粒，可能拌得未夠均勻。但搣出嚟時，有部份搣唔到，仲黏著個底，變咗無咗兩忽，如果唔係，個蛋糕睇落都幾靚，圓碌碌。

焦糖蘋果蛋糕

焦糖蘋果蛋糕 (參考自Eupho Cafe)

材料 (8吋焗盤一個)：   

1.   砂糖 半杯.    水 1/4杯.
2.   蘋果 1個
3.   牛油 80g.    砂糖 60g.    自發粉 100g.     蛋 2個.     牛奶 20ml

做法：
　
1. 先煮焦糖：把砂糖半杯與水1/4杯放入易潔鍋中，糖受熱融化之後，不需攪拌，只要輕輕搖晃鍋子至糖溶解，繼續煮至變成黃褐色即可。然後倒入模中，搖晃使底部完全覆蓋一層焦糖。放涼之後焦糖會變硬。

2. 蘋果去皮去核，切片，浸入薄鹽水中片刻。把蘋果片一一排入烤模裡備用。預熱焗爐至165 C。

3. 蛋糕體：把牛油打至忌廉狀，分次加入糖繼續打發，然後再分數次，一點一點地加入蛋汁打勻。用橡皮刀把已篩自發粉輕輕拌入攪拌均勻，加入牛奶拌勻即可。

4. 將麵糊倒入焗模中抹平，放進焗爐焗35分鐘，焗好可即時脫模放涼。

後記：  第一次整蕉糖蛋糕時(都成年前囉)，因未知幾時可倒扣放涼，擺放一段時間後才倒扣，發現焦糖還有部份黏著焗盤底部，未能全部完整倒出。咁今次一出爐即第一時間倒扣脫模，但都係一樣，有好多焦糖重係喺個焗盤度，原來係唔會全部黏係蛋糕度嘅，咁咪好side囉，諗著用匙挖起番啲焦糖，但已變得好硬，黏
到好實。蛋糕只需用刀在側邊繞一圈，就可倒扣脫模。蘋果唔好切薄片，要切厚小小先有口感，先食到蘋果啲果肉味道。今次比上次已減少10g糖，因焦糖已浸透底層蛋糕，60g糖已足夠。

上次整呢個蛋糕時，個仔主動同我講，蛋糕幾好食喎。今次就先生同我講，話蛋糕幾好味喎。我話好耐之前整過啦，佢話又好似係喎。雖然好多時我問佢，佢都答唔出我整啲蛋糕係乜嘢味，不過聽到佢地主動話好食已好開心。呢個蛋糕雪凍第二日會更好味。

 

芒果奶大菜糕及紅豆大菜糕

芒果奶大菜糕及紅豆大菜糕

材料： 大菜 8g.     水 500g.    砂糖 100g.     鮮奶 500g.     芒果1個.      紅豆茸 140g.

做法：

1. 將大菜絲用材料以外的水浸12個鐘至軟身

2. 將軟身大菜加500g水放於鍋中煮至滾，轉細火煮約10-15分鐘至完全溶解
3. 大菜溶晒後，加入100g砂糖煮至溶熄火
4. 加500g鮮奶攪勻，一半份量入杯加上芒果粒，另一半份量加入紅豆茸攪勻入杯
5. 待降溫後，便可放入雪櫃。

後記：買咗包大菜絲好耐(係雜貨鋪買12蚊一包有一兩)。但因未整過，唔知落幾多水份先正確，所以擺理一邊都唔記得咗。到最近係圖書館借咗本完美西點一書，佢話1g大菜和水嘅凝膠比例係1:166，嘩，原來係咁多架，重話大菜絲需預先浸12個鐘先。而魚膠粉嘅清水凝膠比例係1:20。不過第一次整，都係唔敢落足佢個比例，試吓1:125先。

個食譜只係自己試試，屋企有乜就落乜，好易整，大菜溶液其實放室溫都會自己凝固。水份和糖的比例係1:10，都覺得可以，唔會太甜。雪完冰冰涼涼脆脆，都幾好味。

朱古力林明頓蛋糕

朱古力林明頓蛋糕 (食譜參考美味DIY)

海綿蛋糕材料：  

蛋  4隻.   糖  75g.   低筋粉  95g.   牛油  20g.

朱古力漿材料︰

朱古力  77g.    牛奶  145g.    椰絲適量

做法：

1.  雞蛋和糖打至厚白忌廉狀。
2.  分次放入已篩好的麵粉，再慢慢攪勻。
3.  放入已預溶牛油，攪勻後倒入長方形焗盤，再放入己預熱175度的焗爐焗約17鐘，冷郤備用。
4.  將朱古力碎和鮮奶放入盤中，隔熱水以低中溫煮溶，待涼。
5.  將蛋糕切成邊長約1吋的方塊，沾上朱古力漿，再立刻黏上椰絲，放於架上待凝固，最後放入雪櫃內待凍便成。

後記：

喺美味DIY係第一次知道有這種蛋糕，自己未食過。但搜尋網上林明頓蛋糕食譜，面漿做法可有好多種變化，用果占都得。而朱古力漿和牛奶或忌廉的比例亦好唔同，有啲朱古力落得多過牛奶和忌廉，有啲就好似這食譜咁。相信如朱古力多過牛奶，出嚟效果會面層會比較脆。

開始真正整蛋糕都係睇咗美味DIY之後，之前都係用多士焗爐仔整吓曲奇餅咁。重溫番啲VIDEO，發覺自己攪拌麵粉開始失控，攪拌得太快和太大力。重溫番後，今次海綿蛋糕真係好似好咗啲，鬆軟咗。

本來想買方形模好耐，但生性孤寒，睇過好幾次都買唔成，見到屋企有啲鐵月餅盒剩低(吉嘅月餅盒都仲有幾個，仲未捨得掉)，就試吓用嚟焗蛋糕，用錫紙鋪底。本來個月餅盒都唔錯，不過就因盒頂比盒底窄咗小小，取蛋糕出嚟比較無咁方便，不過個size就好fit我個焗爐，剛剛好。