芒果芝士蛋糕

芒果芝士蛋糕

海綿蛋糕:(6吋模)

材料：   牛油10克 .   牛奶10克.    低筋粉45克.    蛋2個.    糖38克.

做法：
1.   把蛋和砂糖一起打發到企身。
2.   將過篩過之低筋麵粉加入，用膠刮刀混合，
3.   接著將部份(2)加入暖和的牛油和牛奶混合，再倒回(2)中攪拌均勻即可。
4.   將麵糊倒入鋪有牛油紙的圓形模中，放入已預熱170度的焗爐中焗約20分鐘或竹籤插入不黏即可。取出倒扣放涼後切開備用。

芒果芝士餡
材料：  忌廉芝士  130克.    砂糖 38克.    淡忌廉110克.    芒果茸  80克.    魚膠粉 5克.    水30克.   

做法：

1.  淡忌廉7分打發備用。
2.  忌廉芝士加糖打滑至糖溶解，加入芒果茸拌勻。
3.  魚膠粉加水，微波爐叮熱溶解，加進芝士餡內拌勻，再加入已打起的淡忌廉攪勻備用。

芒果茸面飾

材料：  芒果茸80g.     魚膠粉5g.     水100g.      砂糖20g.

蛋糕組合：

1.  將己放涼的蛋糕放入6吋蛋糕模，倒入芒果芝士餡，用力轉一轉模令芒果芝士餡表面變得平滑，放雪櫃至凝結。
2.  水加糖煮溶，加入魚膠粉至溶解，倒入芒果茸中拌勻。
3.  取出己凝結的芝士蛋糕，再將(2)倒在已凝固的蛋糕上，再放雪櫃至凝固便可。

後記：  其實我覺得自己整蛋糕真係好求其，要求好低，其實主要係一個懶字。芒果茸面籂，原本應將芒果打爛到好溶，自己因唔想攪完又要洗個攪拌器，求其用薯溶器壓爛就算，所以整得唔夠細緻。芒果芝士蛋糕都整過幾次，今次只係將面層作出小小變化，唔洗次次都一樣款。

 

蘋果批

蘋果批(8吋)

餡材料：  蘋果1個(重約340g).  砂糖 55g.  粟粉 1小匙.   牛油20g.   肉桂粉1小匙.

做法：   煲內放入蘋果粒、砂糖及牛油，煮至淋身及乾水加粟粉，熄火後加入肉桂粉拌勻即可。

批皮：  牛油 140g.   低筋麵粉 100g.   高筋麵粉 100g.   冰水3大匙

做法：　

1. 用义壓爛及混合凍牛油及麵粉至粒粒狀。分3次加入冰水，稍微拌至呈糰狀即可，不要過度攪拌，整形成四方形，放雪櫃1小時。

2. 將麵糰取出，枱面灑點高筋粉，將麵糰放上擀成長方形，摺成3層，灑粉再幹長，再摺成3層，再重複一次，放雪櫃雪1小時。

3. 取出麵糰分成2份，擀壓成圓形薄片，放一片進8吋批盤裡，整理服貼之後，用叉子义孔及輕輕切下派盤邊緣多餘的批皮。另一張麵片也桿成一樣大小。覆蓋保鮮膜，放進雪櫃雪半小時。
4. 焗爐預熱至180度。從雪櫃取出麵片，將預備好的餡料倒入批盤裡鋪平。如表面覆蓋格子狀的批皮，就把表面那張批皮切割成等寬的長條狀，編織成格子圖樣，因為格子狀批皮有空隙，所以不用再開通氣孔。
5. 蛋黃加水1大匙拌勻，用刷子刷在派皮上。放進焗爐底格焗約40分鐘直到表面呈金黃色。取出，放在網架上待涼。

後記：      今次試整唔甜嘅批皮，出嚟效果唔錯，幾脆。不過批面啲格子批皮擀得唔夠薄，厚咗啲。蘋果用咗一個大富士蘋果，點知原來煮出嚟又係得咁少，只舖到得薄薄一層嘅餡，下次要用2個至得。餡啲砂糖可落番少啲，因初初諗著批皮無落糖，咁餡咪應加多少少糖，但食落個餡好似甜咗少少。批盤無塗油及曬粉，用咗烘焙紙舖底，留番小小紙角，焗完就咁可以成個批拎出嚟。個批拎咗出嚟後，我再放番入爐再焗多個底10分鐘，想要令到個批底都上色和脆啲。

先生好喜歡食蘋果批，佢話咁多款我整過嘅蘋果批，最好食係呢個，話個批好脆。

 

芒果糯米糍

芒果糯米糍 (食譜參考美味DIY)

材料：   澄麵粉20g.  糯米粉80g.  砂糖55g.  吉士粉10g.  水150ml..  芒果肉1個.   椰絲適量

做法：
1.  將糯米粉、澄麵粉、吉士粉及砂糖撈勻，慢慢注入清水，將材料溶解至沒有粒狀物，成為軟滑粉醬漿。將粉漿傾倒至盤中蒸熟，約5-6分鐘。

2.  將粉團放涼，平均分約25g一份，約12份。

3.  用乾椰絲黏滿糯米糍皮表面，壓扁包入芒果肉，搓成球形。

後記： 好耐無食芒果糯米糍攞，心思思又要整番次嚟食。係美味DIY重溫VIDEO和食譜時，才留意到原來粉醬唔可以蒸太熟，如果唔係會好黏手，蒸5分鐘就夠，我以前通常都係蒸6分鐘。唔知係唔係我個盤比較深，放涼咗蒸熟嘅粉漿後先發覺有一小部份唔熟，所以今次就係整得咁多咋。做形方面，今次試整咗2條長形嘅，長形重比較容易收口，只雖將粉皮在椰絲上壓扁成長方形，在中間放上芒果粒，將粉皮由一邊折綿被咁折去對邊合上收口便可。這方法比較簡單快捷，希望下次個做形會整靚啲。

碎朱古力曲奇 / 藍梅醬曲奇

碎朱古力曲奇(參考自美味DIY)

藍梅醬曲奇

2款曲奇全程用160度焗20分鐘。但好似唔係好夠乾身，整好後要等到第三日先有機會食，覺得唔脆喇。下次要用170度焗10分鐘，再轉150-160度焗多10分鐘試試。

後記：有半年無上跳舞堂，本來今次抽到有得跳好開心，點知又係之前教hip hop個Miss教番，佢無教半年又番嚟教，我重以為可跟新Miss跳Jazz添。我又要再跳呢啲對我嚟講好難嘅hip hop舞。太耐無運動，跳完後到第四日都仲週身酸痛。上堂見到好耐無見嘅同學仔Eva，應承整啲曲奇餅比佢食，佢重點名指定要朱古力曲奇，不過我都整埋藍梅醬曲奇比佢試吓。橫掂整開就整多啲嚟還禮，因先生公司之前有個同事Elain走咗之後開咗間美容院，重送咗啲面膜比我用。點好意思收人地咁多禮物而無啲反應呢，所以就送啲曲奇餅比佢，希望佢鐘意喇。

今次整藍梅醬曲奇時，覺得有啲跟上次唔同樣，原來係雪得唔夠凍就整，所以表面會無咁光滑。

右面塊雪唔夠就整，表面無咁光滑

藍莓芝士蛋糕

藍莓芝士蛋糕

海綿蛋糕:(6吋模)

材料：   牛油10克 .   牛奶10克.    低筋粉47克.    蛋2個.    糖38克.

做法：
1.   把蛋和砂糖一起打發到企身。
2.   將過篩過之低筋麵粉加入，用膠刮刀混合，
3.   接著將部份(2)加入暖和的植物油和牛奶混合，再倒回(2)中攪拌均勻即可。
4.   將麵糊倒入鋪有牛油紙的圓形模中，放入已預熱170度的焗爐中焗約25分鐘或竹籤插入不黏即可。取出倒扣放涼後切開備用。

藍莓芝士餡料 (參考自美味DIY)

材料：  忌廉芝士125g.  糖30g.  淡忌廉125g.   魚膠粉1 茶匙.   水18g.     牛奶20g.      藍苺果醬35g

做法：
1.  淡忌廉7分打發備用。
2.  忌廉芝士加糖打滑至糖溶解，加入藍莓果醬及牛奶拌勻。
3.  魚膠粉加水，隔熱溶解，加進芝士餡內，再加入已打起的淡忌廉拌勻
4.  先在模中放上蛋糕一片，然後將全部芝士餡倒落蛋糕餅上掃平便可。放入雪櫃至凝固。

後記： 結婚時擺酒和註冊分開2日進行，所以好多時都會略略慶祝2次。雖然擺酒日都叫做慶祝咗，咁註冊日都要係咁意整番個蛋糕食喇。蛋糕都係我一貫風格，無裝飾。但今次芝士餡料就加多咗小小牛奶落去，令到口感比較軟淋啲。

芒果忌廉蛋糕

係舊BLOG幅圖死咗，唔知係唔係呢幅

芒果忌廉蛋糕(6吋模)

海綿蛋糕：

材料：  低筋粉70g.   蛋3隻.   糖50g.   牛奶10g.    植物油20g.

做法：

1.   把蛋和砂糖一起打發到企身。
2.   將過篩過之低筋麵粉加入，用膠刮刀混合，
3.   接著將部份(2)加入暖和的植物油和牛奶混合，再倒回(2)中攪拌均勻即可。
4.   將麵糊倒入鋪有牛油紙的圓形模中，放入已預熱170度的焗爐中焗約25分鐘或竹籤插入不黏即可。取出倒扣放涼後切開成3片備用。

忌廉餡料： 淡忌廉170克.  糖粉17克.  芒果肉一個

組合：在兩片切開的蛋糕面都抺上忌廉，然後在其中一塊放上芒果肉，再將兩塊合埋。將其餘的忌廉塗抹在蛋糕面及四周至均勻即可。

後記：好耐無整過抺的忌廉蛋糕，上次整的忌廉蛋糕，剩係抺忌廉的部份都用咗大半個鐘，但係都係抺得唔靚。最近有個舊CD架唔要，個底可轉的底板留番係度，所以今次再試吓用嚟整，諗著或者擺係轉板上整可整靚啲。但出嚟效果都係差不多，側邊位係比較整齊咗，時間係用少咗，但都係整得唔靚。睇人整真好似好易咁，用把刀抺抺抺就攪點。今次我已經預多咗忌廉(今次用170g，上次用150g)，重諗著可留番小小嚟唧花添，但就差啲連抺側邊都唔夠。橫掂都係唔靚，所以都無心機再整裝飾落去囉。蛋糕因未雪夠就切開嚟食，所以忌廉重係溶溶地咁款。

芝士戚風蛋糕

芝士戚風蛋糕(食譜情迷芝士餅)

材料: (6吋模)

A.  牛奶45g.  忌廉芝士30g(改用2片芝士40g).  牛油20g
B.  低筋麵粉 50g.  
C.  蛋黃 3隻.  
D.  蛋白 3隻.  糖 75g(只落50g.)    
　
做法：

1) 將芝士片、牛油和牛奶坐熱水溶至冇粒粒，完全溶解。
2) 離開熱水後加入低筋粉拌勻，再分3次加入蛋黃攪拌均勻。
3) 將蛋白分3次加入糖打發至企身。將1/3蛋白加入麵糊中拌勻，再加入其餘蛋白拌勻。入模。拿起模dun兩下。
4) 放入已預熱170度的焗爐，如中途覺得蛋糕面太焦，可蓋鍚紙，焗約40-45分鐘。出爐後馬上倒扣。

後記：  呢個芝士戚風蛋糕好好味，所以咁快又整。今次焗足45分鐘，蛋糕無上次咁差小小唔熟得晒。但唔知點解，近面部份的組織都係無底咁鬆軟，會唔會係太早蓋鍚紙呢。未入爐前已經將模dun咗好幾次都重有咁大的個氣泡，下次或用竹籤插入攪吓佢，睇吓可否將氣泡排出。