蘿蔔糕

蘿蔔糕

材科:   白蘿蔔  1400g (去頭後計).    粘米粉 140g.    鷹粟粉 120g.   

餡料：  臘腸1條.     臘肉適量.    蝦米40g.  

做法:

1.    臘肉和臘腸用熱水洗一洗，臘肉去皮，然後切薄片，備用
2.    蝦米用熱水浸軟，水可留用
3.    白蘿蔔用刨刨粗絲備用
4.    用少少油爆香臘腸、臘肉和蝦米，加入白蘿蔔連汁，蝦米水炒一陣，加2茶匙糖，一茶匙鹽，一茶匙雞粉，少少蠔油和一湯匙胡椒粉調味，至蘿蔔透明便熄火
5.    分次篩入粘米粉和鷹粟粉至完全均勻
6.    重新開火, 炒至適合的杰度便熄火
7.    倒入已塗油糕盆，抺平
8.    水滾後，大火蒸約45分鐘。或用竹筷子插入不見粉漿黏著，最後可洒上少許白芝麻。

後記： 

之前已試咗一底，好多人都話比例為5:1，即5斤蘿蔔 (淨肉計)， 便用1斤粉類。但第一底份量差不多，不過可能炒得耐咗和乾咗啲，所以比較實，今次呢底就好啲喇。所以都係要實戰過先會有經驗。上次餡料炒好後另剩起，至炒好蘿蔔後才加入一齊炒，出嚟顏色會比今次呢底白啲。但覺得咁一齊炒，蘿蔔糕臘味會濃啲。臘味的份量其實好隨意，可跟個人喜好加減。

今年係我第一次自己整蘿蔔糕，原來係好容易，最難啲部分其實只係切臘味，因比較硬，又要切到好薄，所以要用多少少時間，不過全部過程約一個鐘就攪掂，唔計蒸糕時間。雖然我年年唔使整都有得食，不過今年就可整埋比阿媽食，出面買要幾拾蚊底，咁我又慳番啲。
唔慳唔得喇，份工做埋今個月無得做，老細話為唔到皮，所以要結業。今年大把時間整糕和做清潔喇。